„გავიგუდეთ“ შპს „რეციკლინგის“ გზშ ანგარიშის საჯარო განხილვას დაესწრო

„გავიგუდეთ“ შპს „რეციკლინგის“ გზშ ანგარიშის საჯარო განხილვას დაესწრო

დღეს, 26 აპრილს, ქ. რუსთავის მერიაში შპს „რეციკლინგის“ სახიფათო და არასახიფათო ნარჩენების წინასწარი დამუშავების და აღდგენის საწარმოს მოწყობა-ექსპლუატაციის პროექტის გზშ ანგარიშის საჯარო განხილვა გაიმართა.

შეხვედრას სამოქალაქო მოძრაობა „გავიგუდეთ“, კომპანიის, გარემოს ეროვნული სააგენტოს, რუსთავის მერისა და საკრებულოს წარმომადგენლები ესწრებოდნენ.

აღნიშნული განხილვის შესახებ ინფორმაცია ჩვენმა გუნდმა წინასწარ მიაწოდა მოსახლეობას (იხ. პოსტი)

კომპანია მიზნად ისახავს, მოაწყოს საწარმო, რომელიც განახორციელებს შემდეგ ოპერაციებს:

–  ნარჩენების შეგროვება;

– ტრანსპორტირება;

– დროებითი შენახვა;

– წინასწარი დამუშვება;

– აღდგენა.

საწარმოს დაგეგმილი აქვს:

– ალუმინის ჯართის გადამუშავება და თერმული მეტალურგიით სუფთა ალუმინის მიღება;

– ელექტროკაბელების ნარჩენების გადამუშავება მეორადი ნედლეულის მასალის მიღების მიზნით;

– ალუმინ-პოლიმერის მოსაპირკეთებელი ნარჩენების გადამუშვება მეორადი ნედლეულის მასალის მიღების მიზნით;

– ნამუშევარი ზეთის ფილტრების ნარჩენების გადამუშავება მეორადი ნედლეულის მასალის მიღების მიზნით;

– წუნდებული/მწყობრიდან გამოსული საყოფაცხოვრებო ელექტრონული მოწყობილობების ნარჩენების გადამუშავება მეორადი ნედლეულის მასალის მიღების მიზნით;

– ალუმინის ქილების ნარჩენების გადამუშვება მეორადი ნედლეულის მასალის მიღების მიზნით;

– მანქანების ნამუშევარი ზეთების ნარჩენების გადამუშავება ზეთების ხელახალი გამოყენების მიზნით;

– მწყობრიდან გამოსული საბურავების გადამუშავება მეორადი ნედლეულის მასალის მიღების მიზნით;

– ხე-ტყის მასალის დამუშვებიდან წარმოქმნილი ნარჩენების გადამუშვება და პალეტების წარმოება;

– ხის ნახშირის წარმოება.

როგორც კომპანიის წარმომადგენლებმა საჯარო განხილვაზე განმარტეს, ვინაიდან საწარმოო პროცესი დნობის ეტაპს მოიცავს, საწარმოს აქვს თვითმონიტორინგის ვალდებულება და კომპანიას თურქულ მწარმოებელთან აქვს შეთანხმება უწყვეტი მონიტორინგის ხელსაწყოს მოწოდებასთან დაკავშირებით. თუმცა, რაც შეეხება აირმტვერდამჭერ მოწყობილობებს/ფილტრებს – ეს საკითხი არც გზშ ანგარიშშია დაზუსტებული და ვერც შეხვედრაზე მივიღეთ პასუხი, როგორც ირკვევა, ამ ეტაპზე ფილტრაციის სისტემის მონტაჟი განხილული არ არის.

ასევე დაუზუსტებელია, როგორც სანიაღვრე სისტემის მოწყობის საკითხი, ისე ნარჩენი საწარმოო წყლების მართვის საკითხი.

საჯარო განხილვაზე საკონსულტაციო კომპანიის წარმომადგენელმა განმარტა, რომ ამ საკითხებს საწარმოსთან ერთად კიდევ ერთხელ განიხილავენ და დააზუსტებენ.