„გავიგუდეთ“ გირჩევთ ფილმს „სახლი”
„გავიგუდეთ“ გირჩევთ ფილმს „სახლი”
“მომისმინე, გთხოვ, შენც ჩემსავით ჰომო საპიენსი ხარ, გონიერი ადამიანი. სიცოცხლე, სასწაული სამყაროში, დაახლოებით 4 მილიარდი წლის წინ გაჩნდა, ჩვენ, ადამიანები კი 200 000 წლის წინ. ამის მიუხედავად, მივაღწიეთ იმას, რომ გაგვენადგურებინა ბალანსი, რომელიც ასე მნიშვნელოვანია სიცოცხლისათვის. ყურადღებით მოუსმინე ამ არაორდინალურ ისტორიას, რომელიც შენზეა და გადაწყვიტე, რისი გაკეთება გსურს“
ასე იწყება ცნობილი ფრანგი ფოტოგრაფის, იან არტუს-ბერტრანდის (Yann Arthus-Bertrand) დოკუმენტური ფილმი „სახლი“, რომელიც გარემოზე ადამიანის დამანგრეველი გავლენის შესახებ გვიყვება.
მთხრობელი, გლენ ქლოუზი (Glenn Close) ფოტოგრაფის მიერ გადაღებული საოცარი კადრების ფონზე გვიყვება დედამიწის დაბადების, მისი განვითარების, აყვავებისა და აწ უკვე განადგურების ძალიან საინტერესო ამბავს.
მოგეხსენებათ, კლიმატის ცვლილებაზე უამრავი დოკუმენტური ფილმია გადაღებული, თუმცა “სახლი” მხოლოდ პოლარულ დათვებზე ან ამაზონის ტყეების გაჩანაგებაზე როდი გვიყვება. ფოტოგრაფი ციმბირის გაყინული ტბების, იორდანიის მდინარის, ტროპიკული ტყეების და პირუტყვების ბალახობასთან ერთად, ლოს ანჯელესის გადატვირთულ გზებს, დუბაისა და ჩინეთის ცათამბრჯენებს გვიჩვენებს. მოგვითხრობს, თუ რა სწრაფად გარდაიქმნა მსოფლიო ჩვენი ჩარევის შედეგად. მაგალითად, ფილმის მეშვეობით ვიგებთ, რომ ზემოთ აღნიშნული ცათამბრჯენების ადგილას სულ რაღაც 40 წლის წინ სათევზაო სოფელი იყო.
ფილმი იმითაცაა გამორჩეული, რომ ავტორი მხოლოდ პრობლემაზე კი არა, უფრო დიდ სურათზე კონცენტრირდება. ბევრი ფილმი გვინახავს არსებულ სიტუაციაზე, მაგრამ ეს უკანასკნელი პასუხს გვცემს არა მხოლოდ კითხვაზე „რა ხდება?“ არამედ გვიხსნის თუ რატომ და როგორ ახდენს გავლენას ადამიანის ქმედებები ჩვენს ერთადერთ სახლზე – დედამიწაზე.
ფილმში უამრავ საინტერესო ფაქტს და სტატისტიკას გაეცნობით. გთავაზობთ ზოგიერთ მათგანს:
– მსოფლიო რესურსების 80%-ს მოსახლეობის 20% მოიხმარს
– მსოფლიო 12-ჯერ უფრო მეტ თანხას ხარჯავს სამხედრო ხარჯებზე, ვიდრე განვითარებადი ქვეყნების დახმარებაზე
– დაბინძურებული სასმელი წყლის მიღების გამო დღეში 5,000 ადამიანი იღუპება
– 1 მილიარდ ადამიანს არ აქვს წვდომა სუფთა სასმელ წყალზე
– დაახლოებით 1 მილიარდი ადამიანი შიმშილობს
– მსოფლიოში გაყიდული მარცვლეულის 50%-ზე მეტი ცხოველთა კვებისა და ბიოსაწვავისთვის გამოიყენება
– სახნავი მიწის 40% გრძელვადიანადაა დაზიანებული
– ყოველწლიურად ტყის 13 მილიონი ჰექტარი უჩინარდება
– გადაშენების პირასაა: ყოველი 4 ძუძუმწოვრიდან 1, 8 ჩიტიდან ერთი, 3 ამფიბიიდან 1.
– სახეობები მათ ბუნებრივ რიტმზე 1000-ჯერ უფრო სწრაფად იღუპებიან
– სათევზაო ტერიტორიის ¾ ამოწურულია ან მცირდება
– ბოლო 15 წლის საშუალო ტემპერატურა ყველაზე მაღალია, ვიდრე ოდესმე დაფიქსირებულა
– ყინულის საფარი 40 წლის წინანდელთან შედარებით, 40%-ით უფრო თხელია
– 2050 წლისთვის სულ მცირე 200 მილიონი ეკო მიგრანტი იარსებებს
ფილმი ოთხ ენაზე, მათ შორის ქართულადაცაა ხელმისაწვდომი.
მასალა მოამზადა სამოქალაქო მოძრაობამ “გავიგუდეთ” აღმოსავლეთ–დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის მომზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. მასალის შინაარსზე პასუხისმგებელია “გავიგუდეთ”. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.