ჰაერის ხარისხის მართვის გეგმის განხილვა რუსთავის მერიაში გაიმართა

დღეს, 26 ივნისს, 11:00 საათზე „ცენტრალური ზონის ატმოსფერული ჰაერის ხარისხის მართვის 2023-2025 გეგმის“ პროექტის საჯარო განხილვა გაიმართა.

“გავიგუდეთ”-ის გუნდი ესწრებოდა შეხვედრას, რომლის დროსაც კიდევ ერთხელ გავაჟღერეთ ის საკითხები, რომლებიც სამოქმედო გეგმაში არ/ვერ აისახა (ინფორმაციისთვის იხილეთ ბმული).

ასევე, შევიტყვეთ სასიხარულო ინფორმაცია, რომ დაავადებათა კონტროლისა და საზოგადოებრივი ჯანმრთელობის ეროვნული ცენტრი, სამოქმედო გეგმის ფარგლებში ჩასატარებელი კვლევის ფარგლებში (ქ. რუსთავის მოსახლეობის ექსპოზიციის შეფასება მავნე ნივთიერებების (PM10, PM2.5, NO2) ჭარბი კონცენტრაციებისადმი) მონაცემებად გამოიყენებს არა მხოლოდ რუსთავის სამედიცინო დაწესებულებებში მიმართვიანობის სტატისტიკას, არამედ, იმ პაციენტების სტატისტიკასაც, რომლებიც იურიდიულად რეგისტრირებული არიან რუსთავში, თუმცა, შესაძლოა თბილისის ან სხვა ქალაქების სამედიცინო დაწესებულებების მომსახურებით სარგებლობდნენ. ეს ფაქტი ძალიან მნიშვნელოვანია, რათა სწორად შეფასდეს ჰაერის დაბინძურების გავლენა რუსთაველების ჯანმრთელობაზე.

შეგახსენებთ, რომ ჩვენი გუნდი იყო ამ გეგმის სამუშაო ჯგუფის წევრი და მისი დამტკიცების შემდგომ, აქტიურად გავაგრძელებთ გეგმის შესრულების მონიტორინგს.