რუსთავის N9 საჯარო სკოლის ეზოს გამწვანება იწყება

პროექტის „თანამშრომლობა მწვანე რუსთავისთვის“ ფარგლებში „გავიგუდეთ“ სხვადასხვა აქტორის ჩართულობით ამწვანებს რუსთავის ორ საგანმანათლებლო დაწესებულებას. „მოდუსზე“ უკვე გესაუბრეთ, ახლა კი მე-9 სკოლის შესახებ მოგიყვებით. პროექტის დეტალები შეგიძლიათ იხილოთ ამ ბმულზე.

გამწვანებისთვის მე-9 საჯარო სკოლის შერჩევა რამდენიმე ფაქტორმა განაპირობა: სკოლა ძველ რუსთავში, საწარმოებთან საკმაოდ ახლოს მდებარეობს. შესაბამისად, მე-9 სკოლის ეზოს გამწვანებით ჩვენს წვლილს შევიტანთ ამ ტერიტორიაზე არსებული განსაკუთრებულად რთული ეკოლოგიური ვითარების გაუმჯობესებაში. ასევე, მნიშვნელოვანი ფაქტორი სკოლის მოსწავლეები იყვნენ – სკოლაში აქვთ “ეკო კლუბი”, რომლის წევრებიც აქტიურად იყვნენ ჩართული როგორც მე-20, ისე 24-ე სკოლის გამწვანებაში; მოდიოდნენ ჩვენთან საწარმოო ზონაში ტურებზე და სხვადასხვა ღონისძიებაზე ძალიან აქტიურობდნენ. ამ მოსწავლეებმა საქმით დაამტკიცეს და მოიპოვეს ჩვენი ნდობა, რომ დარგულ ხეებს აუცილებლად მიხედავენ და აქტიურად ჩართავენ სკოლის გარშემო მაცხოვრებლებსაც. აღსანიშნავია სკოლის განსაკუთრებით მოტივირებული ადმინისტრაცია და მასწავლებლები.

ჩვენ, „ეკო ცენტრთან“ და „კედართან“ ერთად უკვე არაერთი შეხვედრა გავმართეთ სასკოლო საზოგადოებასთან, ვისაუბრეთ არამხოლოდ პროექტის დეტალებზე, არამედ ზოგადად გარემოს დაცვის საკითხებზე, მათ შორის ჰაერის დაბინძურებაზე, გამწვანების მნიშვნელობაზე და ა.შ.

პროექტის მიზანია რუსთავის გამწვანების მიზნით, ხელი შეუწყოს სხვადასხვა სექტორს შორის თანამშრომლობას. შესაბამისად, გამწვანების აქციაში ჩართულობის შესაძლებლობა ნებისმიერ მსურველს ექნება, არ აქვს მნიშვნელობა იქნება ეს კერძო პირი, ორგანიზაცია, საჯარო სექტორი თუ სხვ.

პროექტი ხორციელდება გლობალური გარემოსდაცვითი ფონდის მცირე გრანტების პროგრამის (GEF SGP) მხარდაჭერით, რომელსაც საქართველოში გაეროს განვითარების პროგრამა (UNDP) ახორციელებს.