„გავიგუდეთ“ შპს „მშენებელი 2004“-ის საჯარო განხილვას დაესწრო
„გავიგუდეთ“ შპს „მშენებელი 2004“-ის საჯარო განხილვას დაესწრო
დღეს, 11 მაისს, ქ.რუსთავის მერიაში შპს „მშენებელი 2004“-ის ცემენტის საწარმოს ექსპლუატაციის პირობების ცვლილების პროექტზე სკოპინგის ანგარიშის საჯარო განხილვა გაიმართა.
შეხვედრას სამოქალაქო მოძრაობა „გავიგუდეთ“ გარდა ესწრებოდნენ საწარმოს, საკონსულტაციო კომპანიის, გარემოს ეროვნული სააგენტის, რუსთავის მერიისა და საკრებულოს წარმომადგენლები.
საჯარო განხილვის შესახებ ინფორმაცია ჩვენმა გუნდმა წინასწარ მიაწოდა მოსახლეობას (იხ. პოსტი).
შპს „მშენებელი 2004“ გეგმავს წარმადობის გაზრდას, რისთვისაც 3 ტ/სთ წარმადობის წისქვილს 2022 წლიდან დაემატა 8 ტ/სთ წარმადობის ბურთულებიანი წისქვილი. 8 ტონა/საათი წარმადობის ბურთულებიანი წისქვილის ექსპლუატაციაში შესვლის შემდგომ საწარმოს დაგეგმილი აქვს მათი ერთობლივი ექსპლუატაცია.
აღნიშნულ ცვლილებასთან ერთად არსებულ ცემენტის ხუთ სილოსს დაემატა ორი სილოსი, რის შემდგომ მათი რაოდენობა გახდა 7.
8 ტ/სთ წისქვილისათვის საწარმოს მიერ გამოშვებული პროდუქციის წლიური რაოდენობა არის 17, 600 ტონა; ხოლო 3 ტ/სთ წისქვილისთვის – 18, 000 ტონა.
როგორც საჯარო განხილვაზე გაირკვა, ამ ეტაპზე ორივე წისქვილი გაჩერებულია. 3 ტ/სთ-იანი წისქვილი ამორტიზებულია და, როგორც კომპანის წარმომადგენელმა აღნიშნა, შესაბამისი გარემოსდაცვითი ნებართვის მიღების შემდგომ, ფინანსური რესურსის არსებობის შემთხვევაში გარემონტდება აღნიშნული წისქვილი და ჩაეშვება ექსპლუატაციაში.
რაც შეეხება, 8 ტ/სთ-იან წისქვილს, იგი საწარმოში უკვე დამონტაჟებულია, თუმცა ჩაირთვება გადაწყვეტილების მიღების შემდგომ. ამასთან, აღნიშნულ წისქვილზე დამონტაჟებულია ამერიკული წარმოების თვითმონიტორინგის ხელსაწყოც.