„გავიგუდეთ“ „ფერო ელოის ფროდაქშენში“ იმყოფებოდა

„გავიგუდეთ“ „ფერო ელოის ფროდაქშენში“ იმყოფებოდა

დღეს, 15 ივნისს, სამოქალაქო მოძრაობა „გავიგუდეთ“ მეტალურგიულ (ფეროშენადნობთა) საწარმოს „ფერო ელოის ფროდაქშენს“ ეწვია, სადაც კომპანიის წარმომადგენლებმა საწარმოში დანერგილი სიახლეები გაგვაცნეს. როგორც თავად აღნიშნავენ, სამოქალაქო მოძრაობის „გავიგუდეთ“ როლი ამ პროცესში იყო უმნიშვნელოვანესი და სწორედ ამან გამოიწვია/დააჩქარა ფილტრაციის სისტემის მონტაჟი.

„ფერო ელოის ფროდაქშენი“ წარსულში ერთ-ერთ მნიშვნელოვან დამბინძურებელს წარმოადგენდა. იქ არსებული სიტუაცია კარგად ჩანს ჩვენ მიერ გადაღებულ ვიდეო მასალებშიც. საწარმოში 2021 წლის მიწურულს დაყენდა აირმტვერდამჭერი მოწყობილობები და გამწოვების სისტემა. ამჟამად სულ დაყენებულია 360 ცალი 5.5 მეტრის სიმაღლის სახელოებიანი ფილტრი, სისტემის ეფექტურობა კი ჯამში 99.9%-ს წარმოადგენს. ამავე პერიოდში შეიცვალა და დაყენდა უფრო მძლავრი გამწოვიც, რომლის სიმძლავრეც საათში 50 000 კუბამეტრს შეადგენს.

კომპანიის წარმომადგენლების თქმით საწარმოს 1 თვეში დაგეგმილი აქვს ფილტრებიდან გამოყოფილი მტვრის წარმოებაში დაბრუნება, რაც მაქსიმალურად შეამცირებს საწარმოო პროცესში წარმოქმნილ ნარჩენებს.

ამჟამად, პროცესების გაუმჯობესებისთვის საწარმოს გაღებული აქვს დაახლოებით 320-350 000 ლარის ინვესტიცია.

რაც შეეხება თვითმონიტორინგის საკითხს, მიუხედავად იმისა, რომ კომპანიას უკვე შერჩეული ჰყავს მომწოდებელი, მთავარ შემაფერხებელს წარმოადგენს ის, რომ საწარმოს სამინისტროსთან არ აქვს შეთანხმებული ზღვრულად დასაშვები კონცენტრაციების (ზდკ) გაფრქვევის ნორმა. როგორც საწარმოს წარმომადგენლებმა განგვიმარტეს, აღნიშნული დოკუმენტი სამინისტროს 10 ივნისს ჩაბარდა და იმედი გვაქვს, სამინისტრო გადაწყვეტილებას დროულად მიიღებს, რათა პროცესი დამატებით არ შეფერხდეს. აღნიშნული დოკუმენტის შეთანხმების შემდეგ, საწარმო 4 თვეში შეძლებს თვითმონიტორინგის სისტემის დაყენებას და მის ჩართვას სამინისტროს ერთიან სისტემაში.

მიუხედავად იმისა, რომ საწარმოს ჯერ კიდევ არ აქვს თვითმონიტორინგის სისტემა, ჩვენთვის ძალიან მნიშვნელოვანია, რომ ფილტრები და გამწოვი სისტემები შეუფერხებლად ფუნქციონირებს. თავად კომპანიის წარმომადგენლებიც აღნიშნავენ, თუ რამხელა შვებაა წარმოების პროცესის გამოსწორება როგორც მათი, ისე მათთან დასაქმებული ადამიანებისთვის.  „ფერო ელოის ფროდაქშენი“ ერთ-ერთი პირველი საწარმო იყო, რომელმაც არსებული სიტუაცია მნიშვნელოვნად შეცვალა და იმედი გვაქვს, რომ რუსთავში არსებული სხვა საწარმოები, რომლებიც დღემდე დარღვევებით ფუნქციონირებენ ამ მაგალითს გაითვალისწინებენ და გაიღებენ ინვესტიციას არა მხოლოდ ქალაქში მცხოვრები ადამიანების, არამედ საკუთარი და მშრომელების ჯანმრთელობისთვის.