„გავიგუდეთ“ შპს „ელბა ექსპორტის“ გზშ ანგარიშის საჯარო განხილვას დაესწრო
„გავიგუდეთ“ შპს „ელბა ექსპორტის“ გზშ ანგარიშის საჯარო განხილვას დაესწრო
დღეს, 31 მაისს, ქ.რუსთავის მერიაში შპს “ელბა ექსპორტის“ კირისა და კომბინირებული სასუქის საწარმოს მოწყობა-ექსპლუატაციის პროექტზე გზშ ანგარიშის საჯარო განხილვა გაიმართა.
შეხვედრას ესწრებოდნენ სამოქალაქო მოძრაობა „გავიგუდეთ“, საწარმოს, საკონსულტაციო კომპანიის, გარემოს ეროვნული სააგენტოს, რუსთავის მერიის, საკრებულოს და მარის არხის დასახლების წარმომადგენლები. გარდა ამისა, საჯარო განხილვაზე მე-18 სკოლის ეკო კლუბის წევრებიც შემოგვიერთდნენ.
საჯარო განხილვის შესახებ ინფორმაცია ჩვენმა გუნდმა წინასწარ მიაწოდა მოსახლეობას (იხ. პოსტი).
შპს “ელბა ექსპორტი” აწარმოებს კირს და გეგმავს კიდევ ერთი ქარხნის მშენებლობას კომბინირებული სასუქის წარმოებისათვის, რომელიც მიიღება სხვადასხვა მზა სასუქებისა და მინერეალების შერევით. წლის მანძილზე დაგეგმილია 86400 ტონა კომბინირებული სასუქის წარმოება.
წარმოდგენილი პროექტის ფარგლებში დაგეგმილია კირის და კომბინირებული სასუქის გადამამუშავებელი საწარმოს მოწყობა, რომლის ფარგლებში დაგეგმილია ორი ერთეული შენობის მშენებლობა დამხმარე ინფრასტრუქტურით.
ქარხანაში მოხდება სხვადასხვა სახის კომბინირებული სასუქის წარმოება და ეს იქნება დამოკიდებული წლის კონკრეტულ პერიოდში, რომელი სასუქი არის მოთხოვნადი. შესაბამისად კომპანიამ უნდა აწარმოოს სხვა და სხვა სახის სასუქი. აქვე უნდა აღინიშნოს, რომ რეალიზაციის კუთხით კომპანიას მემორანდუმის დონეზე შეთანხმება აქ, როგორც საქართველოში არსებულ ორ უმსხვილეს სასუქების დილერთან, ასევე სასომხეთში პარტნიორ კომპანიასთან.
გზშ ანგარიშსა და საჯარო განხილვაზე წარმოდგენილ ინფორმაციაზე დაყრდნობით, აღნიშნული საწარმოო ციკლი გამართულია და დახურულ სივრცეში მიმდინარეობს; შესაბამისად, საწარმოს ფუნქციონირების შედეგად მნიშვნელოვნად უარყოფითი გავლენა მოსალოდნელი არ არის. იმედი გვაქვს, ეს ასეც იქნება და საწარმო სტანდარტების დაცვით იფუნქციონირებს.
დაგეგმილი პროექტის მიხედვით, საწარმოს ექნება ორგანიზებული გაფრქვევის 3 წყარო და თითოეულზე იგეგმება 99,8%-იანი ეფექტურობის სახელოიანი ფილტრების დამონტაჟება.
გარდა ამისა, საწარმოს წარმომადგენლებმა შეხვედრაზე აღნიშნეს, რომ საწარმოს პერიმეტრზე იგეგმება მწვანე საფარის მოწყობაც.