საპროტესტო აქცია „ბოლო შანსი“
საპროტესტო აქცია „ბოლო შანსი“
5 ივნისს, 18:00 საათზე, რუსთავის მერიის წინ “გავიგუდეს “ორგანიზებით საპროტესტო აქცია გაიმართა. აქცია დაიწყო ფეხით მსვლელობით ე.წ. „პირამიდიდან“.
როგორც 5 ივნისს აქციაზე დავაანონსეთ, გარემოს დაცვისა და სოფლის მეურნეობის სამინისტროს მივწერეთ წერილი, რომლის გაცნობა და მხარდაჭერა აქციის თითოეულ მონაწილეს შეეძლო.
წერილს ჯამში 324-მა რუსთაველმა მოაწერა ხელი. თქვენი ხელმოწერები წერილთან ერთად სამინისტროს დანართის სახით გავუგზავნეთ.
მართალია, რომ 20 მოქალაქის მიერ გაგზავნილი იგივე შინაარსის წერილი სამინისტრომ ერთხელ უკვე დააიგნორა. თუმცა, იმედი გვაქვს რომ ამჯერად შედეგს თქვენი აქტიურობა და ჩართულობა გამოიღებს და 20 ივნისამდე დეტალურად გვეცოდინება რომელი საწარმო როდის შეძლებს ფილტრებისა და თვითმონიტორინგის სისტემების დაყენებას.
სამოქალაქო მოძრაობის „გავიგუდეთ“ მოთხოვნებია:
– აღსრულდეს ჰაერდაცვითი კანონმდებლობა, რომელიც ზუსტად 1 წელია რაც ძალაში შევიდა;
1 წლის წინ ამოქმედდა კანონი, რომლის მიხედვითაც რუსთავში 15 საწარმოს დაეკისრა დაბინძურების სტაციონარული წყაროებიდან მავნე ნივთიერებათა გაფრქვევების უწყვეტი ინსტრუმენტული თვითმონიტორინგის ვალდებულება. 14 აპრილის მდგომარეობით, ვალდებულებას 15-დან მხოლოდ 1 საწარმო ასრულებს (რომ აღარაფერი ვთქვათ ფილტრებზე, რომლებიც სულ სავალდებულო იყო, თუმცა რუსთავში მდებარე საწარმოების უმრავლესობას დღემდე არ აქვს).
– გამოაქვეყნოს სამინისტრომ გეგმა-გრაფიკი რომელ საწარმოს კონკრეტულად როდის ექნება ფილტრები და თვითმონიტორინგის სისტემა;
– სამოქალაქო სექტორი უფრო აქტიურად ჩართონ საწარმოებთან შეხვედრებში და გაზარდონ მოსახლეობისადმი ანგარიშვალდებულების ხარისხი;
– ჰაერის ხარისხის გაუმჯობესების სამუშაო ჯგუფი გახდეს უფრო ქმედითი (მათ შორის, რუსთავის მერიამ დროულად შეასრულოს საკუთარი პასუხისმგებლობები);
– გაიზარდოს საწარმოების კონტროლი და არაგეგმური ინსპექტირებების რიცხვი (2021 წელს ჯამში 44 საწარმოს 76 ინსპექტირება ჩატარდა, რომელთა უდიდესი ნაწილი დოკუმენტური და გეგმიური იყო. გეგმიური და დოკუმენტური შემოწმებები რეალურ სურათს არ იძლევა, ამიტომ მნიშვნელოვანია არაგეგმიური შემოწმებების გააქტიურება).
შეგახსენებთ, რომ მათ, ვინც აქციაში ფიზიკურად მონაწილეობა ვერ შეძელით, შეგიძლიათ შემოუერთდეთ ონლაინ პროტესტს და მხარდაჭერის ნიშნად გამოგვიგზავნოთ ფოტო ან ვიდეო მასალა.