თვითმონიტორინგის ელექტრონული სისტემის მიერ დაფიქსირებული მონაცემები
თვითმონიტორინგის ელექტრონული სისტემის მიერ დაფიქსირებული მონაცემები
როგორც იცით, სამრეწველო ობიექტებს თვითმონიტორინგის ხელსაწყოს გამოყენებით თავიანთი გაფრქვევების უწყვეტად განსაზღვრის ვალდებულება 2021 წლის 1 ივნისიდან აქვთ. თვითმონიტორინგის მონაცემები კი პირდაპირ აისახება სამინისტროს ელექტრონულ ბაზაში. იმისათვის, რომ გაგვერკვია, როგორ ფუნქციონირებს თვითმონიტორინგის ელექტრონული სისტემა, მიმდინარე წლის 2 ივნისს ჩვენმა გუნდმა გამოითხოვა სისტემის მიერ 2022 წლის განმავლობაში დაფიქსირებული მონაცემები იმ ერთ-ერთი პირველი სამი საწარმოსთვის, რომლებმაც დაიწყეს ამ ვალდებულების შესრულება. ესენია: შპს „ემ ენ ქემიკალ ჯორჯია“, შპს „ჰაიდელბერგცემენტ ჯორჯია“ და შპს „ჯეოსთილი“.
თვითმონიტორინგის მონაცემები გამოთხოვილია თითოეული დამაბინძურებლის მიხედვით და დასაშვები ნორმების მითითებით. პირველ რიგში, ჩვენთვის საინტერესო იყო დააფიქსირა თუ არა თვითმონიტორინგის სისტემამ რომელიმე საწარმოდან რომელიმე დამაბინძურებლის კონცენტრაციის გადაჭარბება და რა რეაგირება მოახდინა ამაზე სამინისტრომ?
როგორც სამინისტროს 30 ივნისის პასუხიდან ირკვევა, შპს „ემ ენ ქემიკალ ჯორჯიას“ გაფრქვევის ერთ-ერთი წყაროდან დაფიქსირდა აირჰაერმტვერნარევის ტემპერატურის (t0C) დადგენილი ნორმის გადამეტება, რაზდაც დეპარტამენტის უფლებამოსილი თანამშრომლის მიერ 2023 წლის 30 იანვარს შედგა ადმინისტრაციულ სამართალდარღვევის შესახებ ოქმი, საქართველოს ადმინისტრაციულ სამართალდარღვევათა კოდექსის 798 მუხლის[1] შესაბამისად. მასალები განსახილველად გადაეგზავნა ქ. რუსთავის საქალაქო სასამართლოს. სასამართლომ 2023 წლის 19 აპრილის დადგენილებით შეწყვიტა სამართალდარღვევის საქმის წარმოება.
გარდა ამისა, 30 ივნისს მიღებული პასუხიდან გამომდინარე, რომელიც სამინისტროს ბაზაში დაფიქსირებული მონაცემების ამსახველ ცხრილებს მოიცავდა, ჩვენ კიდევ ერთი დამაზუსტებელი წერილი გავგზავნეთ. სამინისტროს მიერ გამოგზავნილ ცხრილში ჩანდა, რომ ჰაიდელბერგცემენტის გაფრქვევის ერთ-ერთი წყაროდან დაფიქსირდა CO-ს მნიშვნელოვანი გადაჭარბება. შესაბამისად, დავინტერესდით, მიიღო თუ არა დეპარტამენტმა შესაბამისი ზომები?
როგორც სამინისტროს 28 ივლისის პასუხიდან ირკვევა, შპს „ჰაიდელბერგცემენტ ჯორჯია“-ს მიმართ, საქართველოს ადმინისტრაციულ სამართალდარღვევათა კოდექსის 798-ე მუხლის მე-2 ნაწილის “ა” ქვეპუნქტით გათვალისწინებულ სამართალდარღვევაზე გარემოსდაცვითი ზედამხედველობის დეპარტამენტის უფლებამოსილი პირის მიერ, 2023 წლის 26 ივლისს შედგა ადმინისტრაციული სამართალდარღვევის შესახებ ოქმი, რომელიც დეპარტამენტის 2023 წლის 27 ივლისის წერილით განსახილველად გადაიგზავნა რუსთავის საქალაქო სასამართლოში.
ამასთან, შპს “ჯეოსთილის” მიმართ, საქართველოს ადმინისტრაციულ სამართალდარღვევათა კოდექსის 798-ე მუხლის მე-2 ნაწილის “ა” და “ბ” ქვეპუნქტით გათვალისწინებულ სამართალდარღვევაზე გარემოსდაცვითი ზედამხედველობის დეპარტამენტის უფლებამოსილი პირის მიერ 2023 წლის 16 ივნისს შედგა ადმინისტრაციული სამართალდარღვევის შესახებ ოქმი, რომელიც დეპარტამენტის 2023 წლის 20 ივნისის წერილით განსახილველად გადაგზავნილია რუსთავის საქალაქო სასამართლოში.
როგორც ხედავთ, მიუხედავად იმისა, რომ ეს საწარმოები გადაიარაღდნენ, გარკვეულ შემთხვევებში კონკრეტული დამაბინძურებლის გადაჭარბებები მაინც ფიქსირდება, ამიტომ მნიშვნელოვანია თვითმონიტორინგის ნორმების კონტროლი და საწარმოების მხრიდან ამ ნორმების დაცვის მაქსიმალური უზრუნველყოფა.
[1] https://matsne.gov.ge/ka/document/view/28216?publication=532