არასამთავრობო სექტორის შეხვედრა რუსთავის მერთან
არასამთავრობო სექტორის შეხვედრა რუსთავის მერთან
ფოტო: რუსთავის მერია
გუშინ, 8 ნოემბერს, რუსთავის მერი არასამთავრობო ორგანიზაციების წარმომადგენლებს შეხვდა. შეხვედრას, რომელიც დემოკრატიული ჩართულობის ცენტრში გაიმართა, ესწრებოდა სამოქალაქო მოძრაობა „გავიგუდეთ“.
შეხვედრაზე მერმა 2022 წლის ანგარიში წარადგინა, განხორციელებული პროექტები და პროგრამები გაგვაცნო და სამომავლო გეგმებზეც ისაუბრა.
შეხვვედრა კითხვა-პასუხის რეჟიმში გაიმართა. სხვადასხვა ორგანიზაციის წარმომადგენლებმა მათთვის სასურველ საკითხებზე და ქალაქში არსებულ პრობლემებზე მერს არაერთი კითხვა დაუსვეს. მათ შორის, გვინდა, გაგიზიაროთ ჩვენი გუნდის მიერ დასმული კითხვები:
– პირველ რიგში, წამოვწიეთ საწარმოო ზონაში არსებული მოუწესრიგებელი გზის ამტვერების პრობლემა, რომელიც მტვრის ძალიან დიდი წყაროა. ჩვენ, რუსთავის მერიაში წერილიც გავგზავნეთ, რათა გაგერკვია გეგმავდა თუ არა მუნიციპალიტეტი 2 ყველაზე პრობლემური მონაკვეთის რეაბილიტირებას და ამ პროცესში საწარმოების ჩართვას. თუმცა, მერიიდან ჩვენთვის გამოგზავნილი პასუხი და ის პასუხი, რაც მათ გარემოს დაცვისა და სოფლის მეურნეობის სამინისტროს გაუგზავნეს არ ემთხვევა ერთმანეთს და 3 სექტემბერს გაგზავნილ დამაზუსტებელ წერილზე პასუხი კვლავ არ მიგვიღია.
ამ საკითხთან დაკავშირებით, მერმა აღნიშნა, რომ პრობლმა მართლაც დგას და საწარმოების წარმომადგენლებთან თანამონაწილეობის ფორმის შეთავაზება მიმდინარეობს, რათა ბიზნესიც აქტიურად ჩაერთოს და თავიანთ საწარმოებამდე მისასვლელი გზები მოაწესრიგონ.
– ჩვენმა გუნდმა არაერთხელ გამოთქვა სურვილი და ამ შეხვედრაზეც გააჟღერა, რომ მერიასთან ჩვენი აქტიური კომუნიკაცია სასარგებლო იქნება ქალაქში მდგომარეობის გასაუმჯობესებლად; ჩვენი ფოკუსი მიმართულია ერთ კონკრეტულ საკითხზე, და, შესაძლოა, ამ საკითხთან დაკავშირებით ჩვენი რესურსი ბევრად მეტი იყოს, რადგან ჰაერის დაბინძურების პრობლემასთან დაკავშირებით დეტალურად ვეცნობით ყველა ეტაპზე მიმდინარე მოვლენებს, მაგალითად, მერისთვის უცხო იყო ის პროცენტული მაჩვენებელი, რაც 2022 წელს რუსთავის მერიის მიერ ჰაერის ხარისხის გაუმჯობესების სამოქმედო გეგმის შესრულების პროგრესს ასახავს. ჩვენი კომენტარი შეეხებოდა იმას, რომ გეგმის შესრულებაში ისეთი პრობლემური ქალაქის მერია, როგორიც რუსთავია, უნდა იყოს მოწინავე და სამაგალითო სხვა განმახორციელებელ უწყებებთან შედარებით.
