„გავიგუდეთ“ გირჩევთ ფილმს „წყალდიდობამდე“
„გავიგუდეთ“ გირჩევთ ფილმს „წყალდიდობამდე“
დღეს პარასკევია და “გავიგუდეთ” გირჩევთ National Geographic-ის ძალიან საინტერესო ფილმს კლიმატის ცვლილებაზე: Before the Flood (“წყალდიდობამდე“). დოკუმენტური ფილმის აღმასრულებელი პროდუსერი მარტინ სკორსეზეა. ფილმის ერთ-ერთი მთავარი გმირი კი ლეონარდო დიკაპრიო.
ფილმი მნიშვნელოვან აქცენტებს სვამს, მათ შორის:
კლიმატის ცვლილება არ არის მხოლოდ გარემოს დაცვის საკითხი და პირდაპირ უკავშირდება სახელმწიფო უსაფრთხოებას. პენტაგონმაც უსაფრთხოების საკითხად დაასახელა ეს პრობლემა. როდესაც რესურსები მცირდება, ადამიანებს და სახელმწიფოებს შორის იწყება კონფლიქტი ამ რესურსების გადანაწილებისთვის;
ადამიანებმა უნდა გავიაზროთ, რომ გადაწყვეტილებები, რომლებსაც ჩვენ ყოველდღიურად ვიღებთ, მათ შორის, ის არჩევანი, რასაც სუპერმარკეტებში პროდუქციის ყიდვისას ვაკეთებთ, გავლენას ახდენს ჩვენს პლანეტაზე;
ფინანსური თვალსაზრისით თუ შევხედავთ, 2060 წლისთვის კლიმატის ცვლილება გადასახადის გადამხდელებს 44 ტრილიონი ამერიკული დოლარი დაგვიჯდება.
და ღარიბები იქნებიან ყველაზე პირველები, ვისზეც ყველაზე მეტად იმოქმედებს კლიმატის ცვლილება. არადა, მათ ყველაზე ნაკლები წვლილი მიუძღვით კლიმატის ცვლილებაში.
ფილმი ხაზს უსვამს ინფორმაციის სათანადოდ გააზრების მნიშვნელობასაც. მართალია, ადრეც გადაშენებულან ცხოველები, მაგრამ სხვაობა ისაა, რომ ჩვენ ახლა ამას უკვე გააზრებულად ვაკეთებთ. ვიცით, რომ ეკოსისტემას ვანადგურებთ, მაგრამ არ გვადარდებს. ეს იმის ბრალია, რომ სათანადოდ არ ვაცნობიერებთ პრობლემას.
ჩვენს გვერდზეც უთქვამთ რამდენიმეჯერ, აქ წერას რა აზრი აქვსო. თუმცა, უნდა გვესმოდეს, რომ როდესაც ხალხს მონაცემებს და ინფორმაციას აძლევ, ამით მათ აძლიერებ, უბიძგებ გააზრებისა და მოქმედებისკენ, რაც მნიშვნელოვანი ნაბიჯია ცვლილებისკენ.
ფილმი იხილეთ ბმულზე.
მასალა მოამზადა სამოქალაქო მოძრაობამ “გავიგუდეთ” აღმოსავლეთ–დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის მომზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. მასალის შინაარსზე პასუხისმგებელია “გავიგუდეთ”. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.