მოძრაობამ „გავიგუდეთ“ რუსთავის მეტალურგიული ქარხნის გზშ ანგარიში შეისწავლა

მოძრაობამ „გავიგუდეთ“ რუსთავის მეტალურგიული ქარხნის გზშ ანგარიში შეისწავლა

2 ოქტომბერს, სამოქალაქო მოძრაობის „გავიგუდეთ“ ორგანიზებით გაიმართა სამუშაო ჯგუფის შეხვედრა რუსთავის ერთ-ერთი მთავარი დამბინძურებლის შპს „რუსთავის ფოლადის“ ექსპლუატაციის პირობების ცვლილებასთან დაკავშირებული გზშ დოკუმენტის განხილვის, კომენტარებისა და შენიშვნების მომზადების მიზნით.

შეხვედრას, რომელიც კვლავ დისტანციურად ჩატარდა, უძღვებოდა ორგანიზაციის მიერ მოწვეული ტრენერი. სამუშაო ჯგუფს კი შეადგენდნენ მოძრაობის აქტივისტები, მოხალისეები და „გავიგუდეთ“-ის მიერ უკვე განხორციელებული ტრენინგის მონაწილეები.

შეხვედრის ფარგლებში დეტალურად განვიხილეთ გზშ დოკუმენტი და მოვამზადეთ შესაბამისი შენიშვნები და კომენტარები.

შპს „რუსთავის ფოლადის“ ექსპლუატაციის ცვლილებასთან დაკავშირებული გზშ დოკუმენტის საჯარო განხილვა დანიშნულია 8 ოქტომბერს, 14:00 საათზე ქალაქ რუსთავის მერიაში (იხ. ბმული 1და ბმული 2). განხილვაზე დასწრების უფლება ნებისმიერ ადამიანს აქვს.

ჩვენ აუცილებლად დავესწრებით ამ შეხვედრას და მომზადებულ კომენტარებს შეხვედრის მიმდინარეობისას გავაჟღერებთ. საჯარო განხილვის შემდეგ კი, ჩვენ მიერ მომზადებულ შენიშვნებსა და კომენტარებს გავუგზავნით საქართველოს გარემოს დაცვისა და სოფლის მეურნეობის სამინისტროს და მოსახლეობას უცვლელად გავუზიარებთ ამ დოკუმენტს.

პროექტი „ვიცავთ უფლებას სუფთა ჰაერზე რუსთავში“ ხორციელდება „დემოკრატიის ევროპული ფონდის“ მხარდაჭერით.