„გავიგუდეთ“ შპს „ლევ 2019“-ის სკოპინგის ანგარიშის საჯარო განხილვას დაესწრო

დღეს, 3 აპრილს, ქ. რუსთავის მერიაში შპს „ლევ 2019“-ის ცემენტის საწარმოს ექსპლუატაციის პირობების ცვლილების შესახებ სკოპინგის ანგარიშის საჯარო განხილვას დავესწარით.

შეხვედრას ასევე ესწრებოდნენ კომპანიის, გარემოს ეროვნული სააგენტოს, რუსთავის მერიის, საკრებულოსა და არასამთავრობო ორგანიზაცია „დედების სივრცის“ წარმომადგენლები.

სკოპინგის ანგარიშის საჯარო განხილვის შესახებ ინფორმაცია ჩვენმა გუნდმა, ტრადიციულად, წინასწარ მიაწოდა მოსახლეობას (იხ. პოსტი).

შპს „ლევ 2019“-ს დაგეგმილი აქვს კლინკერის, თაბაშირისა და დანამატების დაფქვით ცემენტის წარმოების საამქროს მოწყობა – ექსპლუატაცია. აღნიშნული საწარმო მდებარეობს შპს „თეიმურაზ ჯანგულაშვილი და კომპანია“-ს საკუთრებაში არსებულ მიწის ნაკვეთზე.

შპს „თეიმურაზ ჯანგულაშვილი და კომპანია“-ზე 2021 წელს გაცემულია გარემოსდაცვითი გადაწყვეტილება ცემენტის წარმოებაზე. ხოლო 2022 წლის 18 ივლისს აღნიშნული გადაწყვეტილება გადაეცა შპს „ლევ 2019“-ს.

საწარმოში გათვალისწინებულია, ძირითადად, 300, 400 და 500 მარკის ცემენტის წარმოება კლინკერის, ტაბაშირის და დანამატების დაფქვით. საწარმოში დაგეგმილია წელიწადში 79200 ტონა ცემენტის წარმოება.

საწარმოს ტერიტორიაზე დაიგეგმა დამატებით ახალი 17 ტ/სთ წარმადობის სეპარაციული წისქვილის მონტაჟი, რომლის მუშაობის შედეგად, დამატებით მიიღება 112200 ტონა ცემენტი.

შედეგად, ექსპლუატაციის პირობების შეცვლის შემდეგ ჯამურად საწარმოში ორივე წისქვილში გამოშვებული იქნება 191400 ტონა სხვადასხვა მარკის ცემენტი, რისთვისაც საჭირო იქნება 153120 ტონა კლინკერი, 9570 ტონა თაბაშირი და 28710 ტონა ღორღი.

ასევე საწარმოში არსებულ 6 სილოსს ექსპლოატაციის ცვლილების შემდეგ დაემატება 4 ცალი სილოსი, რომელთა თითეულის ტევადება ასევე იქნება 120 ტონა. ანუ ექსპლოატაციის ცვლილების შემდეგ სულ ექნება 10 ცალი სილოსი, რომელთა ჯამური ტევადობა იქნება 1200 ტონის.

არსებულ 6 სილოსზე, თითეულზე გათვალისწინებული იყო გამწმენდი სისტემის – სხელოებიანი ფილტრის დამონტაჟება, მაგრამ მოხდა მათი ერთმანეთთან შეერთება მილებით და მათზე დამონტაჟდა ერთი გამწმენდი სისტემა, სახელოებიანი ფილტრი, რომელიც ემსახურება 6 ცალ სილოსს ერთდროულად, რომლებშიც ცემენტის მიღება ხორციელდება მონაცვლეობით რეჟიმში.

ასევე საწარმოში 4 ახალ დასამონტაჟებელ სილოსზე დამონტაჟდა ერთიანი სახელოებიანი ფილტრი, რომელიც მოემსახურება ოთხივე სილოსს, რომლებიც ერთმანეთთან შეერთებული იქნებიან მილით, და მათშიც ცემენტის მიღება ბუნებრივია მოხდება მონაცვლეობითი რეჟიმით.

საჯარო განხილვაზე რამდენიმე კითხვა და კომენტარი გაჟღერდა, როგორც ჩვენი ასევე, „დედების სივრცის“ წარმომადგენლისგან. მათ შორის, გარემოს ეროვნული სააგენტოს წარმომადგენელთან გავაჟღერეთ ჩვენი ერთ-ერთი სურვილი და ინიციატივა, რომ თვითმონიტორინგის ქსელის დანერგვა/ამოქმედების შემდგომ სასურველია, სამინისტრომ ხელახლა შეიმუშავოს გაფრქვევების კუმულაციური კოეფიციენტი, რომელიც მანამდე გაფრქვევების საანგარიშო მეთოდით გამოთვლაზე იყო დაფუძნებული. აღნიშნული კოეფიციენტის გამოყენებით საწარმოები კუმულაციურ ზემოქმედებას საზღვრავენ მოძველებულ მონაცემებზე დაყრდნობით. შესაბამისად, მისი ხელახალი გამოანგარიშება მნიშვნელოვანია, იმისათვის რომ კუმულაციური ზემოქმედების შესახებ უფრო ვალიდური სურათი მივიღოთ.

ამასთან, დავაზუსტეთ დეტალები თვითმონიტორინგის სისტემიასთან დაკავშირებით და, როგორც საწარმოს წარმომადგენლებმა დაგვიდასტურეს, არსებულ საწარმოზე დამონტაჟებულია თვითმონიტორინგის ხელსაწყო და რეგისტრირებულია სამინისტროს ერთიან ელქტრონულ ბაზაში. ასევე, იგეგმება ხელსაწყოს მონტაჟი ახალ საწარმოზეც.

გარდა ამისა, მივესალმებით ფაქტს, რომ დაინერგა ახალი პრაქტიკა და აღნიშნული საწარმოს სკოპინგის ანგარიშზე საჯარო განხილვა ჩატარდება სოფ. თაზაქენდშიც. საპროექტო ტერიტორიიდან უახლოესი მანძილი აღნიშნულ დასახლებამდე შეადგენს დაახლოებით 195 მეტრს, შესაბამისად, მსგავს პროცესებში ამ სოფლის მოსახლეობის ჩართულობა და მათი აზრის გათვალისწინება მნიშვნელოვანია.