„გავიგუდეთ“ გირჩევთ ფილმს „ეამბორე მიწას“
„გავიგუდეთ“ გირჩევთ ფილმს „ეამბორე მიწას“
დღეს ჩვენი გუნდი გაგაცნობთ 2020 წლის ნეტფლიქსის დოკუმენტურ ფილმს „ეამბორე მიწას“ (Kiss the Ground).
დასაწყისში მთხრობელი, ვუდი ჰარელსონი საკმაოდ პესიმისტურად და უიმედოდაა განწყობილი, რაც ფილმში მოყვანილი არაერთი საინტერესო სტატისტიკის ფონზე, გასაკვირი სულაც არაა.
იცოდით, რომ მსოფლიო მიწების 2/3 ნოყიერი ნიადაგის ნაცვლად, მხოლოდ უსარგებლო, გამომშრალი მტვერია? ამის გამო კი ყოველწლიურად 40 მილიონამდე ადამიანს უწევს საკუთარი სახლის დატოვება. ნავარაუდებია, რომ ეს რიცხვი 2050 წლისთვის ერთ მილიარდსაც კი მიაღწევს.
გაერთიანებული ერების ორგანიზაციის მიხედვით, მთელი მსოფლიოს ნიადაგის ზედა, ნოყიერი ფენა 60 წელში სრულად გაქრება, მარტივად რომ ვთქვათ, დედამიწას მხოლოდ 60 მოსავალიღა აქვს დარჩენილი.
როცა კლიმატის ცვლილებაზე ვსაუბრობთ, ძირითადად, ვკონცენტრირდებით ხოლმე განახლებად ენერგიასა თუ სათბური აირების ემისიების შემცირებაზე. 1750 წლიდან, სასოფლო სამეურნეო რევოლუციის დაწყებიდან დღემდე ატმოსფეროში ადამიანის ქმედებების შედეგად 1000 მილიარდი ტონა ნახშირორჟანგი გამოიყო. დღეს, მთლიანად რომ შევწყვიტოთ სათბური აირების ემისია, სამწუხაროდ, ატმოსფეროში უკვე არსებული ნახშირორჟანგი არსად წავა.
მაშინ, რაში მდგომარეობს გამოსავალი? დაიჯერებთ, თუ გეტყვით, რომ გამოსავალი არც ახალ ტექნოლოგიებსა და არც ძვირადღირებულ ინოვაციებში არაა, არამედ საუკუნეების განმავლობაში უკვე არსებულ, მარტივ მექანიზმში?
რა მოხდება, თუ ჩვენ ატმოსფეროში არსებულ ნახშირორჟანგს მცენარეების საშუალებით მიწაში დავაბრუნებთ? ამ პროცესს ბიო სეკვესტრირება (bio sequestration) ეწოდება და მისი საშუალებით, 30 წელიწადში გლობალური დათბობის შედეგების მკვეთრი შემცირებაა შესაძლებელი.
ამ მექანიზმს სოფლის მეურნეობაში რეგენერაციულ, აღდგენით მეურნეობასაც უწოდებენ, რომლის მთავარი მიზანია ხელოვნური სასუქების გარეშე, ბუნებრივი ნივთიერებებით მიწის გაჯერება და, შესაბამისად, ჯანსაღი მოსავლის მოყვანა. 1 აკრ მიწაზე ბუნებრივი ნივთიერებების მხოლოდ 1% ზრდით შესაძლებელია ათი ტონით უფრო მეტი ნახშირორჟანგის ნიადაგში დაბრუნება.
ფერმერებისთვის ამას მხოლოდ ეკოლოგიური მნიშვნელობა არ აქვს, ფილმში აღნიშნულია, რომ ამერიკელ ფერმერებს საკუთარი მოგების ყოველწლიურად 100 მილიარდი დოლარით ზრდა შეუძლიათ თუ ისინი რეგენერაციულ მეურნეობაზე გადავლენ.
ფილმში ვხვდებით არაერთ წარმატებულ მაგალითს არა მხოლოდ ამერიკის სხვადასხვა შტატიდან, არამედ ზიმბაბვედან, ჰაიტიდან და ჩინეთიდან, თუ როგორ მუშაობს აღნიშნული მექანიზმი პრაქტიკაში.
გარდა ფერმერებისა, ფილმში საუბარია იმაზეც თუ რისი გაკეთება შეგვიძლია ჩვენ – თითოეულ ინდივიდს – იქნება ეს კომპოსტირება, მწვანე საკვებით მდიდარი კვება თუ სხვა.
ვუდი ჰარელსონის გარდა ფილმში შეხვდებით ჟიზელ ბუნდჰენს, ტომ ბრეიდისა და იენ სომერჰოლდერს. ასე რომ, წინ საინტერესო საათ-ნახევარი გელით და იმედია, რაღაც-რაღაცებზე ჩვენთან ერთად დაფიქრდებით.
ფილმის ხილვა შეგიძლიათ ბმულზე.
მასალა მოამზადა სამოქალაქო მოძრაობამ “გავიგუდეთ” აღმოსავლეთ–დასავლეთის მართვის ინსტიტუტის (EWMI) ACCESS-ის პროექტის ფარგლებში. მასალის მომზადება შესაძლებელი გახდა ამერიკელი ხალხის მხარდაჭერის შედეგად ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. მასალის შინაარსზე პასუხისმგებელია “გავიგუდეთ”. ის შესაძლოა არ გამოხატავდეს EWMI-ს, USAID-ის ან/და ამერიკის შეერთებული შტატების შეხედულებებს.