რეაგირება სს “რუსთავის აზოტის” გაფრქვევაზე

რეაგირება სს “რუსთავის აზოტის” გაფრქვევაზე

21 სექტემბერს საღამოს საათებში “რუსთავის აზოტიდან”დაფიქსირდა გამონაბოლქვი. ამის შესახებ ეცნობა გარემოსდაცვითი ზედამხედველობის დეპარტამენტს.

ჩვენ, ტრადიციულად, გამოვითხოვეთ ინფორმაცია (იხ. ფოტო N1) იმის შესახებ, თუ რა რეაგირება მოჰყვა დეპარტამენტის მხრდიან გამონაბოლქვთან დაკავშირებით შესულ ზარს. 4 ოქტომბერს მათგან პასუხი (იხ. ფოტო N2) მივიღეთ და, როგორც ირკვევა,”სატელეფონო შეტყობინების საფუძველზე, დეპარტამენტის შესაბამისი უფლებამოსილი პირების მიერ განხორციელდა სს “რუსთავის აზოტი”-ს საწარმოს ინსპექტირება. ინსპექტირების დროს საწარმოში, კერძოდ ამიაკის და ამონიუმის ნიტრატის (გვარჯილა) საამქროში, მიმდინარეობდა მუშა პროცესი. ამასთან, ინსპექტირების შედეგად არაორგანიზებული გაფრქვევის ფაქტი არ გამოვლინდა.”

მიუხედავად იმისა, რომ ინსპექტორების ვიზიტისას არაორგანიზებული გაფრქვევა არ დაფიქსირდა, ფაქტია, იმ საღამოს ინტენსიური გამონაბოლქვი იყო და ჩვენთვის ის უფრო მეტად საინტერესოა, ასეთი გაფრვევა ჯდება თუ არა ნორმაში, ამიტომ 5 ოქტომბერს, კვლავ მივმართეთ დეპარტამენტს დამაზუსტებელი წერილით (იხ. ფოტო N3) და ვკითხეთ, დააფიქსირა თუ არა იმ საღამოს საწარმოს თვითმონიტორინგის სისტემამ გადაჭარბება; დამატებით, ვთხოვეთ ამ მონაცემების მოწოდებაც.