სამუშაო ჯგუფის ფარგლებში შპს „ფერო ელოის ფროდაქშენის“ გზშ ანგარიშის განხილვა გაიმართა

29 ივლისს, სამოქალაქო მოძრაობის „გავიგუდეთ“ ორგანიზებით მეტალურგიული (ფეროშენადნობთა) ქარხნის – შპს „ფერო ელოის ფროდაქშენის“ გარემოზე ზემოქმედების შეფასების ანგარიშის განხილვის, კომენტარებისა და შენიშვნების მომზადების მიზნით, მორიგი სამუშაო შეხვედრა გაიმართა.

შპს „ფერო ელოის ფროდაქშენს“ დაგეგმილი აქვს ფეროშენადნობების წარმოება (ფეროსილიკომანგანუმი), რისთვისაც სურს აგლომერაციის საწარმოს მოწყობა. საპროექტო ცვლილებების შესაბამისად, აგლომერაციის წარმოების მაქსიმალური საპროექტო სიმძლავრე შეადგენს დღეში 135, ხოლო წელიწადში 44550 ტონას, რომლის წარმოებისთვისაც მოწყობილი იქნება 15 შეცხობის 15 თეფში.

საწარმოს საქმიანობის შედეგად ატმოსფეროში გამოიყოფა მავნე ნივთიერებები, მათ შორის: არაორგანული მტვერი, სილიციუმის დიოქსიდი, ალუმინის ოქსიდი, კალციუმის ოქსიდი, მაგნიუმის ოქსიდი, აზოტის დიოქსიდი, ნახშირჟანგი, CO, ქრომი, გოგირდის დიოქსიდი, თუთიის ოქსიდი, ტყვია და მისი ნაერთები, ნიკელი მეტალური, კადმიუმის სულფატი, დარიშხანი, სპილენძის ოქსიდი, ვერცხლისწყალი, სელენი.

შეხვედრა დისტანციურ რეჟიმში მიმდინარეობდა და მას მოწვეული ტრენერი უძღვებოდა. ტრენერმა შეხვედრის მონაწილეებთან ერთად დეტალურად მიმოიხილა გზშ ანგარიში, მომზადდა დასაბუთებული შენიშვნები და რეკომენდაციები, რომლებსაც როგორც გარემოს ეროვნულ სააგენტოს, ისე მოსახლეობას გავუზიარებთ.

აღნიშნული დოკუმენტის საჯარო განხილვა 1 აგვისტოს 13:00 საათზე ქ.რუსთავის მერიაშია დაგეგმილი და დასწრება ნებისმიერ მსურველს შეუძლია.

ანგარიში შეგიძლიათ ჩამოტვირთოთ ამ ბმულიდან.

შეხვედრა გაიმართა „დემოკრატიის ევროპული ფონდის“ ფინანსური მხარდაჭერით, პროექტის „ვითხოვთ უფლებას სუფთა ჰაერზე“ ფარგლებში.