„კანონმდებლობა სუფთა ჰაერისთვის“ – პროექტის შეჯამება და რეკომენდაციები

„კანონმდებლობა სუფთა ჰაერისთვის“ – პროექტის შეჯამება და რეკომენდაციები

სამოქალაქო მოძრაობამ „გავიგუდეთ“ „ღია საზოგადოების ფონდის“ მხარდაჭერით 2021 წლის ივნისიდან 2022 წლის იანვრის ჩათვლით განახორციელა პროექტი „კანონმდებლობა სუფთა ჰაერისთვის – აღსრულების მონიტორინგი“.

პროექტის ფარგლებში გამოვითხოვეთ და შევისწავლეთ არაერთი საჯარო ინფორმაცია; მუდმივ რეჟიმში ვახორციელებდით საწარმოო ზონის მონიტორინგს და გადაღებულ ფოტო და ვიდეო მასალას ვაქვეყნებდით ჩვენს ფეისბუქ გვერდზე; მოსახლეობას ვაწვდიდით ინფორმაციას ჰაერის ხარისხის შესახებ; დარღვევებთან დაკავშირებით ვრეკავდით გარემოსდაცვითი ზედამხედველობის დეპარტამენტის ცხელ ხაზზე – 153-ზე; გამოვაქვეყნეთ air.gov.ge-ის გამოყენების ვიდეო ინსტრუქცია და რამდენიმე ქვიზი ჰაერის დაბინძურებაზე; პროექტის ფარგლებში გაიმართა საინფორმაციო ტური რუსთავის საწარმოო ზონაში, გვქონდა შეხვედრა მწვანე საკითხებით დაინტერესებულ ჯგუფებსა და აქტივისტებთან; აქტიურად ვურთიერთობდით მედია საშუალებთან; რამდენჯერმე შევხვდით მოსახლეობას და მათი ჩართულობით მომზადდა სარჩელი, რომელსაც უკვე უახლოეს დღეებში შევიტანთ სასამართლოში. გარდა ამისა, პროექტის ფარგლებში მომზადდა ანგარიში, რომლის პრეზენტაცია გაიმართება 2022 წლის 21 იანვარს. ღონიძიების შესახებ დეტალური ინფორმაცია შეგიძლიათ იხილოთ ამ ბმულზე.

რაც შეეხება უშუალოდ ჰაერდაცვითი კანონმდებლობის აღსრულების კუთხით არსებულ სიტუაციას, ამ საკითხზე ანგარიშში ვსაუბრობთ, თუმცა, ძირითადი გამოწვევების გათვალისწინებით სხვადასხვა საჯარო უწყებისთვის შევიმუშავეთ რეკომენდაციები:

საქართველოს პარლამენტს

საქართველოს გარემოს დაცვისა და სოფლის მეურნეობის მინისტრისგან მოითხოვოს და მოისმინოს ანგარიში 2021 წელს მიღებული კანონების და კანონში ცვლილების შესახებ, რომელიც ეხება გარემოს დაცვის კანონმდებლობის აღსრულებას ქალაქ რუსთავში მდებარე საწარმოებთან მიმართებით;

საქართველოს გარემოს დაცვისა და სოფლის მეურნეობის მინისტრს მოსთხოვოს რუსთავში მდებარე საწარმოების მხრიდან კანონის აღსრულებასთან დაკავშირებული გამოწვევების გადაჭრის სამომავლო ხედვა და კონკრეტული გეგმის შემუშავება; პერიოდულად (არანაკლებ წელიწადში 2-ჯერ) მოსთხოვოს ანგარიში განხორციელებული სამუშაოების შესახებ;

საქართველოს გარემოს დაცვისა და სოფლის მეურნეობის სამინისტროს და გარემოსდაცვითი ზედამხედველობის დეპარტამენტს

აქტიურად ითანამშრომლოს ქალაქ რუსთავში და მის შემოგარენში მდებარე საწარმოებთან, რათა საწარმოთა საქმიანობა კანონთან შესაბამისობაში იყოს.

შეიმუშავოს გეგმა, რომლის მიხედვითაც სისტემატიურ რეჟიმში მოხდება რუსთავსა და მის შემოგარენში მდებარე ყველა საწარმოს საქმიანობის შემოწმება;

მოახდინოს მყისიერი რეაგირება მოქალაქეების მხრიდან ცხელ ხაზზე შესულ შეტყობინებებზე, რეაგირების შესახებ ინფორმაცია მიაწოდოს მოქალაქეებს და მაღალი საზოგადოებრივი ინტერესიდან გამოდინარე, გამოაქვეყნოს საჯაროდ.

შემოწმების შედეგად შეადგინოს ოქმები ყველა შესაძლო სამართალდარღვევაზე, რომელსაც ადგილი ექნება კონკრეტულ საწარმოში.

შრომის პირობების ინსპექტირების დეპარტამენტს

შეამოწმოს ქალაქ რუსთავსა და მის შემოგარენში მდებარე საწარმოების სამუშაო პირობები, კერძოდ: რამდენად არის დაცული დასაქმებულთა უსაფრთხოება; რამდენად არის გამართული ხანძარსაწინააღმდეგო სისტემა; შეიმუშავოს რეკომენდაციები საწარმოებისთვის, რათა დაცული იქნას დასაქმებულთა სიცოცხლე და ჯანმრთელობა;