სამუშაო ჯგუფის ფარგლებში შპს „ეი-ემ-ბი ალოისის“ სკოპინგის ანგარიშის განხილვა გაიმართა

სამუშაო ჯგუფის ფარგლებში შპს „ეი-ემ-ბი ალოისის“ სკოპინგის ანგარიშის განხილვა გაიმართა

16 აგვისტოს სამოქალაქო მოძრაობის „გავიგუდეთ“ ორგანიზებით ფეროშენადნობთა ქარხნის – შპს „ეი-ემ-ბი ალოისის“ სკოპინგის ანგარიშის განხილვის, კომენტარებისა და შენიშვნების მომზადების მიზნით სამუშაო ჯგუფის ფარგლებში შეხვედრა გაიმართა.

ამჟამად საწარმოს ტექნოლოგიური ხაზი უზრუნველყოფს ფეროსილიკომანგანუმის წარმოებას, თუმცა დაგეგმილი აქვს 75%-იანი ფეროსილიციუმის (FeSi) ახალი ტექნოლოგიური ხაზის მოწყობას და ექსპლუატაციას.

გარდა ახალი ხაზისა, დოკუმენტში განხილულია არსებულ საწარმოში შეტანილი ცვლილებები:

– შეიცვალა ფეროშენადნობის სადნობი ღუმელის ერთიანი გამწოვი მილის პარამეტრები (სიმაღლე და დიამეტრი);

– შეიცვალა წარმოების პროცესში წარმოქმნილი მეორადი პროდუქტის (წიდა) განთავსების პირობები, კერძოდ მისი დასაწყობების ადგილმდებარეობა;

– მცირედით შეიცვალა საწარმოს გენ-გეგმა, ანუ საწარმოო უბნების ურთიერთგანლაგება;

– ტერიტორიაზე გათვალისწინებულია სატრანსფორმატოროი ზეთების რეგენერაციის და აღდგენის დანადგარის გამოყენება, რაც გათვალისწინებული არ ყოფილა გარემოსდაცვითი გადაწყვეტილებით;

– ასევე გათვალისწინებულია სანიაღვრე წყლების მართვის მდგომარეობის გაუმჯობესება.

წარმოების შედეგად ატმოსფერულ ჰაერში გაიფრქვევა შემდეგი ნივთიერებები:  აზოტის დიოქსიდი, აზოტის ოქსიდი, ნახშირბადის ოქსიდი, გოგირდის დიოქსიდი, ნახშირწყალბადების ნავთის ფრაქცია, არაორგანული მტვერი.

სამუშაო ჯგუფის შეხვედრა დისტანციურ რეჟიმში გაიმართა და მას მოწვეული ტრენერი უძღვებოდა.  მიმდინარეობისას დეტალურად მიმოვიხილეთ სკოპინგის ანგარიში და მოვამზადეთ წერილობითი პოზიცია, სადაც ასახულია მოძრაობის შენიშვნები და რეკომენდაციები, რომელთაც როგორც გარემოს ეროვნულ სააგენტოს, ისე მოსახლეობას გავუზიარებთ.

შპს „ეი-ემ-ბი ალოისის“ დოკუმენტის საჯარო განხილვა ქ.რუსთავის მერიაში 18 აგვისტოს 13:00 საათზე შედგება და მასზე დასწრება ნებისმიერ მსურველს შეუძლია.

დოკუმენტი შეგიძლიათ იხილოთ ბმულზე.

შეხვედრა გაიმართა „დემოკრატიის ევროპული ფონდის“ ფინანსური მხარდაჭერით, პროექტის „ვიცავთ უფლებას სუფთა ჰაერზე“ ფარგლბში.