რუსთაველებთან ერთად „გავიგუდეთ“ შპს „მეგა ცემენტის“ საჯარო განხილვას დაესწრო

რუსთაველებთან ერთად „გავიგუდეთ“ შპს „მეგა ცემენტის“ საჯარო განხილვას დაესწრო

28 იანვარს რუსთავის მერიაში ჩატარდა შპს „მეგა ცემენტის“ ცემენტის საწარმოს ექსპლუატაციის პირობების ცვლილების შესახებ გარემოზე ზემოქმედების შეფასების (გზშ) ანგარიშის საჯარო განხილვა.

საჯარო განხილვას „გავიგუდეთ“-ის წევრის გარდა, სხვა რუსთაველებიც დაესწრნენ, რომელთაც პროექტთან დაკავშირებით არაერთი კითხვა დასვეს. საჯარო განხილვის შესახებ ინფორმაცია მათ „გავიგუდეთ“-ის და „ეკო ცენტრის“ მეშვეობის შეიტყვეს.

რაც შეეხება დაგეგმილ საქმიანობას, კომპანია გეგმავს საწარმოს წარმადობის ზრდას წელიწადში 46 800 ტონიდან 204 000 ტონამდე. გაზრდილი წარმადობის პირობებში, საწარმო ნაცვლად 260 დღისა იმუშავებს 340 დღე წელიწადში. შესაბამისად, საწარმოში არსებული წისქვილი 15 ტ/სთ-ის ნაცვლად, იმუშავებს 25 ტ/სთ დატვირთვით. აქვე, აღსანიშნავია ის გარემოება, რომ საწარმოში წისქვილის შეცვლა არ იგეგმება და გამოყენებული იქნება არსებული წისქვილი, რომელიც კომპანიის მიერ გაიტესტა ერთჯერადად და დადგინდა, რომ შეუძლია გაზრდილი მოთხოვნების დაკმაყოფილება. საწარმოს მიერ წარმადობის გაზრდა განპირობებულია ქვეყანაში არსებულ გაზრდილ მოთხოვნაზე ცემენტისა და სამშენებლო მასალების მიმართ.

ამ პროექტთან დაკავშირებით მოქალაქეების მიერ გაჟღერებულ კომენტარებს თქვენც გთავაზობთ:

1. მოქალაქემ საწარმოს სთხოვა დაეზუსტებინა გაფრქვევების უწყვეტი მონიტორინგის საკითხი; როგორც საწარმოს ხელმძღვანელმა განაცხადა, არსებულ ოთხ სილოსს გააჩნია საერთო ჰაერ გამშვები მილი, რომელზეც დაყენებულია ერთი შემკრები მილი შესაბამისი ფილტრით. ხოლო, 3 ახალ სილოსს, (რომელთაგან 2 დამონტაჟებულია, ხოლო 1 ადგილზეა და დამონტაჟდება გზშ ანგარიშზე დადებითი გადაწყვეტილების მიღების შემთხვევაში) ინდივიდუალურად დაუყენდება ფილტრები ექსპლუატაციაში გაშვებამდე. სილოსებზე არსებული და სამომავლოდ დასამონტაჟებელი ფილტრების მტვერდაჭერის ეფექტურობაა 99.9%. ასევე, შეძენილი აქვთ დამატებითი, სათადარიგო ფილტრებიც. წისქვილზე ამჟამად არის დამონტაჟებული ფილტრები და თვითმონიტორინგის სისტემა, თუმცა, მისი ჩართვის ნებართვა გარემოსდაცვითი გადაწყვეტილების გარეშე არ აქვთ და გადაწყვეტილების შემდგომ საწარმო პროცესის დაწყებასთან ერთად ჩაირთვება უწყვეტ რეჟიმში.
2. კითხვაზე, თუ რამდენად გაუძლებს ძველი წისქვილი გაზრდილ საწარმოო დატვირთვას, გზშ ანგარიშის დასკვნის მიხედვით, კომპანიამ დაასაბუთა ძველი წისქვილის გამართულობა და წარმოადგინა საპასპორტო მონაცემები.
3. ასევე, კითხვაზე თუ რამდენად ხდება წყლის ზეთით დაბინძურების თავიდან აცილება, კომპანიამ განმარტა, რომ წყალი ზეთთან შემხებლობაში ვერ მოვა, რადგან ზეთის მოწყობილობაში აყენია საფილტრაციო სისტემა და ეს ორი ერთმანეთისგან დამოუკიდებელი სისტემაა. ამასთან, რისკების პრევენციის მიზნით, კომპანია გეგმავს მექანიკური სალექარების მოწყობას და სანიაღვრე არხებიდან წყლების ჩაშვება საწარმოს მიმდებარედ გამავალ მარინის არხში მოხდება აღნიშნული სალექარების გავლის შემდეგ.
4. ნარჩენების მართვასთან დაკავშირებულ შეკითხვაზე კომპანიამ აღნიშნა, რომ ხელშეკრულება აქვთ გაფორმებულ ორ კომპანიასთან, „სანიტარი“ და „მედიქალ ჯორჯია“, რომლებთან ერთადაც მოაგვარებენ ამ საკითხს. 5. ასევე კითხვაზე თუ რა გრაფიკით მოხდება საწარმოში ნედლეულის და საწარმოდან პროდუქციის გატანა, ხელმძღვანელების თქმით, ეს ოპერაციები განხორციელდება დღის განმავლობაში, რაც გზშ ანგარიშშიცაა მოცემული.

შეგახსენებთ, რომ „გავიგუდეთ“ მოხალისეობრივად მუშაობს, რადგან ვიაზრებთ ჯანსაღი გარემოსთვის ბრძოლის მნიშვნელობას. ყველა რუსთაველს მოვუწოდებთ, რომ თავადაც აიღონ პასუხისმგებლობა და დაიცვან საკუთარი უფლება – ისუნთქონ სუფთა ჰაერი. მომდევნო განხილვებზე, იმედი გვაქვს, კიდევ მეტი მოქალაქე შემოგვიერთდება: ამჯერად კი მადლობა ნინის, ქეთის, ეკატერინეს და ნინოს.