„გავიგუდეთ“ თბილისის აგლომერაციის ატმოსფერული ჰაერის ხარისხის გაუმჯობესების ხელშემწყობი სამუშაო ჯგუფის შეხვედრას დაესწრო

„გავიგუდეთ“ თბილისის აგლომერაციის ატმოსფერული ჰაერის ხარისხის გაუმჯობესების ხელშემწყობი სამუშაო ჯგუფის შეხვედრას დაესწრო

ატმოსფერული ჰაერის დაცვის შესახებ საქართველოს კანონში 2020 წელს შესული ცვლილებით, ატმოსფერული ჰაერის ხარისხის მართვის მიზნით საქართველოს ტერიტორია დაიყო ზონებად და აგლომერაციებად.

მიმდინარე პერიოდში თბილისის აგოლმერაციისათვის მუშავდება ჰაერის ხარისხის მართვის სამოქმედო გეგმა. გეგმასთან დაკავშირებით, დღეს, 24 ნოემბერს, სამუშო ჯგუფის მეორე შეხვედრა გაიმართა, რომელსაც ჩვენც დავესწარით.

ამ გეგმის შემუშავება ქართველი და უცხოელი ექსპერტებისა და მრჩეველების ჩართულობით მიმდინარეობს და დღევანდელ შეხვედრაზე უცხოელმა ექსპერტებმა წარმოგვიდგინეს ის დამატებითი ზომები, რისი ჩადებაც სამოქმედო გეგმაშია განსაზღვრული.

დღევანდელ შეხვედრაზე განსასხილველად წარმოდგენილი იყო 22 აქტივობა, რომლებიც მორგებული იყო ჰაერის დაბინძურების თვალსაზრისით ქალაქ თბილისისთვის ყველაზე პრობლემურ სექტორებზე, ესენია – სატრანსპორტო სექტორი, სამშენებლო სექტორი, ასევე გათვალისწინებულია გარემოსდაცვითი ცნობიერების ამაღლების საკითხი.

ამ აქტივობათა ნაწილი ემსახურება უკვე არსებული კანონების აღსრულების გაძლიერება/ხელშეწყობას.

რაც შეეხება შეხვედრასა და ამ გეგმის ფარგლებში ჩვენი ჩართულობის მიზანს;

ჩვენი მოძრაობა მუდმივად ხაზს უსვამს რუსთავ-თბილისს შორის საქალაქთაშორისო ტრანსპორტის პრობლემას.

ორ ქალაქს შორის მგზავრთა ნაკადი ყოველდღიურად იმდენად დიდია, რომ დღეს არსებული სატრანსპორტო სისტემა საკმარისი არაა და ადამიანებს, განსაკუთრებით პიკის საათებში, დიდი ხნით უწევთ სატრანსპორტო საშუალების ლოდინი, რიგში დგომა. ეს პრობლემა ვერც 1 წლის წინ ისნის მიმართულებით დანიშნულმა ავტობუსებმა შეამსუბუქა. სწორედ ეს უბიძგებს სულ უფრო მეტ რუსთაველს, კერძო ავტომობილი შეიძინოს და ასე გადაადგილდეს თბილისში და უკან.

იმ პირობებში, როდესაც თბილისისთვის ჰაერის დაბინძურების ძირითად წყაროს სატრანსპორტო სექტორი წარმოადგენს, რუსთავიდან დამატებით ჩასული მანქანები კიდევ უფრო დიდ დატვირთვას წარმოადგენს და დაბინძურების დამატებითი წყარო ხდება.

საზოგადოებრივი ტრანსპორტის გადაადგილების სიხშირისა და იმ ფართობის გაზრდა, რასაც ეს ტრანსპორტი ქალაქებში დაფარავს, ამ პრობლემას და, შესაბამისად, სატრანსპორტო საშუალებებიდან ჰაერის დაბინძურების დონეს მნიშვნელოვნად შეამცირებს, როგორც დედაქალაქში, ასევე რუსთავშიც.

ამ საკითხის ადვოკატირებას დიდი ხანია, ვეწევით, მათ შორის ცენტრალური ზონის (რომლის შემადგენლობაშიცაა რუსთავი) ჰაერის ხარისხის გაუმჯობესების გეგმის შემუშავების დროსაც, თუმცა, როგორც მაშინ სამინისტროს წარმოამდგენლებმა განმარტეს, ამ პრობლემასთან დაკავშირებით აქტივოებების შემუშავება რელევანტური იქნებოდა თბილისის აგლომერაციის სამოქმედო გეგმის ფარგლებში, ვინაიდან ამ საკითხზე მუშობა თბილისის მერიის ჩართულობით უნდა განხორციელდეს.

შესაბამისად, შეხვედრაზე ვიკითხეთ, რა კონკრეტული აქტივობებია გათვალსიწინებული საქალაქთაშორისო ტრანსპორტის პრობლემის გადასაჭრელად.

როგორც ექსპერტებმა და სამინისტროს წარმომადგენლებმა გვითხრეს,  სამოქმედო გეგმის ფარგლებში ამ საკითხზე მუშაობა გაგრძელდება და მიიღებენ მოსაზრებებს საქალაქთაშორის ტრანსპორტის საკითხთან დაკავშირებით.

იმედი გვაქვს, ამ საკითხზე მართლაც გამახვილდება ყურადღება თბილისის აგლომერაციის ჰაერის ხარისხის გაუმჯობესების სამოქმედო გეგმაში და ამ პრობლემის გადასაჭრელად შემუშავდება შესაბამისი აქტივობები/ზომები.