რამდენი საწარმო ფუნქციონირებს რუსთავში?

რამდენი საწარმო ფუნქციონირებს რუსთავში?

„ქ.რუსთავის ატმოსფერული ჰაერის ხარისხის გაუმჯობესების სამოქმედო გეგმაში“, რომელიც 2020 წელს დაამტკიცა მთავრობამ, ვკითხულობთ, რომ სტაციონარული წყაროებიდან ატმოსფერულ ჰაერში მავნე ნივთიერებათა გაფრქვევების 2018 წლის ანგარიშის მიხედვით, ქ. რუსთავში დაფიქსირებულია მყარი ნივთიერებების გაფრქვევის 50 წყარო (აქედან 47 ძველ, ხოლო მხოლოდ 3 ახალ რუსთავში), რომელთა აბსოლუტური უმრავლესობა წარმოადგენს მეტალურგიულ, ქიმიურ, მინერალურ და სხვა სახის სამრეწველო ობიექტს.

რუსთავში არსებული საწარმოების და მათი ფუნქციონირების შესახებ სრული და განახლებული სურათის წარმოსადგენად, ჩვენმა მოძრაობამ საქართველოს გარემოს დაცვისა და სოფლის მეურნეობის სამინისტროს 2022 წლის 5 ოქტომბერს მიმართა წერილით რუსთავში რეგისტრირებული და ამჟამად მოქმედი საწარმოების სიისა და რაოდენობის მოწოდების მოთხოვნით.

2022 წლის 10 ნოემბერს გარემოსდაცვითი ზედამხედველობის დეპარტამენტმა გამოგვიგზავნა 2022 წლის მდგომარეობით, ქალაქ რუსთავის ტერიტორიაზე იდენტიფიცირებული გარემოსდაცვით გადაწყვეტილებას და გარემოსდაცვით ტექნიკურ რეგლამენტებს დაქვემდებარებული საწარმოების სია, მთლიანობაში – 161 ობიექტი.

რას გულისხმობს გარემოსდაცვითი გადაწყვეტილება? – ეს არის გარემოსდაცვითი შეფასების კოდექსის მე-13 მუხლის გათვალისწინებით გამოცემული აქტი, რომელიც გარემოზე ზემოქმედების შეფასებისადმი დაქვემდებარებული საქმიანობის განხორციელების სავალდებულო წინაპირობაა. თუ საქმიანობის განხორციელებისთვის საჭიროა გარემოსდაცვით გადაწყვეტილებაზე დამოკიდებული საქართველოს კანონმდებლობით გათვალისწინებული ლიცენზია/ნებართვა ან/და ასეთი ლიცენზიის/ნებართვის რომელიმე სტადიის დასრულება, აღნიშნული ლიცენზია/ნებართვა შეიძლება ძალაში შევიდეს ან/და ასეთი ლიცენზიის/ნებართვის შესაბამისი სტადია შეიძლება დასრულდეს მხოლოდ გარემოსდაცვითი გადაწყვეტილების გაცემის შემდეგ.

რას გულისხმობს გარემოსდაცვითი ტექნიკური რეგლამენტი – 2018 წლის 1 იანვრამდე დაწყებული, გარემოსდაცვითი შეფასების კოდექსის I და II დანართებით გათვალისწინებული საქმიანობები[1], რომლებიც არ მოიცავს „გარემოზე ზემოქმედების ნებართვის შესახებ“ საქართველოს კანონით გათვალისწინებულ ეკოლოგიური ექსპერტიზისადმი დაქვემდებარებულ საქმიანობებს, არ საჭიროებს გარემოსდაცვით გადაწყვეტილებას. აღნიშნულ საქმიანობებზე ვრცელდება გარემოსდაცვითი ტექნიკური რეგლამენტებით დადგენილი მოთხოვნები.

ვინაიდან ჩვენი ფოკუსი ამჟამად მიმართულია ატმოსფერული ჰაერის დამაბინძურებელ წყაროებზე, ამ სიიდან ამოვიღეთ ის საწარმოები, რომლებიც არ ფუნქციონირებს, მაგალითად, სოკოს საწარმო შპს „თეთრი ქუდი“, რომლისგან წამოსულ უსიამოვნო სუნს რუსთავის მოსახლეობა დიდი ხანი ებრძოდა; ასევე ის საწარმოები, რომელთაც ნაკლები გავლენა აქვთ ჰაერის დაბინძურების თვალსაზრისით (მაგ. ავტოგასამართი სადგურები).

გიზიარებთ რეგულირების ობიექტების სიას:

გარდა ამისა, ცალკე გთავაზობთ იმ 15 საწარმოს ჩამონათვალს, რომელთაც ჰქონდათ გარემოსდაცვითი გადაწყვეტილება, თუმცა ამ დროის მონაცემებით არ ფუნქციონირებენ:

სამინისტროს მიერ გამოგზავნილი დოკუმენტი უცვლელი სახით, შეგიძლიათ ჩამოტვირთოთ ამ ბმულიდან:

რეგულირების ობიექტები_რუსთავი_2022

[1] I დანართით გათვალსიწინებული საქმიანობები პირდაპირ ექვემდებარება გზშ პროცედურას, ხოლო II დანართით გათვალისიწნებული საქმიანობები გზშ პროცედურამდე ექვემდებარება სკრინინგის პროცედურას.

საინფორმაციო მასალა მოამზადა „ეკო ცენტრმა“ “ღია საზოგადოების ფონდის” მიერ მხარდაჭერილი  პროექტის “ადვოკატირება სუფთა ჰაერისთვის რუსთავში“ ფარგლებში.

ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდის პოზიციას. შესაბამისად, ფონდი არ არის პასუხისმგებელი მასალის შინაარსზე.