“გავიგუდეთ“ მე-11 საჯარო სკოლის მოსწავლეებს შეხვდა

დღეს, 31 მაისს სამოქალაქო მოძრაობა „გავიგუდეთ“ მე-11 საჯარო სკოლის მე-9 კლასის მოსწავლეებს შეხვდა.

მე-11 სკოლა ერთ-ერთია იმ სკოლებიდან, სადაც დარგული ხეებისთვის სარწყავი სისტემა მოვაწყვეთ. სკოლაში დარგული 270 ნერგიდან, მხოლოდ 14 გახმა, რაც ფაქტობრივად გახარების 100%-იან მაჩვენებელს უტოლდება. არაერთხელ აღგვინიშნავს, რომ იმისთვის, რომ გამწვანების შედეგი მდგრადი იყოს, ნერგების დარგვასთან ერთად აუცილებელია მათი მუდმივი მეთვალყურეობა და მოვლა, ამიტომ გვინდა მადლობა გადავუხადოთ სკოლის ადმინისტრაციას, რომელიც სისტემატურად ზრუნავს ნერგებზე.

პრეზენტაციისას ჩვენმა გუნდმა ჰაერის ხარისხის კუთხით რუსთავში არსებულ პრობლემებზე, მიღწევებზე და ამჟამინდელ გამოწვევებზე ისაუბრა.

მოსწავლეები აქტიურად იყვნენ ჩართულები დისკუსიაში და ძალიან საინტერესო კითხვებიც დაგვისვეს. მიუხედავად იმისა, რომ ჩვენი საქმიანობის შესახებ მოსწავლეების ნაწილმა უკვე იცოდა, იმედი გვაქვს, დღევანდელი პრეზენტაციის შემდეგ უფრო აქტიურად ჩაერთვებიან პრობლემასთან ბრძოლაში, მათ შორის,5 ივნისის აქციაზეც შემოგვიერთდებიან.

პროექტი „თანამშრომლობა მწვანე რუსთავისთვის“ ხორციელდება გლობალური გარემოსდაცვითი ფონდის მცირე გრანტების პროგრამის (GEF SGP) ფინანსური მხარდაჭერით, რომელსაც საქართველოში გაეროს განვითარების პროგრამა (UNDP) ახორციელებს.