„გავიგუდეთ“ საკრებულოს წარმომადგენლებს შეხვდა

„გავიგუდეთ“ საკრებულოს წარმომადგენლებს შეხვდა

დღეს, 19 დეკემბერს, „გავიგუდეთ“ საკრებულოს წარმომადგენლებს შეხვდა. შეხვედრის მიზანი იყო ჰაერის დაბინძურების პრობლემის კუთხით არსებული რეალობის მიმოხილვა და ადგილობრივ დონეზე გასატარებელი ღონისძიებების შესახებ მსჯელობა.

შეხვედრის ფარგლებში, ჩვენ გუნდმა, პრეზენტაციის სახით დეტალურად გააცნო საკრებულოს ჰაერის დაბინძურების გავლენა გარემოსა და ადამიანის ჯანმრთელობაზე, ვისაუბრეთ რუსთავში არსებული ძირითადი დამაბინძურებლების მახასიათებლებზე, ამ მდგომარეობოთ არსებულ მიღწევებსა და გამოწვევებზე და ჰაერის დაბინძურების ეკონომიკური ხარჯზე. გარდა ამისა, ცხრილის სახით წარვუდგინეთ ინფორმაცია რუსთავში მოქმედი იმ რეგულირების ობიექტების თვითმონიტორინგის სისტემის დამონტაჟების ვადების გეგმა-გრაფიკის შესახებ, რომელთაც ეს ვალდებულება კანონმდებლობის მიხედვით, 2021 წლის 1 ივნისიდან აქვთ, და რომელთა უმრავლესობა ჯერ კიდევ არაა სამინისტროს ერთიან ელექტრონულ ბაზაში ჩართული.

დამატებით, ჩვენი მხრიდან შევთავაზეთ ჩართულობის შესაძლებლობები, რაც მოიცავდა, მაგალითად, საწარმოების ტექნიკური დოკუმენტების საჯარო განხილვებზე დასწრებას, ჰაერის ხარისხის გაუმჯობესების სამოქმედო გეგმის განხორციელების მონიტორინგს, ასევე ცენტრალური ზონის ატმოსფერული ჰაერის ხარისხის გეგმაზე მუშაობაში ჩართულობას და მოსაზრებების გაზიარებას.

– საკრებულოს წევრების მხრიდან დაფიქსირდა სრული მზადყოფნა თანამშრომლობის გზების შემუშავებაში, მათი მხრიდან გაჟღერდა იდეებიც ჩართულობის შესახებ. მაგალითად, მზაობა გამოთქვეს, საკრებულოს მხრიდან დაინიშნოს პირი, რომელიც ჩვენთან ითანამშრომლებს და ინფორმაციის გაცვლისათვის მუდმივად გვექნება მასთან კომუნიკაცია.

– ასევე, გაჟღერდა ეკოლოგიური ფორუმის იდეა, ყველა დაინტერესებული მხარის ჩართულობით – მუნიციპალიტეტი, საწარმოების წარმომადგენლები, სამოქალაქო მოძრაობა „გავიგუდეთ“, საკრებულო – ამ ჯგუფის მიზანი იქნება კონკრეტული ნაბიჯებით გაწერილი გრძელვადიანი გეგმის შემუშვება ქალაქში არსებული ჰაერის დაბინძურების პრობლემის მოსაგვარებლად. ჩვენ, ჩვენი მხრიდან შევთავაზეთ ის ინფორმაციული რესურსი, რომელიც ამ საკითხთან დაკავშირებით ჩვენს გუნდს გააჩნია.

– გამოითქვა მოსაზრება საკრებულოს წევრების სამუშო ჯგუფებად დაყოფის შესახებაც, რომლებიც შესაბამისი დელეგირების საფუძველზე პასუხისმგებელნი იქნებიან სამოქმედო გეგმით გათვალისწინებული აქტივობების განხორციელების კონტროლზე, საზოგადოების ინფორმირებასა თუ საწარმოების ტექნიკური დოკუმენტების განხილვებში მონაწილეობაზე.

გვიხარია, რომ დღევანდელი შეხვედრა ნაყოფიერი გამოდგა, საკრებულოს წევრებმა თავადაც აღნიშნეს რომ ჩვენგან ღირებული ინფორმაცია მოისმინეს ჰაერის დაბინძურების პრობლემის შესახებ. შეხვედრაზევე გამოიკვეთა ადგილობრივ დონეზე კონკრეტული ნაბიჯების და ქმედებების გაწერის საჭიროება და, საკითხის სიმწვავიდან გამომდინარე, ამ პროცესების დაუყოვნებლივ დაწყების აუცილებლობა.

იმედი გვაქვს, საკრებულოსთან მჭიდრო კოორდინაცია გაგრძელდება და დღევანდელ შეხვედრაზე გაჟღერებული იდეები რეალურად განხორციელდება უფრო ქმედითი და კონკრეტული მიზნებისა და ნაბიჯების გაწერის საფუძველზე.