„გავიგუდეთ“ რუსთავის ჰაერის მართვის გეგმის შედეგების პრეზენტაციას დაესწრო

„გავიგუდეთ“ რუსთავის ჰაერის მართვის გეგმის შედეგების პრეზენტაციას დაესწრო

დღეს, 23 თებერვალს, გარემოს დაცვისა და სოფლის მეურნეობის სამინისტროში ქ. რუსთავის ატმოსფერული ჰაერის ხარისხის გაუმჯობესების სამოქმედო გეგმის (2020-2022 წლებისთვის) შედეგების პრეზენტაცია გაიმართა.

შეხვედრას სამოქალაქო მოძრაობა „გავიგუდეთ“, გარემოს დაცვისა და სოფლის მეურნეობის მინისტრი ოთარ შამუგია, მინისტრის მოადგილეები ნინო თანდილაშვილი, კახა კაკაბაძე, სოლომონ პავლიაშვილი, საქართველოს პარლამენტის გარემოს დაცვისა და ბუნებრივი რესურსების კომიტეტის თავმჯდომარე მაია ბითაძე, ქ.რუსთავის მერი ნინო ლაცაბიძე, საქართველოს პარლამენტის დეპუტატები ირაკლი შატაკიშვილი და ალექსანდრე დალაქიშვილი, სამინისტროს შესაბამისი სამსახურის და უწყების ხელმძღვანელი პირები ესწრებოდნენ. შეგახსენებთ, რომ „გავიგუდეთ“ სამოქმედო გეგმის სამუშო ჯგუფის წევრი 2020 წლიდან იყო.

დღევანდელ პრეზენტაციას ჰქონდა შემაჯამებელი სახე, თუმცა, წარმოდგენილ ანგარიშში ძირითადი აქცენტი სამოქმედო გეგმის ფარგლებში 2022 წლის 1 იანვრიდან – 2022 წლის 31 დეკემბრამდე პერიოდში განხორციელებულ აქტივობებზე გაკეთდა.

ანგარიშთან და ზოგადად, სამოქმედო გეგმის განხორციელების პროცესთან დაკავშირებით ჩვენს გუნდს გარკვეული კითხვები, კომენტარები და რეკომენდაციები ჰქონდა, თუმცა, პრეზენტაციის შემდგომ კითხვა-პასუხის ფორმატი, სამწუხაროდ, არ იყო გათვალისწინებული.

მიუხედავად ამისა, მაინც შევძელით, ჩვენი სათქმელი ქალაქში არსებულ პრობლემებსა და სამოქალაქო სექტორთან კომუნიკაციის კუთხით არსებულ გამოწვევებთან დაკავშირებით მინისტრისა და მინისტრის მოადგილისთვის გაგვეზიარებინა.

მინისტრს გადავეცით ჩვენი – რუსთავის მოქალაქეების უკმაყოფილებაც, რომ მის სახელზე დაწერილი 20 მოქალაქის 20 წერილი დარჩა უპასუხო და წერილში მოთხოვნილ ინფორმაციაზე პასუხის მიღების მიზნით დაგვჭირდა საპროტესტო აქციის ორგანიზება. ასევე, ხაზი გავუსვით სამოქმედო გეგმების განხორციელების პროცესში მოქალაქეების უფრო ეფექტური და რეალური ჩართულობის საჭიროებას. მივიღეთ ამ მიმართულებით ქმედითი ნაბიჯების გადადგმის პირობა, თუმცა, ჩვენი სამწუხარო გამოცდილება გვიჩვენებს, რომ თუ გვინდა პირობები შესრულდეს, მოქალაქეთა მხრიდან აქტიურობას და მონიტორინგს გადამწყვეტი მნიშვნელობა აქვს.

თუმცა, პირობების შესრულების შემთხვევაში (განსაკუთრებით თუ ეს დროულად მოხდება), ხაზს გავუსვამთ ქმედით თანამშრომლობას, რადგან კარგად ვიაზრებთ, რომ ეს პროცესი წარმატებული მხოლოდ იმ შემთხვევაში იქნება, თუ ხალხი, ხელისუფლება და ბიზნესი ერთობლივად და სწორად იმოქმედებს.

სამოქმედო გეგმის შედეგების შესახებ დეტალურ ინფორმაციას სულ მალე გაგიზიარებთ.