„გავიგუდეთ“ შპს „აგლომერატის“ სკოპინგის ანგარიშის განხილვას დაესწრო
„გავიგუდეთ“ შპს „აგლომერატის“ სკოპინგის ანგარიშის განხილვას დაესწრო
15 აპრილს, სამოქალაქო მოძრაობა „გავიგუდეთ“ შპს “აგლომერატის” ლითონშემცველი მადნის გამოწვისა და აგლომერირების ქარხნის მოწყობა-ექსპლუატაციის პროექტის სკოპინგის ანგარიშის განხილვას დაესწრო. შეხვედრის შემდეგ კი, ჩვენმა გუნდმა საპროექტო ტერიტორია ადგილზე მოინახულა.
შპს “აგლომერატი” გეგმავს, ქალაქ რუსთავში, ლითონშემცველი მადნის გამოწვისა და აგლომერირების ქარხნის მოწყობა-ექსპლუატაციას, რომელიც წლიურად გამოიმუშავებს 66000 ტ/წელ აგლომერატს 7920 საათის განმავლობაში. ამ მიზნით, საწარმოო ტერიტორიაზე განთავსდება 8 შეცხობის 8 თეფში. აგლომერაციის პროცესში წარმოქმნილი აირმტვერნარევების გაწმენდისათვის ქარხანა ითვალისწინებს ორსაფეხურიანი მტვერდამჭერი სისტემის მოწყობას, რომლის ეფექტურობა შეადგენს 98%-ს. საწარმოს ფუნქციონირებისას გაიფრქვევა: არაორგანული მტვერი, მანგანუმის ორჟანგი, აზოტის დიოქსიდი, NO2, გოგირდის დიოქსიდი, SO2, ნახშირჟანგი, CO, ქრომი(Cr+6), თუთიის ოქსიდი, ტყვია და მისი ნაერთები, ნიკელი მეტალური, კადმიუმის სულფატი, დარიშხანი, სპილენძის ოქსიდი, ვერცხლისწყალი, სელენი, Se, რომლებიც წარმოადგენენ ჰაერის ძირითად დამაბინძურებელ ნივთიერებებს.
სკოპინგის ანგარიშის განსახილველად, 18 თებერვალს სამუშაო ჯგუფის შეხვედრა გაიმართა, სადაც მომზადებული შენიშვნები და რეკომენდაციები შეგიძლიათ იხილოთ ბმულზე.
თავდაპირველი ანგარიში სამინისტროს მიერ დახარვეზდა და შესაბამისად არ ჩატარებულა საჯარო განხილვა.
კომპანიამ 2022 წლის 25 მარტს წარმოადგინა განახლებული ანგარიში, სადაც გათვალისწინებული იყო ჩვენი მოძრაობის მიერ გაგზავნილი შემდეგი შენიშვნები:
– სკოპინგის დოკუმენტის თანახმად, ტერიტორია საკადასტრო კოდით 02.05.03.420 ეკუთვნოდა სს „საქმშენინდუსტრიას“, მაშინ როდესაც ელექტონული გადამოწმების საფუძველზე დავადგინეთ, რომ აღნიშნული ტერიტორია წარმოადგენდა შპს „აგლომერატის“ საკუთრებას. საწარმოს მიერ განახლებულ სკოპინგის ანგარიშში კი მითითებულია, რომ ტერიტორია საკადასტრო კოდით 02.05.03.420 ეკუთვნის შპს„აგლომერატს“.
– ტექნოლოგიურ ალტერნატივებში აღნიშნული იყო, რომ მტვერდამჭერი სისტემის ჯამური ეფექტურობაიქნებოდა არნაკლებ 99%-ის ტოლი, მაშინ როდესაც ტექნოლოგიური პროცესის აღწერასა და მტვერდამჭერი სისტემის ალტერნატიულ ვარიანტებში ორსაფეხურიანი მტვერდამჭერი სისტემის ჯამურ ეფექტურობად სახელდებოდა 98%. განახლებულ დოკუმენტში ტექნოლოგიური ალტერნატივებში აღნიშნულია, რომ მტვერდამჭერი სისტემის ეფექტურობა შეადგენს არანაკლებ 98%-ს.
– ტერიტორიის შერჩევის ალტერნატივების თავში აღნიშნული იყო, რომ სამომავლოდ იგეგმებოდა შერჩეული საწარმოო ტერიტორიის შპს „აგლომერატზე“ გადაცემა, თუმცა პირველ ეტაპზე დაიდებოდა საიჯარო ხელშეკრულება. აღნიშნული საკითხი საჭიროებდა კორექტირებას, რადგან ტერიტორია უკვე წარმოადგენდა შპს „აგლომერატის“ საკუთრებას. განახლებულ ანგარიშში კი მითითებულია, რომ ამ ტერიტორიებიდან ერთი წარმოადგენს შპს „საქმშენინდუსტრიის“ საკუთრებას, ხოლო მეორე – შპს „აგლომერატის“ საკუთრებას.
გარდა აღნიშნული შენიშვნებისა, შეხვედრაზე კომპანიის წარმომადგენლები დაგვპირდნენ, რომ ჩვენი სხვა შენიშვნებიც იქნება გათვალისწინებული.
მასალა მომზადებულია პროექტის „ვიცავთ უფლებას სუფთა ჰაერზე რუსთავში“ ფარგლებში, რომელიც ხორციელდება „დემოკრატიის ევროპული ფონდის“ მხარდაჭერით