რომელი საწარმოები ასრულებენ გაფრქვევების უწყვეტი თვითმონიტორინგის ვალდებულებას?

რომელი საწარმოები ასრულებენ გაფრქვევების უწყვეტი თვითმონიტორინგის ვალდებულებას?

სამოქალაქო მოძრაობამ “გავიგუდეთ” 2022 წლის 14 იანვარს საჯარო ინფორმაციის მისაღებად განცხადებით მიმართა საქართველოს გარემოს დაცვისა და სოფლის მეურნეობის სამინისტროს. სამინისტროს ვთხოვეთ მოეწოდებინა ინფორმაცია იმ საწარმოების შესახებ, რომელთაც 2021 წლის 31 დეკემბრის მდგომარეობით შესრულებული ჰქონდათ მავნე ნივთიერებების ორგანიზებული გაფრქვევისას დაბინძურების სტაციონარული წყაროებიდან ატმოსფერულ ჰაერში გაფრქვევების ფაქტობრივი რაოდენობის ინსტრუმენტული მეთოდით უწყვეტად განსაზღვრის ვალდებულება. მარტივად რომ ვთქვათ, გვაინტერესებდა რომელ საწარმოებს აქვთ მილში დამონტაჟებული ე.წ. თვითმზომი, რომელიც გაფრქვევების შესახებ ონლაინ რეჟიმში და უწყვეტად აწვდის ინფორმაციას სამინისტროს.

ასევე, გვაინტერესებდა, რომელმა საწარმოებმა და როდის მიმართეს სამინისტროს გაფრქვევების უწყვეტი ინსტრუმენტული თვითმონიტორინგის ელექტრონულ სისტემაში რეგისტრაციის მიზნით; ამჟამად რომელი საწარმოები აწარმოებენ დაბინძურების სტაციონარული წყაროებიდან მავნე ნივთიერებათა გაფრქვევების უწყვეტ ინსტრუმენტულ თვითმონიტორინგს და რომელ დამბინძურებლებს ეხება ეს მონიტორინგი.

4 თებერვალს გარემოსდაცვითი ზედამხედველობის დეპარტამენტიდან ჩვენს კითხვებზე პასუხად მივიღეთ, რომ დაბინძურების სტაციონარული წყაროებიდან მავნე ნივთიერებათა გაფრქვევების უწყვეტი ინსტრუმენტული თვითმონიტორინგის ვალდებულება ქ.რუსთავში მოქმედი საწარმოებიდან შესრულებული აქვს მხოლოდ შპს “ემენ ქემიკალ ჯორჯიას“ (მანგანუმის ოქსიდის და მანგანუმის სულფატის წარმოება), რომელიც ახორციელებს უწყვეტ მონიტორინგს ორ დამბინძურებელზე: აზოტის ორჟანგსა (NO2) და ნახშირორჟანზე (CO), ასევე აირმტვერნარევის ტემპერატურის პარამეტრზე. როგორც პასუხიდან ირკვევა, 2022 წლის 28 იანვრიდან, საწარმოს მონაცემები უწყვეტად მიეწოდება სამინისტროს ელექტრონულ სისტემას. მართალია, დეპარტამენტს ჩვენს პირველ კითხვაზე პასუხი არ გაუცია, თუმცა მათი პასუხიდან ჩანს, რომ 2021 წლის 31 დეკემბრის მონაცემებით (კანონის ძალაში შესვლიდან 7 თვის შემდეგ) რუსთავში უწყვეტი ინსტრუმენტული თვითმონიტორინგის ვალდებულებას არ ახორციელებდა არც ერთი საწარმო.

დეპარტამენტის წერილში აგრეთვე აღნიშნული იყო, რომ ქ.რუსთავში მოქმედი საწარმოებიდან, ელექტრონულ სისტემაში დარეგისტრირების მიზნით, დეპარტამენტს მიმართა შემდეგმა ორმა კომპანიამ: 2021 წლის 30 ნოემბერს შპს “რუსთავის ფოლადმა“, რომელმაც რეგისტრაციისთვის სავალდებულო მოთხოვნებთან შეუსაბამობის გამო სისტემაში ჩართვაზე უარი მიიღო და  სს „რუსთავის აზოტმა“,  რომელმაც დეპარტამენტს 2021 წლის 31 დეკემბერს მიმართა და მის მიერ წარმოდგენილი ინფორმაცია და დოკუმენტაცია ამჟამად განხილვის პროცესშია.

პროექტი „ვიცავთ უფლებას სუფთა ჰაერზე რუსთავში“ ხორციელდება „დემოკრატიის ევროპული ფონდის“ მხარდაჭერით.