ვაჩუქოთ რუსთავს ჟანგბადი

ვაჩუქოთ რუსთავს ჟანგბადი

სამოქალაქო აქტივისტების ჯგუფის – „გავიგუდეთ“ – ინიციატივით, რუსთავში, მე-20 საჯარო სკოლის მიმდებარე ტერიტორიაზე, 1 ჰექტარ ფართობზე განხორციელდა გამწვანების აქცია, დაირგო 200-მდე ხე და საირიგაციო სისტემა მოეწყო. ამ ტერიტორიას რეკრეაციული ზონის სტატუსი აქვს, თუმცა, აქამდე გამწვანების გარეშე იყო. მე-20 საჯარო სკოლის ტერიტორიის გარდა, პროექტის ფარგლებში 100-ზე მეტი ნერგი ქალაქის სხვადასხვა უბანში გადანაწილდა.

აღნიშნული პროექტი განხორციელდა ქრაუდფანდინგის პლატფორმა “ორბელიანი მეტის” მხარდაჭერით. მოქალაქეების მიერ შეგროვებული თანხა სწორედ “ორბელიანი საქართველოს” მხარდაჭერით გაორმაგდა და 12,000-მდე ლარი ქალაქ რუსთავის გამწვანებას მოხმარდა.

გარდა ამისა, პროექტში ჩაერთო:

არქიტექტურული კომპანია “ტეტრიქსი” – მოხალისეობრივად გააკეთა ტერიტორიის გენერალური გეგმა, სარწყავი სისტემის ნახაზი და ტერიტორიის სამომავლო პერსპექტივების გათვალისწინებით შექმნა სრული პროექტი;

ქ. რუსთავის მუნიციპალიტეტის მერია – რამდენიმე მიმართულებით გაგვიწია ტექნიკური დახმარება და 2021 წლის იანვრიდან დაფარავს ირიგაციასთან დაკავშირებულ წყლის ხარჯს;

“რუსთავის ინოვაციების ჰაბი” – პროექტში თანამონაწილეობის სახით დამატებით 5,600 ლარი გადმორიცხა მოძრაობის „გავიგუდეთ“ ანგარიშზე (თანხის ნაწილის გამოყენება მოხდება 2021 წლის გაზაფხულზე გამწვანების აქციისთვის);

ველური ბუნების ეროვნული სააგენტო – პროექტისთვის გადმოგვცა ნერგები.