“გავიგუდეთ“ შპს „მაღალი ტექნოლოგიების ეროვნული ცენტრის“ გზშ ანგარიშის საჯარო განხილვას დაესწრო
“გავიგუდეთ“ შპს „მაღალი ტექნოლოგიების ეროვნული ცენტრის“ გზშ ანგარიშის საჯარო განხილვას დაესწრო
დღეს, 4 აპრილს, ქ. რუსთავის მერიაში შპს „მაღალი ტექნოლოგიების ეროვნული ცენტრის“ ძირითადი არაორგანული ნაერთების (ამორფული ბორის) საწარმოს მოწყობა-ექსპლუატაციის პროექტის შესახებ გზშ ანგარიშის საჯარო განხილვა გაიმართა.
გარდა ჩვენი მოძრაობისა, განხილვას ესწრებოდნენ კომპანიის, სააგენტოს, რუსთავის მერიისა და საკრებულოს წარმომადგენლები.
შპს „საქართველოს მაღალი ტექნოლოგიების ეროვნული ცენტრის“ საწარმო ამ ეტაპზე ფუნქციონირებს ქ. თბილისში, რაზეც გააჩნია შესაბამისი გარემოსდაცვითი გადაწყვეტილება, თუმცა კომპანიის გადაწყვეტილებით, ცენტრის სრული ინფრასტრუქტურის გადატანა იგეგმება ქ. რუსთავის სამრეწველო ზონაში. დაგეგმილი საქმიანობის ფარგლებში, გათვალისწინებულია მოსამზადებელი, სამშენებლო და შემდგომ სარეკულტივაციო სამუშაოები. საწარმოს მშენებლობისთვის გათვალისწინებულია 1,5- 2 წელი.
გაზრდილი წარმადობით დაგეგმილია 650 კგ ამორფული ბორის წარმოება წელიწადში 330 დღის განმავლობაში.
საპროექტო ტერიტორიაზე დაგეგმილია საწარმოო დანიშნულების, ასევე სამეცნიერო-კვლევითი და საოფისე შენობა-ნაგებობების მოწყობა, განაშენიანების საერთო ფართობით 8556 მ2.
როგროც საჯარო განხილვაზე საწარმოს და საკონსულტაციო კომპანიის წარმომადგენლებმა დაგვიდასტურეს, აღნიშნული წარმოება არის უნარჩენო – პროცესის შედეგად მყარი ნარჩენი არ წარმოიქმნება, ხოლო რაც შეეხება თხევად ნარჩენს, აქ მნიშვნელოვანია მჟავე-ტუტოვანი ბალანსის დაცვა, რათა საკანალიზაციო წყლებში არ მოხვდეს მაღალი მჟავიანობის სითხე; ამისათვის კი, საპროექტო კომპანია ითვალისწინებს ნარჩენი წყლის გამწმენდი ნაგებობის მოწყობასაც.
ამასთან, აღსანიშნავია, რომ ჩვენს პრაქტიკაში პირველად დავესწარით ისეთი წარმოების განხილვას, რომლის კონკრეტულ ნაწილს, კერძოდ, წარმოების იმ ნაწილს, სადაც აღწერილია ამორფული ბორის წარმოების ტექნოლოგიური პროცესი, ადევს გრიფით საიდუმლო. თუმცა, როგორც სააგენტოს წარმომადგენელმა განგვიმარტა, ეს კონკრეტული ნაწილი ხელმისაწვდომია სააგენტოს ექსპერტებისთვის, რომლებიც აფასებენ გზშ ანგარიშს, შესაბამისად, გადაწყვეტილების მიღებისას მათ სრულ ინფორმაციაზე აქვთ წვდომა.
გარდა ამისა, შეხვედრაზე საწარმოს წარმომადგენლებმა ჩვენი კითხვის პასუხად დაგვიდასტურეს, რომ წარმოება ფეთქებად-საშიში არ არის.
რაც შეეხება ატმოსფერულ ჰაერში გაფრქვევებს, როგორც დოკუმენტიდან და წარმოების პროცესის სპეციფიკიდან გამომდინარე ჩანს, საწარმოდან გაფრქვევები არის ძალიან დაბალი. აირმტვერნარევის გაწმენდის მიზნით, კი, პროექტი ითვალისწინებს ორსაფეხურიანი მტვერდამჭერი სისსტემის მოწყობას – ციკლონი, 98% ეფექტურობით და სახელოებიანი ფილტრი 99.4% ეფექტურობით.