„გავიგუდეთ“ და „ეკო ცენტრის“ ორგანიზებით ქ.რუსთავში 600-მდე ნერგი დაირგო

„გავიგუდეთ“ და „ეკო ცენტრის“ ორგანიზებით ქ.რუსთავში 600-მდე ნერგი დაირგო

პროექტის “თანამშრომლობა მწვანე რუსთავისთვის” ფარგლებში ქ.რუსთავში 600-მდე ნერგი დაირგო.

ნერგების უმრავლესობა ორ ტერიტორიაზე – ქ.რუსთავის მე-9 საჯარო სკოლისა და კოლეჯ „მოდუსის“ ტერიტორიებზე დაირგო, ხოლო ნერგების ნაწილი ქალაქის მასშტაბით სხვადასხვა უბნებში გადანაწილდა.

პროექტი ხორციელდება გლობალური გარემოსდაცვითი ფონდის მცირე გრანტების პროგრამის (GEF SGP) მხარდაჭერით, რომელსაც საქართველოში გაეროს განვითარების პროგრამა (UNDP) ახორციელებს.

გარდა ამისა, პროექტში ჩაერთო არაერთი ადამიანი თუ ორგანიზაცია. მათ შორის, მოქალაქეები, რომელთა დახმარებითაც შეგროვდა 2300 ლარზე მეტი (სამიზნე თანხა იყო 2000 ლარი). აღნიშნული თანხა გამწვანებისთვის საჭირო ინვენტარის შეძენას მოხმარდა, თანხის დარჩენილი მცირე ნაწილი კვლავ გამწვანებული ტერიტორიების მოვლა-პატრონობისთვის დაიხარჯება.

მნიშვნელოვანია პროექტში საჯარო სექტორის ჩართულობაც. ქ.რუსთავის მუნიციპალიტეტის მერიამ პროექტის ფარგლებში დაგვახმარა ტრაქტორი მე-9 სკოლაში ორმოების ამოსაღებად, გამოგვიყო სატვირთო მანქანა სანერგიდან ნერგების წამოსაღებად და პირველ ჯერზე, სანამ საირიგაციო სისტემა მოეწყობა, დაგვახმარა სარწყავი მანქანა, რომლითაც ახლად დარგულ ხეებს საჭირო რაოდენობით წყალი დავუსხით.

„გავიგუდეთ“-ის მიერ მოხალისეობრივად განხორციელებული წინა ორი გამწვანების პროექტის მსგავსად, „ველური ბუნების ეროვნული სააგენტო“ წელსაც ჩაერთო გამწვანების აქციაში და უსასყიდლოდ გადმოგვცა ელდარის ფიჭვი, დიადი ბოყვი (ნეკერჩხალი), იფანი და მუხა.

სასიხარულო იყო საქართველოს რკინიგზის ჩართულობა. მათ უსასყიდლოდ გადმოგვცეს კვიპაროსისა და ტუიას ნერგები. ასევე, აქტიურად ჩაერთნენ დარგვის პროცესში.

გამწვანების აქცია 15 ნოემბერს დასრულდა და საირიგაციო სამუშოებისთვის მზადება დაიწყო. ირიგაციისა და სხვა ხარჯების უდიდესი ნაწილს ფინანსურად უზრუნველყოფს გლობალური გარემოსდაცვითი ფონდის მცირე გრანტების პროგრამა.

„გავიგუდეთ“ და „ეკო ცენტრი“ მადლობას უხდის ყველა ჩართულ მხარეს თანამშრომლობისთვის, განსაკუთრებით კი მე-9 საჯარო სკოლისა და კოლეჯ „მოდუსის“ ადმინისტრაციასა და მოსწავლეებს/სტუდენტებს. გამწვანების აქციამდე მათთან ერთად არაერთი საინფორმაციო ხასიათის შეხვედრა გავმართეთ – მათი ჩართულობით შეიმუშავა კომპანია „კედარმა“ გამწვანების პროექტი, ჩატარდა სემინარები გარემოს დაცვის, ჰაერის დაბინძურების, გამწვანების და სხვა საკითხების შესახებ. ჩვენი გუნდი ორივე საგანმანათლებლო დაწესებულებასთან მომავალშიც აქტიურად ითანამშრომლებს, რათა ერთად მოვუაროთ გამწვანებულ ტერიტორიებს.