გზდ-ის საქმიანობის კვლევის ანგარიშის პრეზენტაცია

გზდ-ის საქმიანობის კვლევის ანგარიშის პრეზენტაცია

დღეს, 17 ივლისს, გზდ-ის საქმიანობის კვლევის ანგარიშის პრეზენტაცია გაიმართა.

ანგარიში მომზადდა „ღია საზოგადოების ფონდის მხარდაჭერით“ პროექტის „ადვოკატირება სუფთა ჰაერისთვის რუსთავში“ ფარგლებში და მიზნად ისახავდა გარემოსდაცვითი ზედამხედველობის ეფექტურობის შეფასებას, რისთვისაც განხილული იქნა რუსთავის სამრეწველო ობიექტების საქმიანობის კონტროლის პრაქტიკა დეპარტამენტის მხრიდან.

კვლევა აღწერს გარემოსდაცვითი ზედამხედველობის სისტემას საქართველოში; კანონმდებლობას ატმოსფერული ჰაერის დაცვის შესახებ; დეპარტამენტის სტრუქტურას; კონტროლის სამსახურებს; დეპარტამენტის მიერ გარემოსდაცვით სამართალდარღვევათა საპრევენციოდ განხორციელებულ ღონისძიებებს; ინსპექტორების საქმიანობას. პარალელურად კი, გვთავაზობს გარემოსდაცვითი კანონაღსრულების საუკეთესო საერთაშორისო გამოცდილებას.

მოცემული საკითხების, მათ შორის, მთავარი სახელმწიფო ინსპექტორისგან მიღებული ინფორმაციის საფუძველზე კვლევა აანალიზებს და გამოკვეთს გარემოსდაცვითი ზედამხედველობის წინაშე არსებულ გამოწვევებს, რომელთა შორისაა, ჩატარებული ინსპექტირებების რაოდენობის არასაკმარისობა, ინსპექტორების ნაკლებობა, დეპარტამენტის ცხელ ხაზზე შესულ შეტყობინებებზე რეაგირების ეფექტურობა. გარდა ამისა, კვლევა რეკომენდაციების სახით გვთავაზობს არსებული გამოწვევების გადაჭრის გზებს და სამრეწველო ობიექტების შემოწმების შედეგად აღმოჩენილ სამართალდარღვევებზე რეაგირების პრაქტიკის ანალიზს.

პრეზენტაცია zoom პლატფორმის მეშვეობით გაიმართა. შეხვედრას ესწრებოდნენ გარემოსდამცველები, მათ შორის, გარემოსდაცვითი ექსპერტი; არასამთავრობო ორგანიზაციების, რუსთავის საკრებულოს წარმომადგენლები, პედაგოგები და დაინტერესებული მოქალაქეები. ღონისძიების პირველი ნაწილი დაეთმო ანგარიშის პრეზენტაციას, რომელსაც მკვლევარი მარიამ ხვედელიძე უძღვებოდა, ხოლო მეორე ნაწილი – დისკუსიასა და კითხვა-პასუხს. მონაწილეებმა არაერთი საინტერესო კითხვა დასვეს; ასევე გააჟღერეს თავიანთი მოსაზრებები.

ანგარიში სრული სახით შეგიძლიათ, იხილოთ ბმულზე.