რა დარღვევა გამოავლინა 18 ივლისის ინსპექტირებამ სს „რუსთავის აზოტში“?

ვინც 18 ივლისს რუსთავში იმყოფებოდით, ალბათ ყველამ შეამჩნიეთ ინტენსიური კვამლი, რომელიც „რუსთავის აზოტის“ ტერიტორიიდან გამოდიოდა.

სამოქალაქო მოძრაობას „გავიგუდეთ“ მოქალაქეებმა ინცინდენტის ამსახხველი არაერთი მასალა მიაწოდეს, რომლებიც, შემდეგ საზოგადოებასაც გავუზიარეთ.

ამ ფაქტთან დაკავშირებით ჩვენმა გუნდმა საჯარო ინფორმაციაც გამოითხოვა, ვინაიდან გვაინტერესებდა, ზუსტად რამ გამოიწვია ხანძარი და რა რეაგირება მოჰყვა შემთხვევას გარემოსდაცვითი ზედამხედველობის დეპარტამენტის მხრიდან.

როგორც დეპარტამენტის საპასუხო წერილშია აღნიშნული, 2022 წლის 18 ივლისს გარემოსდაცვითი ზედამხედველობის დეპარტამენტის ცხელ ხაზზე – 153-ზე რუსთავთან დაკავშირებით ჯამში 5 ზარი შევიდა, სადაც მოქალაქეებმა დეპარტამენტს ხანძრისა და დაკვამლიანების შესახებ აცნობეს.

როგორც ინსპექტირების შედეგად გაირკვა, სს „რუსთავის აზოტში“ ხანძარი გაჩნდა ტარა-შესაფუთი მასალების ტერიტორიაზე, კერძოდ, ცეცხლი ეკიდა პოლიეთილენისა და პოლიპროპილენის ნარჩენ ტომრებს.

ხანძრის გამო გარემოსდაცვითი ზედამხედველობის დეპარტამენტის ქვემო ქართლის სამმართველოს ინსპექტორმა შეადგინა ადმინისტრაციული სამართალდარღვევის ოქმი, ვინაიდან საწარმომ დაარღვია 2021 წლის 19 თებერვალს მასზე გაცემული გარემოსდაცვითი გადაწყვეტილებით დადგენილი პირობები.

გარემოზე ზემოქმედების შეფასების ანგარიშის მიხედვით, სს „რუსთავის აზოტი“ პასუხისმგებელი იყო საამქროებში ხანძარსაწინააღმდეგო საშუალებების არსებობასა და გამართულ მუშაობაზე.

კომპანიას უნდა დაეცვა ხანძარსაწინააღმდეგო ნორმები, ჰქონოდა ყველა უბანზე ქმედითუნარიანი სახანძრო ინვენტარი და სახანძრო სტენდებზე მიეთითებინა უბნის სახანძრო უსაფრთხოებაზე პასუხისმგებელი პირი და მისი საკონტაქტო ინფორმაცია.

ასევე, ხანძრის შემთხვევაში კომპანიას უნდა უზრუნველეყო სახანძრო სამსახურის ინცინდენტის ადგილას გამოცხადება და ხანძარსაწინააღმდეგო ღონისძიებების განხორციელება ადგილობრივი და რეგიონული სახანძრო რაზმების გამოჩენამდე.

ვინაიდან სს „რუსთავის აზოტმა“ გარემოსდაცვითი გადაწყვეტილებით გათალისწინებული ხანძარსაწინააღმდეგო ღონისძიებების გატარება ვერ შეძლო, 27 ივლისს შედგა ოქმი, რომელიც განსახილველად რუსთავის საქალაქო სასამართლოში გადაიგზავნება.

აღნიშნული შემთხვევა კარგი მაგალითია იმისა, რომ ხშირად, დოკუმენტურად საწარმოებს ყველაფერი წესრიგში აქვთ, თუმცა რეალური სურათი სულ სხვაა. სწორედ ამიტომ, აუცილებელია არაგეგმიური ინსპექტირებების გააქტიურება, რათა პირველ რიგში საფრთხე არ შეექმნას მშრომელების უსაფრთხოებას – შემდეგ კი – რუსთავის მცხოვრებლების ჯანრმთელობას.

საინფორმაციო მასალა მომზადდა „დემოკრატიის ევროპული ფონდის“ ფინანსური მხარდაჭერით, პროექტის „ვითხოვთ უფლებას სუფთა ჰაერზე“ ფარგლებში.