სამოქალაქო მოძრაობა „გავიგუდეთ“ ქუთაისელ აქტივისტებს შეხვდა

სამოქალაქო მოძრაობა „გავიგუდეთ“ ქუთაისელ აქტივისტებს შეხვდა

28 ოქტომბერს სამოქალაქო მოძრაობა „გავიგუდეთ“ ქუთაისელ აქტივისტებს შეხვდა.

ქუთაისში, ისევე როგორც რუსთავში, მოსახლეობა შეწუხებულია ჰაერის დაბინძურების პრობლემის გამო. მათ არაერთი აქცია გამართეს ჰაერის დაბინძურების წინააღმდეგ.

ქუთაისელი აქტივისტების თქმით, მეტალურგიული ქარხანა “ამბიკონ სტილსი” კვლავ აბინძურებს გარემოს და საფრთხეს უქმნის მათ ჯანმრთელობას. შესაბამისად, შეხვედრის ძირითადი მიზანი ჰაერის დაბინძურების წინააღმდეგ ბრძოლასთან დაკავშირებით გამოცდილების გაზიარება იყო.

შეხვედრაზე, ძირითადად, ჩვენ მიერ მომზადებული სარჩელი განვიხილეთ დეტალურად, ვისაუბრეთ მათი სამართლებრივი ბრძოლის შესაძლო ხერხებსა და ავტომატური ფონური სადგურის სათანადო მუშაობის აუცილებლობაზე.

შეგახსენებთ, რომ უკვე თვეზე მეტია, ატმოსფერული ჰაერის ხარისხის პორტალზე air.gov.ge ქუთაისის სადგური გამორთულია. პორტალზე ვკითხულობთ, რომ „ატმოსფერული ჰაერის ხარისხის მონიტორინგის ავტომატურ სადგურზე ტექნიკური ხარვეზის გამო დროებით შეზღუდულია სადგურის მონაცემებთან წვდომა“.

აქტივისტთა ჯგუფებს შორის ეს არ იყო პირველი კომუნიკაცია და Zoom შეხვედრას რამდენიმე სატელეფონო საუბარი უძღოდა წინ.

მოქალაქეების აქტიურობას უდიდესი ძალა აქვს და დიდი იმედი გვაქვს, რომ ჩვენ ყველა მალე შევძლებთ უკეთეს გარემოში ცხოვრებას.

შეხვედრა გაიმართა ამერიკის შეერთებული შტატების საერთაშორისო განვითარების სააგენტოს – USAID-ის სამოქალაქო საზოგადოების ჩართულობის პროგრამის ფარგლებში დაფინანსებული პროექტის „გარემოსდაცვითი ცნობიერებისა და სამოქალაქო აქტივიზმის ხელშეწყობა რუსთავში“ ფარგლებში.