რას ნიშნავს და რატომ უნდა დაწესდეს „დატვირთვის ნორმა“?

რას ნიშნავს და რატომ უნდა დაწესდეს „დატვირთვის ნორმა“?

საწარმოების რაოდენობისა თუ წარმადობების ზრდის ფონზე ჩვენი გუნდი აქტიურად უსვამს ხაზს ქალაქისთვის დარტვირთვის ნორმის შემოღებას და ამას ვაჟღერებთ ყველა შეხვედრაზე, სადაც საქმე ეხება რუსთავის ჰაერის ხარისხის გაუმჯობესებასთან დაკავშირებული პოლიტიკის შემუშავებას.

საწარმოების გახსნა თავისთავად კარგი ამბავია, მაგრამ ქალაქში სადაც ისედაც კატასტროფულად არის დაბინძურებული ჰაერი, დადგენილი უნდა იყოს რა ტიპის საწარმოების გახსნა შეიძლება „აიტანოს“ ჩვენმა ეკოლოგიურმა მდგომარეობამ, რა ტიპის საწარმოების გახსნა აღარ შეიძლება ან წარმადობის გაზრდის შემთხვევაში, რა შემარბილებელი ღონისძიებები უნდა გაატაროს ამა თუ იმ ქარხანამ.

თუ რუსთავში ისეთი საწარმოები აშენდება (ან გაზრდიან წარმადობას), რომლებიც ასევე ხელს უწყობენ დიდი ოდენობით მტვრის წარმოქმნას, მაშინ უკვე მოქმედი საწარმოების მხრიდან ფილტრების დამონტაჟება აღარ იქნება საკმარისი იმისთვის, რომ ქალაქში მტვრის მყარი ნაწილაკების კუთხით სიტუაცია დარეგულირდეს.

თავად გარემოს დაცვისა და სოფლის მეურნეობის სამინისტროს წარმომადგენლებიც კი აღნიშნავენ, რომ მყარი ნაწილაკების ამ მასშტაბით გადაჭარბების პირობებში, ქალაქში დამატებითი დატვირთვ ის არანაირ დამატებით რესურსზე საუბარი არ შეიძლება იყოს. იმისთვის, რომ ფილტრებისა და თვითმონიტორინგის დაყენების შემდეგ ქალაქის მოსახლეობამ შვება რეალურად იგრძნოს, აუცილებელია დატვირთვის ნორმის დაწესება, რათა უფრო მკაცრად გაკონტროლდეს როგორც არსებული საწარმოების წარმადობის გაზრდის, ისე ახალი ობიექტების დამატების საკითხი.

ჩვენი სურვილი იყო ეს პუნქტი ჩადებულიყო 2023-2025 წლებისთვის ცენტრალური ზონის ჰაერის ხარისხის გაუმჯობესების სამოქმედო გეგმაშიც, თუმცა როგორც სამუშაო ჯგუფის შეხვედრაზე გვითხრეს, ეს საკითხი განიხილეს ევროპელ ექსპერტებთანაც, რომელთაც თქვეს, რომ მსგავსი პრაქტიკა ევროპის ქვეყნებში მათთვის ცნობილი არ არის. შესაბამისად, ამ ეტაპზე, ვერ შემუშავდა ისეთი აქტივობა, რომელიც ზემოთ მოცემულ გამოწვევას უპასუხებს. თუმცა, ჩვენ ვფიქრობთ, რომ ამ საკითხის მოგვარება არის აუცილებელი.

წინააღმდეგ შემთხვევაში ფილტრაციის სისტემების გამართულად მუშაობის შემთხვევაშიც, ქალაქში კუმულაციური ზემოქმედება გაიზრდება და ჰაერის დაბინძურების თვალსაზრისით კვლავ არასახარბიელო სურათი გვექნება.

ჩვენი გუნდი გააგრძელებს ამ საკითხის ადვოკატირებას და, იმედი გვაქვს, სამინისტროსგანაც სათანადო ყურადღება დაეთმობა ამ თემაზე მუშაობას.