COVID-19 და ჰაერის დაბინძურება

არსებული პანდემიის პირობებში არაერთი კვლევა გამოქვეყნდა სადაც აღნიშნული იყო, რომ კორონა ვირუსი განსაკუთრებით მძიმე შედეგებით გამოირჩევა ისეთ რეგიონებში, სადაც ჰაერი არის ძალიან დაბინძურებული.

ჩვენ ვიცით, რომ ჰაერის დაბინძურება აზიანებს არაერთ ორგანოს, განსაკუთრებით კი ფილტვებს და ასუსტებს იმუნურ სისტემას, ამიტომ მოულოდნელი არც არის, რომ ყველაზე მეტად დაბინძურებულ რეგიონში მცხოვრებლები ყველაზე მოწყვლადი არიან კორონავირუსის მიმართ, რადგან მსგავს რეგიონებში მცხოვრებ ადამიანებს უკვე აქვთ სუსტი სასუნთქი სისტემა ან არიან განსაკუთრებული რისკის ქვეშ. შესაბამისად, ვინაიდან კორონა ვირუსის ერთ-ერთ სიმპტომს წარმოადგენს რესპირატორული სისტემის დარღვევები, ამ ჯგუფებში დაავადება უფრო მძიმედ მიმდინარეობს. ეს კიდევ ერთი დამატებითი მიზეზია, რომ შევამციროთ ჰაერის დაბინძურება და თავი დავაღწიოთ ზედმეტ გართულებებს.

ასევე, საინტერესოა, რომ ამ პერიოდში ჩატარებული კვლევის მიხედვით, PM2.5-ის 1მკგ/მ³-ით ზრდა დაკავშირებულია COVID-19-ით გარდაცვალების მაჩვენებლის 8%-იან ზრდასთან. რუსთავში კი PM2.5-ის საშუალო წლიური მაჩვენებელი დაახლოებით 8მკგ/მ³-ით აჭარბებს ზღვრულად დასაშვებ ნორმას, რაც ძალიან მაღალი მაჩვენებელია. შესაბამისად, როდესაც ჰაერის დაბინძურების გამო სხეული ქრონიკულ რესპირატორულ სტრესშია, ინფექციებისგან თავის დაცვის უნარი მცირდება.