რატომღაც რუსთავის მერმა იფიქრა, რომ ეს პროცენტები ჩვენმა გუნდმა თვითნებურად გამოითვალა, მაშინ როდესაც, ეს ინფორმაცია სამინისტროს მიერ გამოქვეყნებულ პროგრესანგარიშში ამოვიკითხეთ. სამინისტროს მიერ მომზადებული ანგარიში სრულად შეგიძლიათ, იხილოთ ამ ბმულზე; ხოლო ჩვენ მიერ მომზადებული სეფასება ანგარიშთან დაკავშირებით იხილეთ ამ ბმულზე.
გარდა ამისა, ხაზი გავუსვით იმასაც, რომ საწარმოების გზშ დოკუმენტების საჯარო განხილვებზე მერიის წარმომადგენელი უმეტესწილად ფორმალურად შემოდის და კითხვასაც არ სვამს.
ამასთან დაკავშირებით, მერმა აღნიშნა, რომ ამ საკითხს გადახედავს და თუ საქმისადმი გულგრილობას ჰქონდა ადგილი, ეს პრობლემა გამოსწორდება.
– ჩვენი კითხვა ეხებოდა ასევე, რუსთავის ცენტრალური და ახალგაზრდობის პარკის რეკრეაციული დატვირთვის გაზრდას და ახალი ხე-მცენარეების დამატებას ისე, როგორც ეს თავდაპირველ პროექტშია გათვალისწინებული.
მერის განმარტებით, გამწვანების პროცესი კვლავ გაგრძელდება, და, გარდა ამისა, დაგეგმილია ჭალის ტყის აღდგენაც შვედეთის მხარდაჭერით, ამ საკითხზე მუშაობა ამ ეტაპზე მიმდინარეობს. ასევე, მისასალმებელია, ის ფაქტი, რომ კვლევის საფუძველზე იგეგმება სპეციალური დოკუმენტის შექმნა, რომელიც ასახავს რუსთავის ნიადაგისა და კლიმატისთვის შესაფერისი მცენარეების ნუსხას და მოიცავს მათი დარგვის სახელმძღვანელოს. ასევე, იგეგმება ქალაქში ტექნიკური წყლის სარწყავად გამოყენების პროექტის განხორციელება, რაც ქალაქის გამწვანებისთვის მნიშვნელოვანი წინ გადადგმული ნაბიჯი იქნება.
– ჩვენთვის ასევე საინტერესო იყო ნარჩენების სეპარირებული შეგროვებისა და ნაგავსაყრელის საკითხი.
მერმა აღნიშნა, რომ მერია ცდილობს, ქალაქში აქტიურად დანერგოს ნარჩენების სეპარირებული შეგროვების პრაქტიკა, ახალ სკვერებში ამისათვი სპეციალური, სეპარირებული ურნებიც დგას; თუმცა ამ ეტაპზე ქალაქს აქვს ნაგავსაყრელის პრობლემა, არსებული ნაგავსაყრელი იხურება და მუშობა მიმდინარეობს ახალ ნაგავსაყრელზე გადასვლაზე.
პრობლემას წარმოადგენს როგორც მოსახლეობის მიერ ნარჩენების სეპარირებულად შეგროვება, ისე სეპარირებულად შეგროვებული ნარჩენების ერთად მოხვედრა.
გარდა ამისა, მნიშვნელოვანია, რომ მერმა გამოთქვა სურვილი, მომდევნო კვირას შევხვდეთ და მიმოვიხლოთ ის აქტივობები, რომლებიც მუნიციპალიტეტის დონეზე ჰაერის ხარისხის გაუმჯობესების კუთხით განხორციელდა.
ამ შეხვედრის შესახებ დეტალებს აუცილებლად გაგიზიარებთ.
შეგახსენებთ, რომ „გავიგუდეთ“ არის თანამშრომლობაზე ორიენტირებული სამოქალაქო მოძრაობა. შესაბამისად, იმედი გვაქვს, მერიის მხრიდან ქმედითი და თანამშრომლობითი ნაბიჯები გააქტიურდება (რისი დანაკლისიც ნამდვილად იყო), რათა უფრო სწრაფად შევძლოთ ჰაერის დაბინძურების კუთხით ქალაქში არსებული პრობლემის გადაჭრა.