გარემოს ეროვნული სააგენტოს სკოპინგის დასკვნა  „რუსთავის ფოლადის“ პროექტზე

გარემოს ეროვნული სააგენტოს სკოპინგის დასკვნა  „რუსთავის ფოლადის“ პროექტზე

გარემოს ეროვნულმა სააგენტომ 2022 წლის 13 ოქტომბერს შპს „რუსთავის ფოლადის“ პროექტზე მეტალურგიული წარმოების ექსპლუატაციის პირობების ცვლილების შესახებ სკოპინგის დასკვნა გამოაქვეყნა.

შეგახსენებთ, რომ აღნიშნულ პროექტზე სკოპინგის ანგარიშის საჯარო განხილვა 2022 წლის 21 სექტემბერს გაიმართა. დეტალური ინფორმაცია საჯარო განხილვასა და აღნიშნულ პროექტზე „გავიგუდეთ“ კომენტარების შესახებ შეგიძლიათ, იხილოთ ბმულზე.

გვინდა, გამოვყოთ ჩვენი რამდენიმე კომენტარი, რომლებიც ასევე ხაზგასმულია გარემოს ეროვნული სააგენტოს მიერ გამოქვეყნებულ სკოპინგის დასკვნაში.

– ჩვენმა მოძრაობამ ყურადღება გაამახვილა იმ ფაქტზე, რომ სკოპინგის ანგარიშის თანახმად, ახალი, 35 ტ/სთ წარმადობის ღუმელის სამონტაჟო სამუშოები დასრულებულია და მიმდინარეობს ღუმელის სატესტო რეჟიმში გამოცდის პროცედურები. აღსანიშნავია, აღნიშნული ღუმელი ერთი წლის წინაც დამონტაჟებული იყო და ფუნქციონირებდა; ხოლო ერთი წლის განმავლობაში ‘სატესტო რეჟიმში’ ღუმელის ფუნქციონირება გაუმართლებელია.

სააგენტოს სკოპინგის დასკვნიდან ირკვევა, რომ როდესაც სააგენტოს წარმომადგენელმა ადგილზე ვიზიტის ფარგლებში დააფიქსირა, რომ ღუმელი ექსპლუატაციის რეჟიმშია, გამოვლენილი სამართალდარღვვის ფაქტზე შემდგომი რეაგირების მიზნით ეცნობა გარემოსდაცვითი ზედამხედველობის დეპარტამენტს.

– ჩვენმა გუნდმა და სააგენტომ აღნიშნა, რომ გზშ ანგარიშში მოცემული უნდა იყოს დეტალური ინფორმაცია ჯართის ღია უბანზე დამუშავებისას აალების საწინააღმდეგო პრევენციული ღონისძიებებისა და აირული ჭრისას არაორგანიზებული გაფრქვევების მართვის კონკრეტული ღონისძიებების შესახებ.

– საერთო კომენტარი იყო ისიც, რომ გზშ ანგარიშში აღწერილი უნდა იყოს თვითმონიტორინგის სისტემის დანერგვისა და განხორციელების საკითხი, მათ შორის – გაფრქვევის წყაროების, მონიტორინგს დაქვემდებარებული კომპონენტების, თვითმონიტორინგისთვის შერჩეული მეთოდის/ხელსაწყოს და სტანდარტის შესახებ.

– „გავიგუდეთ“ კომენტარი – „მილსაგლინავ საამქროში არ არის ვენტილაციის სისტემა, საამქროს შენობაში გამოყოფილი მავნე აირების ორგანიზებული აირაციული ფარნებიდან ატმოსფეროში გაფრქვევისათვის. შესაბამისად, აღნიშნული ინფორმაცია საჭიროებს დაზუსტებას“ აისახა სააგენტოს სკოპინგის დასკვნაში.

– ჩვენი მოძრაობის კითხვა ეხებოდა ახალი, 35 ტ/სთ წარმადობის ღუმელის აირგამწმენდ სისტემას. იმის გათვალისწინებით, რომ ღუმელი ფუნქციონირებს, გვაინტერესებდა, რატომ არაა გაშვებული ექსპლუატაციაში მისთვის განკუთვნილი აირგამწმენდი სისტემა?სკოპინგის დასკვნაში სააგენტო მოუწოდებს საწარმოს, დააზუსტოს ეს საკითხი.

– წიდის განთავსების პირობებისა და შემდგომი მართვის საკითხების დაზუსტება აღნიშნულია ორივე მხარის მიერ წარმოდგენილ კომენტარებში.

– რაც შეეხება არაორგანიზებულ გაფრქვევებს, ჩვენმა მოძრაობამაც და სააგენტომაც აღნიშნა, რომ მნიშვნელოვანია გზშ-ის ეტაპზე დეტალურად იქნეს წარმოდგენილი ინფორმაცია, როგორც ორგანიზებული, ისე არაორგანიზებული გაფრქვევის წყაროების, გაფრქვეული მავნე ნივთიერებებისა და მავნე ნივთიერებათა გაფრქვევის შემცირების ან/და პრევენციის ღონისძიებების შესახებ.