“გავიგუდეთ“ აშშ-ს ელჩს შეხვდა

“გავიგუდეთ“ აშშ-ს ელჩს შეხვდა

დღეს 20 აპრილს სამოქალაქო მოძრაობის „გავიგუდეთ“ წევრები ამერიკის შეერთებული შტატების ელჩს საქართველოში  – ქალბატონ კელი დეგნანს შეხვდნენ.

შეხვედრა „დემოკრატიული ჩართულობის ცენტრების ქსელის“ რუსთავის ოფისში შედგა და ჩვენი გუნდის წევრები და მოხალისე აქტივისტები ესწრებოდნენ.

ელჩთან როგორც არსებულ მდგომარეობასა და გამოწვევებზე, ისე ჩვენს მიღწევებზე ვისაუბრეთ. სამწუხაროდ, რუსთავში ჰაერის დაბინძურების პრობლემა მხოლოდ გარემოსდაცვითი საკითხი არაა და იგი, გარდა საწარმოებისა, სხვადასხვა ცენტრალური თუ ადგილობრივი სტრუქტურის მუშაობის ხარვეზებზე მიუთითებს.

შეხვედრის პროცესში ქალბატონმა დეგნანმა ხაზი გაუსვა მოსახლეობის პროცესებში ჩართულობისა და სხვადასხვა სექტორების თანამშრომლობის მნიშვნელობას. კიდევ ერთხელ დაგვიდასტურა მხარდაჭერა და არაერთი საინტერესო იდეა მოგვაწოდა შემდგომში სამუშაოდ. ელჩი ასევე 3 მაისს ჩანიშნული სასამართლო პროცესითაც დაინტერესდა.

ამერიკის საელჩოს თანადგომას ჩვენი გუნდისთვის განსაკუთრებული მნიშვნელობა აქვს, რადგანაც 2020წელს სწორედ USAID/EWMI ACCESS იყო ჩვენი ერთ-ერთი პირველი მხარდამჭერი.

გვინდა დიდი მადლობა გადავუხადოთ ქალბატონ დეგნანს სტუმრობისთვის. ჩვენთვის სასიხარულო და განსაკუთრებით დასაფასებელია, როცა მსგავსი თემებით ასეთი მაღალი რანგის დიპლომატები ინტერესდებიან. შეხვედრაზე კიდევ ერთხელ გაესვა ხაზი, რომ „გავიგუდეთ“ წარმატებული სამოქალაქო მოძრაობის მაგალითია არა მხოლოდ ქალაქისთვის, არამედ სახელმწიფო და საერთაშორისო დონეზე. თუმცა, ვისაუბრეთ იმაზეც, რომ რეალურ ცვლილებებს სჭირდება დრო და საზოგადოების მაღალი ჩართულობა.