რა რეაგირება მოჰყვა „რუსთავის ფოლადსა“ და „რუსელოისში“ დაფიქსირებულ გაფრქვევას?

რა რეაგირება მოჰყვა „რუსთავის ფოლადსა“ და „რუსელოისში“ დაფიქსირებულ გაფრქვევას?

2022 წლის 23 ოქტომბერს საწარმოო ზონის მონიტორინგის შედეგად შპს „რუსელოისსა“ და შპს „რუსთავის ფოლადში“ საეჭვო გაფრქვევა დავაფიქსირეთ. ამის შესახებ დაუყოვნებლივ ვაცნობეთ გარემოსდაცვითი ზედამხედველობის დეპარტამენტს (გზდ). შემდეგ კი, გამოვითხოვეთ ინფორმაცია დეპარტამენტის მხრიდან გამონაბოლქვზე რეაგირების შესახებ.

როგორც გზდ-დან გამოგზავნილი ინფორმაციიდან ირკვევა, ზარის განმახორციელებლის მიერ აღწერილ გაფრქვევის სავარაუდო ადგილზე (მე-16-მე-18 პენიტენციურ დაწესებულებს შორის) ვიზიტის შედეგად დეპარტამენტის უფლებამოსილმა პირებმა გამოავლინეს შპს “რუსელოისის” კუთვნილი მეტალურგიული საწარმოს გაფრქვევის მილებიდან ატმოსფერული ჰაერის მავნე ნივთიერებებით დაბინძურების ფაქტი.

ამასთან, საწარმოს ინსპექტირების შედეგად დადგინდა, რომ გამწმენდი სისტემა იყო მუშა მდგომარეობაში, თუმცა ვერ უზრუნველყოფდა მავნე ნივთიერებების ეფექტურ გაწმენდას, გაფრქვევის ნორმების პროექტით გათვალისწინებული პარამეტრების შესაბამისად და ატმოსფერულ ჰაერში გაიფრქვეოდა შავი შეფერილობის აირმტვერნარევი. ადგილზე შედგა შესაბამისი აქტი.

გარდა ამისა, 2022 წლის 12 სექტემბრის ბრძანების საფუძველზე შპს “რუსელოის”-ის კუთვნილ ფეროშენადნობების საწარმოზე განხორციელდა გარემოსდაცვითი გადაწყვეტილების პირობებისა და გარემოს დაცვის სფეროში მოქმედი კანონმდებლობის შესრულების მდგომარეობის გეგმიური შემოწმება.

როგორც ზედამხედველობის დეპარტამენტის 10 ნოემბრის პასუხიდან ირკვევა, მიმდინარეობს ინსპექტირების მასალების კამერალური დამუშავება, ამ მასალებს დაერთვება 23 ოქტომბრის შემოწმების აქტიც და შპს “რუსელოისის” მიმართ გატარდება მოქმედი კანონმდებლობით განსაზღვრული პასუხისმგებლობის ზომები.

ჩვენი გუნდი აუცილებლად გამოითხოვს შესაბამის მასალებს აღნიშნული ინსპექტირების შესახებ და მოსახლეობას დეტალურ ინფორმაციას მიაწვდის.

23 ოქტომბერს “რუსთავის ფოლადსა” და “რუსელოისში” დაფიქსირებული გაფრქვევის ამსახველი ფოტოები:

შპს “რუსელოისი”                                                              შპს “რუსთავის ფოლადი”