სამინისტროს პასუხი რუსთავში არსებულ სუნთან დაკავშირებით
სამინისტროს პასუხი რუსთავში არსებულ სუნთან დაკავშირებით
ბოლო პერიოდის განმავლობაში, რუსთავის მოსახლეობას განსაკუთრებით ახალი რუსთავის მხარეს, აწუხებს გაუსაძლისი სუნი. სუნთან დაკავშირებით ჩვენც არაერთხელ მოგვმართეს. შესაბამისად, დავინტერესდით ამ პრობლემით და 26 აგვისტოს გარემოსდაცვითი ზედამხედველობის დეპარტამენტს გავუგზავნეთ წერილი, რათა გაგვეგო მათი პასუხი სუნის გამომწვევი მიზეზისა და წარმომქმნელი წყაროს შესახებ.
სამინისტროს პასუხს და ინფორმაციას, განხორციელებული ინსპექტირებების შედეგების შესახებ, თქვენც გიზიარებთ.
როგორც წერილიდან ირკვევა, უსიამოვნო სუნის წარმომქმნელი წყარო იდენტიფიცირებულია, ესაა სოკოს საწარმო – შპს „თეთრი ქუდი“, რომელიც „კუთვნილ ტერიტორიაზე ახორციელებს კომპოსტის (ნარჩენების აღდგენა) დამზადებას, რაც სავარაუდოდ შეიძლება, იწვევდეს უსიამოვნო სუნს“.
წერილიდან ასევე ირკვევა, რომ 2019 წლიდან მოყოლებული საწარმოზე არაერთი ინსპექტირება განხორციელდა და დარღვევებისთვის არაერთხელ დაეკისრა ჯარიმაც:
– 1-ლი ინსპექტირება განხორციელდა 2019 წლის 15 ოქტომბერს, როს შედეგადაც დადგინდა, რომ არ იყო დაცული მოქმედი კანონმდებლობით განსაზღვრული მოთხოვნები. შედეგად, შედგა ადმინისტრაციული სამართალდარღვევის ოქმი და საქმე გადაეცა რუსთავის საქალაქო სასამართლოს. 2020 წლის 9 მარტს სასამართლომ „თეთრი ქუდი“ ადმინისტრაციულ სამართალდამრღვევად სცნო და დააკისრა ჯარიმა 7500 ლარის ოდენობით. ამასთან, კომპანიას დაევალა ინსპექტირების შედეგად გამოვლენილი დარღვევების აღმოფხვრა.
– მიწერილობით დადგენილი ვადის გასვლის შემდგომ დეპარტამენტმა კვლავ შეამოწმა მიწერილობით განსაზღვრული ვალდებულებების შესრულების მდგომარეობა და გამოვლინდა, რომ ეს ვალდებულებები კვლავ შეუსრულებელი იყო; გარდა ამისა, ინსპექტირების პროცესში მიმდინარეობდა კომპოსტის წარმოება გარემოსდაცვითი გადაწყვეტილების გარეშე. 2020 წლის 17 აგვისტოს შემდგარი სამართალდარღვევის ოქმის საფუძველზე, 2020 წლის 20 ნოემბერს სასამართლომ „თეთრი ქუდი“ ადმინისტრაციულ სამართალდამრღვევად სცნო და დააკისრა ჯარიმა 14, 000 ლარის ოდენობით.
– 2021 წლის 29 ივლისს განხორციელებული ინსპექტირების შედეგად დადგინდა, რომ საწარმო კვლავ აწარმოებდა კომპოსტს გარემოსდაცვითი გადაწყვეტილების გარეშე, ამ საფუძველზე გამოიკვეთა სისხლის სამართლის დანაშულის ნიშნები და, შესაბამისად, 2021 წლის 30 ივლისს კომპანიას შეეზღუდა კომპოსტის წარმოების უფლება.
– 2021 წლის 27 ოქტომბერსაც განხორციელდა ინსპექტირება საწარმოში და კვლავ დაფიქსირდა კომპოსტის წარმოების ფაქტი გარემოსდაცვითი გადაწყვეტილების გარეშე. 28 ოქტომბერს კი სასამართლომ კომპანია სამართალდამრღვევად სცნო და დააკისრა ჯარიმა 30,000 ლარის ოდენობით. ეს გადაწყვეტილება კომპანიამ თბილისის საქალაქო სასამართლოში გაასაჩივრა და არსებული მდგომარეობით (სამინისტროსგან წერილი მივიღეთ 13 სექტემბერს) საქმე სამართალწარმოებაშია.
– 2022 წლის 12 აგვისტოს დეპარტამენტმა კვლავ განახორციელა საწარმოზე ინსპექტირება და კვლავ გამოვლინდა გარემოსდაცვითი გადაწყვეტილების გარეშე კომპოსტის წარმოების ფაქტი. შესაბამისად, შედგა ადმინისტრაციული სამართალდარღვევის ოქმი და გადაიგზავნა გარდაბნის მაგისტრატ სასამართლოში. 13 სექტემბერს (სამინისტროს პასუხის თარიღი) არსებული მდგომარეობით აღნიშნული საქმე სამართალწარმოებაშია.
როგორც ხედავთ, რუსთავში არსებული ბევრი სხვა საწარმოს მსგავსად, „თეთრი ქუდის“ შემთხვევაშიც იკვეთება განმეორებითი კანონდარღვევების ფაქტები. ხოლო, თუ ქალაქში არსებული სუნით ვიმსჯელებთ, ეს ფაქტები ბევრად უფრო ხშირია, ვიდრე ეს გარემოსდაცვითი ზედამხედველობის დეპარტამენტის მიერ გამოგზავნილ ინფორმაციაში იკვეთება.
საინფორმაციო მასალა მომზადდა „დემოკრატიის ევროპული ფონდის“ ფინანსური მხარდაჭერით, პროექტის “ვიცავთ უფლებას სუფთა ჰაერზე რუსთავში“ ფარგლებში.