შეხვედრები ჭიათურის მუნიციპალიტეტის სოფლებში

შეხვედრები ჭიათურის მუნიციპალიტეტის სოფლებში

გუშინ, 20 სექტემბერს, სამოქალაქო მოძრაობა „გავიგუდეთ“ საზოგადოებრივი მოძრაობის – „მომავლის ჭიათურა“ და USAID-ის მიერ ჭიათურის მუნიციპალიტეტში დაგეგმილ ავტობუსის ტურზე იმყოფებოდა.

ტურში მონაწილეობას იღებდა 15-მდე არასამთავრობო ორგანიზაციების, სამოქალქო აქტივისტებისა და მედიის წარმომადგენლები.

ტურის ფარგლებში 5 სოფელში (რგანი, ხალიფაური, მღვიმევი, ზოდი, ითხვისი) მოვინახულეთ ეკოლოგიური კატასტროსფის ზონები; შევხვდით ადგილობრივ მოსახლეობას, რომლებმაც კიდევ უფრო დეტალურად აგვიხსნეს და დაგვანახეს მათ წინაშე არსებული პრობლემები, როგორ უწევთ ყოველდღიურად ბრძოლა საკუთარი საცხოვრებელი გარემოს დასაცავად, როგორ ‘იჭრება’ მომპოვებელი კომპანია პირდაპირ მათ ეზოებში და  უნადგურებს საცხოვრებელს.

აღნიშნულ სოფლებში მიმდინარეობს სამთო-მოპოვებითი სამუშაოები, როგორც ღია კარიერული წესით, ისე მაღაროებში. საკუთარი თვალით ვიხილეთ, სოფელ ითხვისში, მაღაროების მუშაობის შედეგად მიწაგამოცლილი და ჩამონგრეული სახლები. იქაურმა მოსახლეობამ გაგვიზიარა, რომ გარეთ გამოსვლის ეშინიათ,  ვინაიდან ყოველ წუთს ელიან, რომ მიწა ფეხქვეშ გამოეცლებათ.

ასევე, ვნახეთ რა მდგომარეობაშია ქარხნების ჩამონარეცხით დაბინძურებული მდინარე ყვირილა, რომელიც უკვე არა მდინარის, არამედ შლამის სახით მოედინება.

კარიერული მოპოვება ადამიანების ჯანმრთელობასაც შეუქცევად ზიანს აყენებს. თუმცა, ჭიათურის მოსახლეობას, პირველ რიგში, ბრძოლა უწევს საკუთარი სახლების, ეზოების, ბუნების შესანარჩუნებლად; ვინაიდან იჩეხება ტყეები, ნადგურდება ნიადაგის ნაყოფიერი ფენა, რომლის აღდგენისთვისაც მომპოვებელი კომპანია არაფერს აკეთებს. ნიადაგის განადგურების და გადათხრილი ტერიტორიების პრობლემა იმდენად მწვავედ დგას, რომ მოსახლეობა, მათი თქმით, სამუშაოების დასრულების შემდეგ უკვე მხოლოდ ადგილის მოსწორებასაც დასჯერდება, რათა შემდგომ თავად მაინც შეძლონ რეკულტივაცია(მიწის პროდუქტიულობის აღდგენა).

მიუხედავად იმისა, რომ სახელმწიფოსა და მომპოვებელი კომპანიებისთვის წინააღმდეგობის გაწევა ძალიან დიდი რესურსსა და დაუღალავ ბრძოლას მოითხოვს მოსახლეობა კვლავ ერთად, შეუპოვრად დგას საკუთარი სოფლების დასაცავად.

ტურის მონაწილეებმა ჭიათურის მოსახლეობას მხარდაჭერა კიდევ ერთხელ დავუდასტურეთ; ამ ადამიანების დასახმარებლად თანამშრომლობა კვლავ გაგრძელდება.

საინფორმაციო მასალა მოამზადა „ეკო ცენტრმა“ USAID-ის სამოქალაქო საზოგადოების ჩართულობის პროგრამის ფარგლებში. ამერიკის  შეერთებული შტატების საერთაშორისო განვითარების სააგენტოს (USAID) დაფინანსებით.

 მასალის შინაარსზე პასუხისმგებელია „ეკო ცენტრი“. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების მთავრობის შეხედულებებს.