სამუშაო ჯგუფის ფარგლებში შპს „აგლომერატის“ გზშ ანგარიშის განხილვა გაიმართა
სამუშაო ჯგუფის ფარგლებში შპს „აგლომერატის“ გზშ ანგარიშის განხილვა გაიმართა
დღეს, 23 დეკემბერს, სამოქალაქო მოძრაობის „გავიგუდეთ“ ორგანიზებით მეტალურგიული საწარმოს – შპს „აგლომერატის“ გზშ ანგარიშის განხილვის, კომენტარებისა და შენიშვნების მომზადების მიზნით სამუშაო ჯგუფის ფარგლებში შეხვედრა გაიმართა.
შპს “აგლომერატი” გეგმავს, ქალაქ რუსთავში, ლითონშემცველი მადნის გამოწვისა და აგლომერირების ქარხნის მოწყობა-ექსპლუატაციას, რომელიც წლიურად გამოიმუშავებს 66000 ტ/წელ აგლომერატს 7920 საათის განმავლობაში.
აღნიშნულ ტერიტორიაზე მოეწყობა აგლომერაციის შეცხობის 8 ჯამი შესაბამისი საჭირო დამხმარე დანადგარებით და ინფრასტრუქტურით. საწარმოს ტერიტორია მოიცავს აგლომერაციის საწარმოს, ნედლეულის განთავსების საწარმოო მოედანს და მზა პროდუქციის დახურულ სასაწყობე მეურნეობას.
საწარმოს ტერიტორიაზე მოხდება ანგარის ტიპის ნაწილობრივი დახურული შენობის აგება, კერძოდ ყველა ის ტერიტორია, სადაც განთავსებული იქნება სასაწყობო მეურნებობები იქნება დახურული.
აგლომერაციის საწარმოო ციკლი მოიცავს შემდეგ ობიექტებს: 1. აგლომერაციის საწარმო; 2. ნედლეულის განთავსების საწარმოო მოედანი; 3. მზა პროდუქციის დახურული სასაწყობე შენობა.
საქმიანობის შედეგად გარემოში გამოფრქვეული მავნე ნივთიერებებია: არაორგანული მტვერი, მანგანუმის ორჟანგი, აზოტის დიოქსიდი, NO2, გოგირდის დიოქსიდი, SO2, ნახშირჟანგი, CO, ქრომი(Cr+6), თუთიის ოქსიდი, ტყვია და მისი ნაერთები, ნიკელი მეტალური, კადმიუმის სულფატი, დარიშხანი, სპილენძის ოქსიდი, ვერცხლისწყალი, სელენი, Se. გაფრქვეულ ნივთიერებათაგან დიდი წილი მოდის არაორგანულ მტვერზე, გოგირდის დიოქსიდსა და CO-ზე.
შეხვედრაზე დეტალურად მიმოვიხილეთ გზშ ანგარიში და მოვამზადეთ წერილობითი პოზიცია, სადაც ასახულია მოძრაობის შენიშვნები და რეკომენდაციები, რომელთაც გარემოს ეროვნულ სააგენტოსთან ერთად მოსახლეობასაც გავუზიარებთ.
შპს „აგლომერატის“ ლითონშემცველი მადნის გამოწვისა და აგლომერირების საწარმოს მოწყობა-ექსპლუატაციის პროექტის გზშ ანგარიშის განხილვა ქ.რუსთავის მერიაში 27 დეკემბერს 14:00 საათზე გაიმართება. საჯარო განხილვაზე დასწრება ნებისმიერ მსურველს შეუძლია.
გზშ დოკუმენტი შეგიძლიათ, იხილოთ ბმულზე.