„გავიგუდეთ“ „ჯეოსთილში“ იმყოფებოდა
„გავიგუდეთ“ „ჯეოსთილში“ იმყოფებოდა
დღეს, 20 ივნისს სამოქალაქო მოძრაობა „გავიგუდეთ“ შპს „ჯეოსთილში“ იმყოფებოდა, სადაც კომპანიის წარმომადგენლებმა გაუმჯობესებული საწარმოო პროცესი დაგვათვალიერებინეს.
როგორც „ჯეოსთილის“ გენერალურმა დირექტორმა აღნიშნა, საწარმოს წარმოების დაწყების დღიდან აქვს გამონაბოლქვის გამწოვი სისტემა, რისი თავდაპირველი ინვესტიციაც 2.1 მლნ აშშ დოლარი გახლდათ, ხოლო ყოველწლიური საოპერაციო ხარჯი 1.2 მლნ აშშ დოლარს შეადგენს.
საწარმოს გენერალურმა დირექტორმა ყველა იმ ცვლილების შესახებ გვიამბო, რაც ბოლო წლებში საწარმოში გაფრქვევების შემცირების კუთხით გაკეთდა. აღნიშნულ ცვლილებებს ქვემოთ შეგიძლიათ გაეცნოთ:
– 2019-2020 წლებში ქარხანაში დამონტაჟდა 2880 სახელოებიანი ფილტრი, რომელიც დაპროექტებულია გერმანიაში ადგილობრივი ინჟინერიისა და ტექნოლოგიების შესაბამისად.
– საწარმოს 2018 წლიდან აქვს ნაპერწკლის დამჭერი, რომელიც კანონმდებლობით სავალდებულო არაა, თუმცა შეუძლია მტვრის დიდი ზომის ნაწილაკების დაჭერა.
– საწარმოში შეიცვალა მექანიკური გამაგრილებელი სისტემა თანამედროვე გამაგრილებლით, რომელიც ამცირებს ემისიების რაოდენობას.
– ძველი 480 000 ნმ3/სთ სიმძლავრის ვენტილატორი შეიცვალა ახალი – 560 000 ნმ3/სთ სიმძლავრის ვენტილატორით, რამაც მკვეთრად გააუმჯობესა გაწოვის სიმძლავრე და შეამცირა გამონაბოლქვი.
– შეიცვალა წვის კამერა, ახალი ტექნოლოგია ამცირებს CO, გაზისა და მტვრის გამოყოფას.
– ღუმლიდან გამაცივებლამდე არსებული წყლით და ჰაერით გამაგრილებელი მილი შეიცვალა უფრო დიდი ზომის მილით, რამაც პირდაპირი გაწოვის ეფექტურობა 1.5-ჯერ გაზარდა.
რაც შეეხება თვითმონიტორინგის სისტემას, „ჯეოსთილს“ აღნიშნული სისტემა დამონტაჟებული აქვს 2021 წლის ოქტომბრიდან, თუმცა ვერ ხერხდება მისი სამინისტროს ერთიან სისტემაში ჩართვა, რადგანაც საწარმოს შეთანხმებული არ ჰქონდა ზღვრულად დასაშვები გაფრქვევის (ზდგ) ნორმები. აღნიშნული დოკუმენტი 2022 წლის 30 მაისს შეთანხმდა და საწარმოს წარმომადგენლები იმედოვნებენ, რომ სამინისტროს სისტემაში ჩაბმას უახლოეს მომავალში შეძლებენ.
ასევე, აღსანიშნავია, რომ ბოლო პერიოდში თვალითაც ხილულია ის პროგრესი, რაც საწარმოში მიმდინარეობს. წინა წლებში, საწარმოო ზონის მონიტორინგის დროს “ჯეოსთილი” ერთ-ერთი მნიშვნელოვანი დამბინძურებელი იყო და ეს შეუიარაღებელი თვალითაც მარტივი შესამჩნევი იყო. წელს კი მსგავსი ფაქტები სულ უფრო იშვიათობაა. რა თქმა უნდა, საწარმოს ადმინისტრაციას ვაჩვენეთ კიდეც ამ დარღვევების ამსახველი ვიდეო მასალა, რაზეც გვიპასუხეს, რომ ეტაპობრივად კიდევ უფრო გააუმჯობესებენ წარმოებას. “გავიგუდეთ” გააგრძელებს საწარმოების პროგრესისთვის თვალის მიდევნებას, საწარმოო ზონის მონიტორინგს და შედეგებს მოსახლეობას აუცილებლად გაუზიარებს. ჩვენ მზად ვართ, ვეწვიოთ სხვა საწარმოებსაც და მათაც მოვუწოდებთ გამჭვირვალობისკენ.
უკვე განხორციელებული ვიზიტების შესახებ იხილეთ შემდეგი ბმულები: ვიზიტი „ფერო ელოის ფროდაქშენში“, ვიზიტი „რუსელოისში“.