თბილისის აგლომერაციის ჰაერის გაუმჯობესების სამოქმედო გეგმა – სამუშაო ვერსია

თბილისის აგლომერაციის ჰაერის გაუმჯობესების სამოქმედო გეგმა – სამუშაო ვერსია

ატმოსფერული ჰაერის დაცვის შესახებ საქართველოს კანონში 2020 წელს შესული ცვლილებით, ატმოსფერული ჰაერის ხარისხის მართვის მიზნით საქართველოს ტერიტორია დაიყო ზონებად და აგლომერაციებად.

რუსთავი ცენტრალური ზონის შემადგენლობაში შედის. ცენტრალური ზონისთვის ჰაერის ხარისხის მართვის გეგმა 2023-2025 წლებისთვის საქართველოს მთავრობამ 2023 წლის 7 აგვისტოს დაამტკიცა. „გავიგუდეთ“ ამ გეგმის ხელშემწყობი სამუშაო ჯგუფის წევრი იყო და ვცდილობდით, რუსთავის საჭიროებები მაქსიმალურად ჩაგვერთო სამოქმედო გეგმის აქტივობებში.

ჩვენი გუნდი თბილისის აგლომერაციის ჰაერის ხარისხის გაუმჯობესების სამოქმედო გეგმის განხილვაშიც ჩაერთო, რადგან რუსთავთან დაკავშირებით გარკვეული საკითხები სხვადასხვა ინსტიტუციის კომპეტენციედიდან და პასუხისმგებლობებიდან გამომდინარე ცენტრალური ზონის გეგმაში ვერ მოხვდა და, სამინისტროს განმარტებით, ამ საკითხებზე მუშობა რელევანტური იქნებოდა თბილისის გეგმაზე მუშაობისას.

კონკრეტულად, ვგულისხმობთ რუსთავ-თბილისს შორის საქალაქთაშორისო ტრანსპორტის პრობლემას, რომელთან დაკავშირებითაც თბილისის მერიის ჩართულობა იყო საჭირო.

ეს საკითხი სამუშაო ჯგუფის შეხვედრაზეც გავაჟღერეთ.

მიმდინარე წლის 29 იანვარს სამინისტროგან მივიღეთ თბილისის ჰაერის ხარისხის გაუმჯობესების  სამოქმედო გეგმის სამუშაო ვერსია და მასთან დაკავშირებულ დეტალებს თქვენც გიზიარებთ.

როგორც სამუშაო ვერსიიდან ჩანს, გეგმა აერთიანებს 4 ამოცანას და 46 აქტივობას.

ამოცანა 1.1: ქ. თბილისის აგლომერაციაში ატმოსფერული ჰაერის მყარი ნაწილაკებით დაბინძურების შემცირება.

ამოცანა 1.2: ქ. თბილისის აგლომერაციაში აზოტის დიოქსიდის (NO2) გაფრქვევების შემცირება.

ამოცანა 1.3: ქ. თბილისის აგლომერაციაში ატმოსფერული ჰაერის ხარისხისა და ადამიანის ჯანმრთელობაზე ჰაერის დაბინძურების ზემოქმედების შეფასების გაუმჯობესება.

ამოცანა 1.4: ქ. თბილისის აგლომერაციაში ატმოსფერული ჰაერის დაცვის შესახებ საზოგადოების ცნობიერების ამაღლება.

ამ ამოცანებიდან, რუსთავთან დაკავშირებული საკითხები ინტეგრირებულია ამოცანა 1.2-ის აქტივობებში.

კერძოდ:

აქტივობა 1.2.13 – ქ.თბილისის მეზობელ ქალაქებთან (მცხეთა, რუსთავი, გარდაბანი) დამაკავშირებელი რეგიონული სარკინიგზო ტრანსპორტის განვითარების ტექნიკურ-ეკონომიკური შესაძლებლობების კვლევა.

აქტივობა 1.2.14 – ქ. თბილისის საზოგადოებრივი ტრანსპორტის სისტემაში თბილისის მიმდებარე დასახლებების ჩართვა (სულ მცირე 3 დასახლება).

ჩვენ სამინისტროს უკვე ვკითხეთ იგულისხმება თუ არა რუსთავი ამ დასახლებებში და რა კონკრეტულ ღონისძიებებს მოიცავს ეს აქტივობა.

გარდა ამისა, ჩვენი მთავარი მოთხოვნა და აქცენტი, რაც რუსთავ-თბილისს შორის გადაადგილების პრობლემას შეეხება, სამოქმედო გეგმის სამუშაო ვერსიაში კვლავ არაა გათვალისწინებული. ამასთან დაკავშირებითაც გავუგზავნეთ სამინისტროს კომენტარი და დაველოდებით მათ პასუხს.

ჩვენი ერთ-ერთი შეკითხვა ასევე შეეხებოდა აქტივობა 1.3.3-ს:    „სამრეწველო სექტორიდან განსაკუთრებით საყურადღებო (საშიში) ნივთიერებების (გსნ) გაფრქვევის შეფასება“. გვაინტერესებდა მხოლოდ თბილისის ტერიტორიაზე არსებული საწარმოებს მოიცავს კვლევა თუ ახლომდებარე საწარმოებსაც, მაგალითად, რუსთავში მდებარე საწარმოებსაც. ამას ვაზუსტებთ, რადგან ქარის დროს, რუსთავის საწარმოების ემისიები თბილისამდეც შეიძლება აღწევდეს და საინტერესოა ამ მიმართულებით რუსთავში არსებული სიტუაციის კვლევაც. ასევე, ჩვენთვის განსაკუთრებით საინტერესოა, რატომ არ ჩაიდო მსგავსი კვლევა ცენტრალური ზონის სამოქმედო გეგმაში?

გეგმის განვითარებასთან დაკავშირებულ სიახლეებს ეტაპობრივად გაგიზიარებთ.