ჰაერის დაბინძურებამ ბანგლადეშელი მიგრანტი საფრანგეთიდან დეპორტაციას ‘გადაარჩინა’
ჰაერის დაბინძურებამ ბანგლადეშელი მიგრანტი საფრანგეთიდან დეპორტაციას ‘გადაარჩინა’
ცხოვრების უფლებაზე ნებართვის ვადის ამოწურვის შემდეგ, ბანგლადეშელი მიგრანტი საფრანგეთიდან გაძევებას გადაურჩა მას შემდეგ, რაც ადვოკატმა სასამართლოს განუცხადა, რომ მისი კლიენტი ასთმით იყო დაავადებული და ბანგლადეშში დაბრუნების შემთხვევაში, სადაც ჰაერის დაბინძურების დონე სახიფათოდ მაღალია, მისი მდგომარეობა გაუარესდებოდა და, შესაძლოა, ნაადრევი სიკვდილიც დამდგარიყო.
ამ არგუმენტის საფუძველზე, 2020 წლის დეკემბერში, ბორდოს სააპელაციო სასამართლომ 40 წლის კაცის მიმართ გააუქმა გაძევების ბრძანება. ეს იყო მსგავსი შინაარსის პირველი გადაწყვეტილება საფრანგეთის ისტორიაში.
ადვოკატის განმარტებით „სასამართლომ დაადგინა, რომ ჩემი კლიენტის სიცოცხლეს ბანგალდეშში ჰაერის დაბინძურების გამო საფრთხე შეექმნებოდა. ეს არის პირველი შემთხვევა, როცა ფრანგულმა სასამართლომ გარემო ერთ-ერთ კრიტერიუმად გაითვალისწინა გადაწყვეტილების მიღების პროცესში“.
იელისა და კოლუმბიის უნივერსიტეტების გარემოს მდგომარეობის შეფასების ინდექსის მიხედვით, 2020 წელს, ჰაერის ხარისხის მაჩვენებლით ბანგლადეში 179-ე ადგილს იკავებდა. ქვეყანაში ატმოსფერულ ჰაერში მყარი ნაწილაკების კონცენტრაცია ჯანდაცვის მსოფლიო ორგანიზაციის მიერ რეკომენდირებულ მაქსიმალურ დასაშვებ მაჩვენებელს 6-ჯერ აჭარბებს.
სასამართლომ ასევე გაითვალისწინა ის ფაქტი, რომ მედიკამენტები, რომელსაც კაცი საფრანგეთში იღებდა ხელმისაწვდომი არ იყო ბანგლადეშში, ამას გარდა, ბანგლადეშის ჯანდაცვის სისტემას საავადმყოფოში მხოლოდ ღამით შეეძლო, უზრუნველეყო ვენტილაციის მოწყობილობა, რომელიც ადამიანს ძილის აპნოესთვის ესაჭიროება.
სასამართლომ გაითვალისიწნა ისიც, რომ კაცის მამა ასთმით გარდაიცვალა 54 წლის ასაკში. ხოლო, მას შემდეგ, რაც მიგრანტმა საფრანგეთში დაიწყო მკურნალობა მისი სუნთქვის უნარი (respiratory capacity) 2013-2018 წლებში 58%-დან 70%-მდე გაიზარდა.
კაცი საფრანგეთში 2011 წელს ჩავიდა, მკურნალობის მიღების საფუძველზე მან 2015 წელს მიიღო ქვეყანაში ცხოვრების დროებითი ნებართვა. 2017 წელს ექიმებმა იმიგრაციის სამსახურს მიაწოდეს ინფორმაცია, რომ მისი სათანადო მკურნალობა ბანგლადეშშიც შეიძლებოდა, ხოლო 2 წელიწადში ადგილობრივმა პრეფექტურამ, ქვეყნიდან მისი გაძევების ბრძანება გასცა.
2020 წლის ივნისში ტულუზის პირველი ინსტანციის სასამართლომ გააუქმა დეპორტის ბრძანება, იმ მიზეზით, რომ კაცისთვის სამკურნალოდ საჭირო წამლები ბანგლადეშში ხელმისაწვდომი არ იყო. ბორდოს სასამართლომ კი სრულიად უარყო პრეფექტურის ბრძანება და განაცხადა, რომ გარემოს მდგომარეობის ფაქტორი აუცილებლად უნდა იყოს გათვალისწინებული.
ლონდონის ერთ-ერთი კოლეჯის ჰაერის დაბინძურების მეცნიერი, დოქტორი გარი ფიულერი, აცხადებს, რომ ეს იყო პირველი შემთხვევა, როდესაც ექსტრადაციის პროცესზე სასამართლომ გარემოს მდგომარეობის შესახებ არგუმენტი გადამწყვეტად მიიჩნია. ფიულერის აზრით, ამ შემთხვევამ მყარი საფუძველი შექმნა, დღის წესრიგში დამდგარიყო უფლება ჯანსაღ გარემოზე.
სტატიის პირველწყარო შეგიძლიათ, იხილოთ ბმულზე.
თარგმანი მოამზადა სამოქალაქო მოძრაობამ „გავიგუდეთ“ პროექტის „ვიცავთ უფლებას სუფთა ჰაერზე რუსთავში“ ფარგლებში, „დემოკრატიის ევროპული ფონდის“ ფინანსური მხარდაჭერით.