„გავიგუდეთ“ „სამრეწველო ემისიების შესახებ“ კანონპროექტის განხილვაზე იმყოფებოდა

„გავიგუდეთ“ „სამრეწველო ემისიების შესახებ“ კანონპროექტის განხილვაზე იმყოფებოდა

3 აგვისტოს, სამოქალაქო მოძრაობა „გავიგუდეთ“ გარემოს დაცვისა და სოფლის მეურნეობის სამინისტროში „სამრეწველო ემისიების შესახებ“ საქართველოს კანონის პროექტის გაცნობის მიზნით გამართულ შეხვედრას დაესწრო.

შეხვედრას ესწრებოდნენ სამინისტროსა და გარემოს ეროვნული სააგენტოს წარმომადგენლები, გარემოსდაცვითი კუთხით მომუშავე ორგანიზაციების წარმომადგენლები და დამოუკიდებელი ექსპერტები.

„სამრეწველო ემისიების შესახებ“ კანონი ქ.რუსთავის ატმოსფერული ჰაერის ხარისხის გაუმჯობესების სამოქმედო გეგმის მიხედვით 2021 წელს მიღებული უნდა ყოფილიყო, თუმცა ის პარლამენტში ამ დრომდე არ შესულა და მისი წარდგენა 2022 წლის საშემოდგომო სესიაზე იგეგმება.

ამ კანონის მიზანია სამრეწველო საქმიანობის შედეგად ატმოსფერულ ჰაერში, წყალში და მიწაში ემისიების პრევენცია ან სადაც ეს პრაქტიკულად შეუძლებელია, ემისიების შემცირება და კონტროლი, ასევე, ნარჩენების წარმოქმნის პრევენცია. კანონითვე იქნება განსაზღვრული ინტეგრირებული ნებართვის გაცემის წესი. სამრეწველო ემისიების პრევენციისა და კონტროლის სფეროში უფლებამოსილ ორგანოდ კი გარემოს ეროვნული სააგენტო განისაზღვრა.[1]

„სამრეწველო ემისიების შესახებ“ კანონით, სამრეწველო ობიექტებს ეკისრებათ არაერთი მნიშვნელოვანი ვალდებულება:

ა) დაბინძურების წინააღმდეგ ყველა სათანადო პრევენციული ღონისძიების გატარება;
ბ) საუკეთესო ხელმისაწვდომი ტექნიკის გამოყენება;

გ) მნიშვნელოვანი დაბინძურების გამოწვევის თავიდან აცილება;
დ) ნარჩენების მართვა კანონმდებლობით განსაზღვრული ნარჩენების მართვის იერარქიის შესაბამისად;
ე) ენერგიის ეფექტური გამოყენება;
ვ) აუცილებელი ზომების მიღება ავარიების შემდგომი გავრცელების თავიდან ასაცილებლად და სხვა შესაძლო ინცინდენტების/ავარიების პრევენციის მიზნით;

კანონპროექტის ხილვა შეგიძლიათ ბმულზე.

სიახლე მომზადდა „დემოკრატიის ევროპული ფონდის“ ფინანსური მხარდაჭერით, პროექტის „ვიცავთ უფლებას სუფთა ჰაერზე რუსთავში“ ფარგლებში.

[1] ამჟამინდელ კანონპროექტში უფლებამოსილ ორგანოდ წარმოდგენილია სამინისტრო, თუმცა დოკუმენტი უახლოს მომავალში განახლდება.