რატომ უნდა დავესწროთ საჯარო განხილვას 26 ივნისს მერიაში?

26 ივნისს 11 საათზე არის „ცენტრალური ზონის ატმოსფერული ჰაერის ხარისხის მართვის 2023-2025 გეგმის“ პროექტის საჯარო განხილვა.

ამ გეგმის მიზანია ცენტრალურ ზონაში ატმოსფერული ჰაერის ხარისხის გაუმჯობესება. ამ მიზნის მისაღწევად კი, გეგმა მოიცავს ოთხ ამოცანას:

ამოცანა 1.1: ცენტრალურ ზონაში არსებული სტაციონარული წყაროებიდან ატმოსფერული ჰაერის მავნე ნივთიერებებით დაბინძურების შემცირება

ამოცანა 1.2: ცენტრალურ ზონაში ავტოსატრანსპორტო საშუალებებიდან გამონაბოლქვის შემცირება

ამოცანა 1.3: ცენტრალურ ზონაში ატმოსფერული ჰაერის ხარისხის შეფასების სისტემის გაუმჯობესება

ამოცანა 1.4: ცენტრალურ ზონაში ატმოსფერული ჰაერის ხარისხის თაობაზე ცნობიერების ამაღლება

შეგახსენებთ, რომ სამოქმედო გეგმის შემუშავებაში ჩვენი გუნდი აქტიურად იყო ჩართული და გვიხარია, რომ სამუშაო შეხვედრებისას ჩვენ მიერ გაჟღერებული საკითხებისა და პრობლემების ნაწილი ასახულია გეგმის პროექტის შესაბამის აქტივობებში.

სამოქმედო გეგმაში გაწერილი აქტივობები და ჩვენი კომენტარების საფუზველზე გათვალსიწინებული საკითხები კიდევ ერთი დასტურია იმისა, რომ სამოქალაქო ჩართულობას გადამწყვეტი მნიშვნელობა აქვს სასურველი შედეგების მიღწევის გზაზე. აუცილებლად უნდა ჩავერთოთ იმ პროცესებში, რომლითაც ჩვენს ქალაქში ჯანსაღი გარემოს შექმნა/შენარჩუნების საკითხი წყდება.

გთავაზობთ სამოქმედო გეგმაში გაწერილ იმ აქტივობების ნაწილს, რომელთა საბოლოო ფორმულირებაში მნიშვნელოვანი წვლილი შეიტანა „გავიგუდეთ“-ის მიერ გაჟღერებულმა კომენტარებმა და ხაზგასმულმა საკითხებმა:

– მშენებლობისა და ამტვერებადი სამშენებლო მასალების შენახვა-დისტრიბუციის პროცესში მყარი ნაწილაკების გაფრქვევების შემცირების მიზნით დადგენილი მოთხოვნების შესრულებაზე ზედამხედველობის გააქტიურება;

– ცენტრალურ ზონაში არსებული საწარმოების ინსპექტირების, მათ შორის შემოწმებების რაოდენობა გაიზარდა 100-დან 200-მდე.

– ჰაერის დაბინძურების მოსახლეობის ჯანმრთელობაზე ზემოქმედების შეფასების ინდიკატორების კომპენდიუმის შემუშავება

თუმცა, არის გარკვეული საკითხები, რომელთა მოგვარებასაც ჩვენი გუნდი აღნიშნული გეგმის ფარგლებში ისურვებდა, თუმცა ამ ეტაპზე ისინი გეგმაში არ არის ასახული:

– გარემოსდაცვითი ზედამხედველობის დეპარტამენტის მიერ ქ. რუსთავის საწარმოო ზონის შემოვლის მინიმალური სიხშირის განსაზღვრა და რეგულარული განხორციელება.

ამ აქტივობაზე უარი ითქვა იმ მიზეზით, რომ არ იქნებოდა ეფექტიანი, ვინაიდან მხოლოდ გარეგნული დათვალიერებით ინსპექტორი ვერ განსაზღვრავს ადგილი აქვს თუ არა დარღვევას და კონკრეტულად რაში მდგომარეობს იგი. შესაბამისად, საჭიროდ ჩაითვალა, რომ ამ აქტივობაზე რესურსის დახარჯვის ნაცვლად გაზრდილიყო გეგმიური ინსპექტირების რაოდენობა.

