სამუშო ჯგუფის ფარგლებში შპს “რუსთავის ფოლადის” სკოპინგის ანგარიშის განხილვა გაიმართა
სამუშო ჯგუფის ფარგლებში შპს “რუსთავის ფოლადის” სკოპინგის ანგარიშის განხილვა გაიმართა
14 სექტემბერს, სამოქალაქო მოძრაობის “გავიგუდეთ” ორგანიზებით მეტალურგიული ქარხნის – შპს “რუსთავის ფოლადის” სკოპინგის ანგარიშის განხილვის, კომენტარებისა და შენიშვნების მომზადების მიზნით სამუშაო ჯგუფის ფარგლებში შეხვედრა გაიმართა.
დღეისათვის ქარხნის ელექტროფოლადსადნობ საამქროში ფუნქციონირებს 2 ერთეული 10 ტ/სთ წარმადობის ელექტროფოლადსადნობი ღუმელი; ხოლო ახალი, 35 ტ/სთ წარმადობის ღუმელის დამატებით, ელექტროფოლადსადნობი საამქროს ჯამური წარმადობა იქნება 55 ტ/სთ.
შეგახსენებთ, რომ აღნიშნულ პროექტზე სკოპინგის ანგარიში საწარმოს 2019 წელსაც ჰქონდა შეტანილი და სკოპინგის დასკვნის საფუძველზე გზშ ანგარიშიც მოამზადა; ხოლო 2021 წლსი 27 აგვისტოს სამინისტროში განაცხადი წარადგინა გარემოსდაცვითი გადაწყვეტილების მიღების მიზნით. გზშ ანგარიშის საჯარო განხილვის შემდეგ, ანგარიშში დაფიქსირებული სხვადასხვა ხარვეზების გამო სამინისტრომ შეწყვიტა გარემოსდაცვითი გადაწყეტილების ადმინისტრაციული წარმოების პროცესი. “გარემოსდაცვითი შეფასების კოდექსის” მოთხოვნებიდან გამომდინარე, 2021 წლსი 25 ნოემბერს ამოიწურა გარემოსდაცვითი გადაწყვეტილების გაცემის ვადა, შესაბამისად, საჭირო გახდა სკოპინგის პროცედურის თავიდან დაწყება.
სამუშაო ჯგუფის შეხვედრა დისტანციურ რეჟიმში გაიმართა და მას მოწვეული ტრენერი უძღვებოდა. მიმდინარეობისას დეტალურად მიმოვიხილეთ სკოპინგის ანგარიში და მოვამზადეთ წერილობითი პოზიცია, სადაც ასახულია მოძრაობის შენიშვნები და რეკომენდაციები, რომელთაც როგორც გარემოს ეროვნულ სააგენტოს, ისე მოსახლეობას გავუზიარებთ.
შპს „რუსთავის ფოლადის“ სკოპინგის დოკუმენტის საჯარო განხილვა ქ.რუსთავის მერიაში 21 სექტემბერს 15:00 საათზე შედგება და მასზე დასწრება ნებისმიერ მსურველს შეუძლია.
დოკუმენტი შეგიძლიათ, იხილოთ ბმულზე.
შეხვედრა გაიმართა USAID-ის სამოქალაქო საზოგადოების ჩართულობის პროგრამის ფარგლებში. ამერიკის შეერთებული შტატების საერთაშორისო განვითარების სააგენტოს (USAID) დაფინანსებით.