რუსთავის წინაშე არსებული გამოწვევებისა და სამომავლო გეგმების შესახებ რუსთავის ჭალებში შეხვედრა გაიმართა
რუსთავის წინაშე არსებული გამოწვევებისა და სამომავლო გეგმების შესახებ რუსთავის ჭალებში შეხვედრა გაიმართა
ხუთშაბათს, 28 ოქტომბერს, რუსთავის ჭალების ტერიტორიაზე გაიმართა შეხვედრა, რომელსაც საქართველოს გარემოს დაცვისა და სოფლის მეურნეობის მინისტრი, რუსთავის მაჟორიტარი დეპუტატი საქართველოს პარლამენტში და ასევე, რუსთავის მერობის კანდიდატი ნინო ლაცაბიძე, საპარლამენტო უმრავლესობის წევრები და ადგილობრივი საწარმოების წარმომადგენლები დაესწრნენ. შეხვედრას ესწრებოდნენ სამოქალაქო მოძრაობის „გავიგუდეთ“ წევრებიც.
ნინო ლაცაბიძემ ხაზი გაუსვა, რომ საკანონმდებლო ჩარჩოს არსებობის მიუხედავად, კანონის აღსრულება სათანადოდ ვერ ხერხდება შესაბამისად და სამინისტროს მოუწოდა ოპერატიულობისკენ. ასევე, ერთ-ერთ პრობლემად დაასახელა ინფორმაციული ვაკუუმი და ხაზი გაუსვა საინფორმაციო პლატფორმის არსებობის საჭიროებას, სადაც მოსახლეობა თავად ნახავდა, თუ რა ეტაპზეა ესა თუ ის პროცესი.
შეგახსენებთ, რომ 1-ლი ივნისიდან ძალაში შევიდა კანონი, რომლის მიხედვითაც საწარმოებს ახალი ვალდებულებები უჩნდებათ, მათ შორის, ინსტრუმენტული გაზომვის მექანიზმის მონტაჟი. აღნიშნული მექანიზმი ამ დრომდე არც ერთ საწარმოს არ აქვს, შესაბამისად, ყოველდღიურ რეჟიმში არღვევენ კანონს. აღნიშნული გარემოს დაცვისა და სოფლის მეურნეობის მინისტრმა, ლევან დავითაშვილმაც დაადასტურა. მინისტრმა აღსრულების საკითხთან დაკავშირებით განაცხადა, რომ ის დებს პირობას, თუ საწარმოები მოთხოვნების შესრულების გარეშე განაგრძობენ მუშაობას, მათი საქმიანობა აუცილებლად შეჩერდება 2022 წლის იანვრიდან.
მან ასევე მოუწოდა ქარხნების წარმომადგენლებს, რომ რაც შეიძლება სწრაფად შეუერთდნენ თვითმონიტორინგის პლატფორმას, რათა გამარტივდეს დამბინძურებელი სუბიექტის მყისიერი გამოვლენა.
„გავიგუდეთ“ მიიჩნევს, რომ სახელმწიფო სათანადოდ არ რეაგირებს საწარმოების მხრიდან კანონდარღვევებზე და კანონის ამოქმედებიდან მხოლოდ 7 თვის მერე მისი აღსრულება დაგვიანებულია.
ჩვენი გუნდი განაგრძობს საწარმოო ზონის მონიტორინგს, სხვადასხვა დოკუმენტების შესწავლას და მიმდინარე სიახლეების მოსახლეობისთვის გაზიარებას.