– ასევე ამ ეტაპზე, აღნიშნული გეგმის ფარგლებში ვერ მოხდა დატვირთვის ნორმის დაწესება ქალაქისთვის. თუმცა სამინისტროს წარმომადგენლებმა განმარტეს, რომ ამის საპირწონედ აღნიშნული საკითხის რეგულირების მთავარი ინსტრუმენტია არსებული სანებართვო სისტემა. კერძოდ, ნებართვის გაცემის პროცესში მხედველობაში მიიღება ემისიების მოცულობა კუმულაციური ეფექტის გათვალისწინებით.

მიუხედავად ამისა, ჩვენი გუნდი მიიჩნევს, რომ სანებართვო სისტემა ვერ აგვარებს იმ ფაქტს, რომ ქალაქში ჰაერი არის ძალიან დაბინძურებული, რასაც კიდევ უფრო ამძიმებს არსებული საწარმოების მიერ წარმადობის გაზრდა ან ახალი საწარმოების გახსნა.

– ასევე სამოქმედო გეგმაში არ არის შეტანილი საწარმოო ზონაში გზის საფარის გაუმჯობესების საკითხი.

– გეგმის საბოლოო ვერსიაში არ შევიდა ჩვენ მიერ გაჟღერებული ინიციატივა სამედიცინო დაწესებულებებში მიმართვიანობაზე სტატისტიკის საცხოვრებელი ადგილის მიხედვით წარმოებასთან დაკავშირებით. როგორც სამინისტროს წარმომადგენლებმა განმარტეს, ეს აქტივობა აღნიშნულ გეგმაში არ ჩაიდო, ვინაიდან თავისი შინაარსით, ეს არის უფრო ცალკე ამოცანა, ვიდრე აქტივობა, რომლის განხორციელებისათვის სხვა ბევრი აქტივობის შესრულებაა საჭირო. ეს საკითხი გავაჟღერეთ რადგან ვფიქრობთ, რომ სათანადო მონაცემების გარეშე ძნელია დადგინდეს ჰაერის დაბინძურების გავლენა რუსთაველების ჯანმრთელობაზე და შესაბამისად, სამომავლოდ ეს გაართულებს ჯანდაცვის სპეციალური უფასო პროგრამების შემუშავებას რუსთაველებისთვის.

რაც შეეხება, გეგმის ფარგლებში ჩვენ მიერ წამოჭრილ საქალაქთაშორისო ტრანსპორტის საკითხს, სამინისტროს წარმომადგენლებმა არაერთხელ დაგვიდასტურეს, რომ ამ საკითხის გათვალისწინება თბილისის აგლომერაციის ატმოსფერული ჰაერის ხარისხის გაუმჯობესების სამოქმედო გეგმის ფარგლებში იგეგმება.

ეს არის ინფორმაცია მოკლედ იმის შესახებ, თუ რა საკითხები გავაჟღერეთ სამუშაო ჯგუფის ფარგლებში. თქვენც გირჩევთ, რომ გაეცნოთ სამოქმედო გეგმას ამ ბმულზე: https://eiec.gov.ge/Ge/Announcements/3079?fbclid=IwAR1v0XWdfVeQg7kJIqCp1lvjANd-2BAj4IpACM07-2K7xtZPmrV5cg3qME4 და ორშაბათს, 26 ივნისს 11:00 საათზე თქვენი მოსაზრებები გააჟღეროთ საჯარო განხილვაზე.

თქვენი ჩართულობის იმედი გვაქვს. ვინც ფიზიკურად ვერ შეძლებთ მერიაში მოსვლას, შეგიძლიათ, განხილვას ონლაინ შემოუერთდეთ ქვემოთ მოცემული ბმულის მეშვეობით:

https://us02web.zoom.us/j/89607633078?pwd=SWpHZjVkaFZYTHJyemNqRmRrOEJtUT09

Webinar ID: 896 0763 3078

Passcode: 430979.

გავიაზროთ და გავიზიაროთ უკეთესი გარემოს შექმნის პასუხისმგებლობა.