დარღვევები „ეკო ოილში“ –  დამატებითი ინფორმაცია

დარღვევები „ეკო ოილში“ –  დამატებითი ინფორმაცია

27 აპრილს გარემოს დაცვისა და სოფლის მეურნეობის სამინისტროს წერილით მივმართეთ შპს „ეკო ოილის“ შესახებ. გვსურდა, გაგვეგო ამჟამად მუშაობდა თუ არა აღნიშნული მეორადი ზეთის გადამამუშავებელი საწარმო და არსებობის შემთხვევაში, მოეწოდებინა სასამართლო დადგენილებები კომპანიის დარღვევებზე. სამინისტროს პასუხი და გამოვლენილი დარღვევები შეგიძლიათ იხილოთ ბმულზე. თუმცა, 14 სექტემბერს გარემოსდაცვითი ზედამხედველობის დეპარტმანეტმა დამატებით გამოგვიგზავნა წერილი, სადაც აღნიშნულია, რომ 2022 წლის სექტემბერში შპს „ეკო ოილის“ მიმართ შედგა ადმინისტრაციული სამართალდარღვევის შესახებ ორი ოქმი.

„ეკო ოილს“ 2022 წლის 28 თებერვალს სასამართლო გადაწყვეტილებით დაეკისრა ჯარიმა 7 000 ლარის ოდენობით, საწარმომ ჯარიმა გაასაჩივრა, თუმცა მეორე ინსტანციამ გადაწყვეტილება ძალაში დატოვა.

აღნიშნულის შემდეგ, გარემოსდაცვითი ზედამხედველობის დეპარტამენტმა 2022 წლის აგვისტოში კვლავ შეამოწმა საწარმო და აღმოაჩინა, რომ საწარმოში ხორციელდებოდა საქმიანობები ისე, რომ მას არ ჰქონდა სკრინინგის გადაწყვეტილება.

2022 წლის 22 აგვისტოს შედგენილი ოქმიდან ირკვევა, რომ საწარმო არ ასრულებს გარემოსდაცვითი გადაწყვეტილებით გათვალისწინებულ შემდეგ პირობებს:

– რეზერვუარების იდენტიფიცირებისთვის ობიექტის ტერიტორიაზე მდებარე ნარჩენი ზეთების რეზერვუარებს არ აქვთ წარწერა „ნარჩენი ზეთი“;

– ნარჩენი ბიტუმი მის რეალიზაციამდე არ ინახება მისთვის ცალკე გამოყოფილ რეზერვუარებში;

– საწარმოს ტერიტორიაზე არც ერთი უბანი არ არის აღჭურვილი ხანძარსაწინააღმდეგო ინვენტარით, საწარმოს არ გააჩნია საგანგებო სიტუაციების რეაგირების ადგილობრივ სამსახურთან შეთანხმებული ხანძარსაწინააღმდეგო ღონისძიებების პროექტი, თუმცა საწარმოს ტერიტორიაზე დაფიქსირდა ორ ადგილას ერთი ერთეული ცეცხლმაქრობი და ლაბორატორიის შენობაში სამედიცინო ყუთი;

– სახიფათო ნარჩენებისთვის ტერიტორიაზე არ არის გამოყოფილი გადახურული და შესაბამისად მოწყობილი ადგილი, საწარმოს ტერიტორიაზე დაფიქსირებულ ურნებს არ აქვს შესაბამისი მარკირება, ღია ცის ქვეშ განთავსებული იყო როგორც სახიფათო ნარჩენები, ასევე სხვა საწარმო ნარჩენები, ნავთობპროდუქტებით დაბინძურებული ჩვრები და ხის ნახერხი;

– საწარმომ ვერ უზრუნველყო გარემოსდაცვითი მონიტორინგის გეგმაში ცვლილება – ატმოსფერული ჰაერის მავნე ნივთიერებათა მონიტორინგის გეგმის ხელახლა შემუშავება საწარმოს ექსპლუატაციის ეტაპისთვის და საწარმოს მოწყობამდე სამინისტროში წარდგენა;

– საწარმოს არ აქვს სამინისტროსთან შეთანხმებული განახლებული „ატმოსფერულ ჰაერში მავნე ნივთიერებათა ზღვრულად დასაშვები გაფრქვევის ნორმების პროექტი“

– არ აქვს შემუშავებული და წარდგენილი ნარჩენების გეგმა;

– კომპანიამ ვერ უზრუნველყო სანიაღვრე წყლების შემკრები სისტემის მოწყობის ტექნიკური გადაწყვეტის წარდგენა სამინისტროში შესათანხმებლად.

საწარმოს მსგავსი სერიოზული დარღვევებით მუშაობა განსაკუთრებით საყურადღებოა იმ პირობებში, რომ 2017 წელს იგივე პროფილის საწარმო მარნეულში აფეთქდა. როგორც სამინისტროს მიერ მოწოდებულ ოქმშია აღნიშნული, საწარმოში ვიზიტი 15 და 18 აგვისტოს შემოსული ზარების საფუძველზე განხორციელდა. ვფიქრობთ, როცა კომპანიას იქამდეც აქვს დარღვევით მუშაობის ისტორია და მისმა გაუმართავმა წარმოებამ შეიძლება როგორც გარემოს, ისე საზოგადოებას უდიდესი ზიანი მოუტანოს, გარემოსდაცვითი ზედამხედველობის დეპარტამენტს მის შესამოწმებლად მოსახლეობის ზარები არ უნდა ჭირდებოდეს.

მასალა მომზადებულია პროექტის „ვიცავთ უფლებას სუფთა ჰაერზე რუსთავში“ ფარგლებში, რომელიც ხორციელდება „დემოკრატიის ევროპული ფონდის“ მხარდაჭერით