“გავიგუდეთ” კომენტარები “რუსთავის აზოტის” სკრინინგზე – რა გაითვალისწინა სააგენტომ ანგარიშის დახარვეზებისას?

“გავიგუდეთ” კომენტარები “რუსთავის აზოტის” სკრინინგზე – რა გაითვალისწინა სააგენტომ ანგარიშის დახარვეზებისას?

გასულ კვირას გარემოს ეროვნულმა სააგენტომ დაახარვეზა  სს „რუსთავის აზოტის“ ქიმიური საწარმოს ექსპლუატაციის პირობების ცვლილების პროექტის შესახებ სკრინინგის ანგარიში, რომელიც შეეხებოდა საწარმოში დაბალი სიმკვრივის ამონიუმის გვარჯილის გრანულაციის საწარმოო ხაზის მოწყობას. (საწარმოს ტერიტორიაზე განთავსებული უმოქმედო ბლოკის საწარმოს ნაცვლად მცირე წარმადობის ბეტონის ქარხნის მოწყობას)

ეს ანგარიში ჩვენმა გუნდმაც განიხილა და მომზადებული კომენტარები/კითხვები სააგენტოს გავუგზავნეთ.

ჩვენი ორგანიზაციის მიერ მომზადებულ შენიშვნებში ყურადღება გავამახვილეთ რამდენიმე კრიტიკულ საკითხზე, მათ შორის:

– შლამშემკრებში შეგროვებული შლამისა და მოცილებული ზეთის მართვის საკითხი;

– დაბინძურებული ჩამდინარე წყლების გაუწმენდავად საკანალიზაციო სისტემაში ჩაშვების საკითხი

– ძველი ინფრასტრუქტურის დემონტაჟის საჭიროების შემთხვევაში, ამ პროცესის განხორციელების საკითხი;

– ვაგონებისა და ავტოტრანსპორტის რეცხვის შედეგად წარმოქმნილი ნარეცხი წყლების მართვის საკითხის დაზუსტება;

– ფილტრაციის სისტემის გაწმენდის ეფექტურობის შესახებ მონაცემების არარსებობა

როგორც სამინისტროს ხარვეზის წერილიდან ირკვევა, დოკუმენტის დახარვეზებისას მათ ნაწილობრივ გაიზიარეს ჩვენი კომენტარები დაგეგმილ საქმიანობასთან დაკავშირებით, კონკრეტულად:

– სააგენტო ითხოვს ინფორმაციის დაზუსტებას ამონიუმის გვარჯილის საამქროში წარმოქმნილი საწარმოო-ჩამდინარე წყლების წარმოქმნისა და შემდგომი მართვის შესახებ, ექსპლუატაციის პირობების ცვლილების გათვალისწინებით.

გარდა ამისა, სააგენტოს ხარვეზის წერილში გამოყოფილია შემდეგი საკითხები, რაზეც სს „რუსთავის აზოტმა“ უნდა წარადგინოს დამატებითი ინფორმაცია:

– ამონიუმის ნიტრატის სინთეზის რეაქტორები: სააგენტო ითხოვს ინფორმაციას ამ რეაქტორების შესახებ, რადგან ისინი არ არის ასახული გზშ-ის ანგარიშსა და გარემოსდაცვით გადაწყვეტილებაში.

– ექსპლუატაციის პირობების ცვლილებით მოსაწყობი დანადგარები: სააგენტო ითხოვს ინფორმაციას ყველა ახალი დანადგარის შესახებ (რაოდენობა, პარამეტრები და ა.შ.), შესაბამის გენ-გეგმასთან ერთად;

– დამატებით მოსაწყობი პროდუქციის დასაწყობების უბანი: სააგენტო ითხოვს ინფორმაციას ამ უბნის შესახებ, მისი ტევადობის მითითებით.

აქდან გამომდინარე, გარემოს ეროვნული სააგენტო კანონმდებლობის შესაბამისად სკრინინგის გადაწყვეტილების გაცემის მიზნით ადმინისტრაციულ წარმოებას დაიწყებს  სს „რუსთავის აზოტის“ მიერ მითითებული შენიშვნების გათვალისწინებით შესწორებული სკრინინგის განცხადების წარმოდგენის შემდეგ.

მასალა მომზადებულია USAID-ის საჯარო მმართველობის პროგრამის ფინანსური მხარდაჭერით