„გავიგუდეთ“ კოლეჯ „მოდუსის“ სტუდენტებს შეხვდა

„გავიგუდეთ“ კოლეჯ „მოდუსის“ სტუდენტებს შეხვდა

20 და 21 ოქტომბერს სამოქალაქო მოძრაობა „გავიგუდეთ“ კოლეჯ „მოდუსის“ სტუდენტებს შეხვდა. აქტივობა საინფორმაციო ხასიათს ატარებდა. ორგანიზაციის პრეზენტაცია შეეხებოდა როგორც „გავიგუდეთ“-ის ძირითად საქმიანობას, მიზნებს, მიმდინარე თუ  განხორციელებულ აქტივობებს, მიღწეულ შედეგებს, ასევე, რუსთავის ეკოლოგიურ პრობლემებსა და გამწვანების მნიშვნელობას. მსმენელების განსაკუთრებული ყურადღება მიიქცია რუსთავში არსებული საწარმოების რაოდენობამ, დარღვევების სიმწვავემ და ჰაერის დაბინძურების ხარისხის მიმართულებით არსებულმა რეალობამ. ისინი აქტიურად იყვნენ ჩართულები პროცესში და  არაერთი საინტერესო კითხვა დასვეს.

პრეზენტაციის მეორე ნაწილი შეეხებოდა კოლეჯის ეზოს გამწვანების დეტალებს. სტუდენტებს ვაჩვენეთ ჩვენი არქიტექტორის მიერ მომზადებული რენდერები, გავაცანით „ქრაუდფანდინგის“ პირობები, ავუხსენით მისი მნიშვნელობა და პროექტის სხვა დეტალებიც გავუზიარეთ. საპასუხოდ მათ გამოთქვეს დაგეგმილ აქტივობებში მონაწილეობის ღია მზაობა.

შეხვედრის ბოლოს „გავიგუდეთ“-სა და კოლეჯ „მოდუსს“ შორის დაიდო ურთიერთთანამშრომლობის მემორანდუმი, რაც შესაძლებლობას მოგვცემს განვამტკიცოთ ჩვენი მეგობრული ურთიერთობები, განვახორციელოთ ერთობლივი პროექტები, რათა ხელი შევუწყოთ ქალაქ რუსთავის გამწვანებას, მდგრადი ურბანული გადაწყვეტილებების პოპულარიზაციას, ცნობიერების ამაღლებას და, ამ გზით, ატმოსფერული ჰაერის ხარისხის გაუმჯობესებას.

მადლობას ვუხდით „მოდუსს“, მის არაჩვეულებრივ გუნდსა და სტუდენტებს მასპინძლობისთვის. სწორედ მათი აქტიურობისა და გულისხმიერების, მათი მეგობრობისა და გვერდში დგომის შედეგად შევძლებთ ერთად დავრგოთ 250-მდე ნერგი და მოვუაროთ მათ, რათა კიდევ ერთი რეკრეაციული სივრცე ვაჩუქოთ რუსთავს.

პროექტი „თანამშრომლობა მწვანე რუსთავისთვის“ ხორციელდება გლობალური გარემოსდაცვითი ფონდის მცირე გრანტების პროგრამის (GEF SGP) მხარდაჭერით, რომელსაც საქართველოში გაეროს განვითარების პროგრამა (UNDP) ახორციელებს.